ކްރިމިނަލް ކޯޓަށް ހާޒިރުކުރާ އިސް ބޭފުޅުންނަށް ހާއްސަ ރައްކާތެރިކަމެއް ދޭން ޖެހޭ ގޮތަށް އެ ކޯޓުގެ ގަވައިދު އެކުލަވާލައިފި އެވެ.
ކުރިމިނަލް ކޯޓުން އެކި ކަންކަމުގައި މިހާރު އަމަލު ކުރަމުން އަންނަނީ އެ ކޯޓުގެ ގާޒީންގެ އާންމު މަޖިލީހުން ފާސްކޮށްފައިވާ ވަކިވަކި އުސޫލުތަކެއްގެ މައްޗަށެވެ. ނަމަވެސް، ކޯޓުތަކުގެ ގާނޫނުގެ ދަށުން ކޯޓުން އަމަލު ކުރާ އުސޫލުތައް ބަޔާންކުރާ ގަވައިދެއް އޮންނަން ޖެހެ އެވެ.
ކޯޓުތަކާބެހޭ ގާނޫނު ވުޖޫދަށް ގެނައި ފަހުން ފުރަތަމަ ފަހަރަށް ކުރިމިނަލް ކޯޓުން ވަނީ އެ ކޯޓުގެ ގަވައިދު އެކުލަވާލައި މިއަދު ގެޒެޓްކޮށްފަ އެވެ.
އެގޮތުން އާންމުކުރި ގަވައިދުގައި ޝަރީއަތުގެ އަޑުއެހުންތަކާ ހާޒިރުވާ ފަރާތްތަކަށް ހާއްސަ ރައްކާތެރިކަން ދިނުމަށް ހިމަނައި، އެކަމުގައި އަމަލުކުރާ އުސޫލު އެކުލަވާލި އެވެ.
ގަވައިދުގައި ބުނާ ގޮތުން ރައީސް، ނުވަތަ ރައީސްކަން ކުރައްވާފައިވާ ބޭފުޅުންނާއި ނައިބު ރައީސް ނުވަތަ ނައިބު ރައީސްކަން ކުރައްވާފައިވާ ބޭފުޅުންނަށް ހާއްސަ ރައްކާތެރިކަން ދޭން ޖެހެ އެވެ.
ރައްޔިތުންގެ މަޖިލީހުގެ ރައީސް ނުވަތަ މަޖިލީހުގެ ރައީސްކަން ކުރައްވާފައިވާ ބޭފުޅުންނާއި އުއްތަމަ ފަނޑިޔާރު ނުވަތަ އުއްތަމަ ފަނޑިޔާރުކަން ކުރައްވާފައިވާ ބޭފުޅުންނަށް ވެސް ހާއްސަ ރައްކާތެރިކަން ދޭން ޖެހޭނެ ކަމަށް ކަނޑައަޅާފައިވެ އެވެ.
އޭގެއިތުރުން، މިނިސްޓަރުންނާއި މަޖިލިސް މެންބަރުންނާއި ފަނޑިޔާރުންނާއި ރިޓަޔާޑް ފަނޑިޔާރުން ކޯޓުން ހާއްސަ ރައްކާތެރިކަން ދޭން ޖެހޭނެ ކަމަށް ގަވައިދުގައި ބުނެ އެވެ.
އެ ބޭފުޅުންގެ އިތުރުން ވެސް ހާއްސަ ރައްކާތެރިކަން ދޭން ޖެހޭ ކަމަށް ކޯޓަށް ފެނިއްޖެނަމަ، އެމީހަކަށް އެ ރައްކާތެރިކަން ދެވިދާނެ އެވެ.
ހާއްސަ ރައްކާތެރިކަން ކޯޓުގެ އިދާރާއިން ހަމަޖައްސަން ޖެހޭނެ ކަމަށް ގަވައިދުގައި ބަޔާންކޮށްފައިވާއިރު، ގާނޫނީ ވަކީލެއްގެ ހައިސިއްޔަތުން ވަޑައިގަންނަވާ އެއްވެސް ފަރާތަކަށް މި ހާއްސަ ރައްކާތެރިކަމުގެ އިންތިޒާމް ހަމަޖައްސައިނުދޭނެ އެވެ.
މީގެކުރިން ކުރިމިނަލް ކޯޓަށް ކުރީގެ ރައީސުން ކަމަށްވާ މައުމޫން އަބްދުލްގައްޔޫމާއި މުހައްމަދު ނަޝީދު އަދި އަބްދުﷲ ޔާމީން ކުރިމިނަލް ކޯޓަށް ހާޒިރުކޮށްފަައިވެ އެވެ. އެ ބޭފުޅުން އޭރު ކޯޓަށް ހާޒިރުކުރިއިރު ވަކި ހާއްސަ އުސޫލަކުން އެ ބޭފުޅުންނާމެދު އަމަލެއް ނުކުރެ އެވެ.
އޭގެއިތުރުން ކުރީގެ އުއްތަމަ ފަނޑިޔާރު އަބްދުﷲ ސައީދާއި ކުރީގެ ފަނޑިޔާރުންނާއި ގިނަ އަދަދެއްގެ މަޖިލިސް މެންބަރުން ކުރިމިނަލް ކޯޓަށް ހާޒިރުކޮށްފައިވެ އެވެ.
މިހާރު ވެސް ކުރީގެ ރައީސް ޔާމީންގެ މައްސަލައެއް ކުރިމިނަލް ކޯޓުގައި ކުރިއަށްދެ އެވެ. އަދި، ކުރީގެ ނައިބު ރައީސް އަބްދުﷲ ޖިހާދުގެ މައްސަލައަކާއި ކުރީގެ މެންބަރު އަހުމަދު ނިހާންގެ މައްސަލައެއް ވެސް ކުރިމިނަލް ކޯޓުގައި މިހާރު ކުރިއަށްދެ އެވެ.
ކުރިމިނަލް ކޯޓު: ގަވައިދު އެކުަލަވާލައި ހިންގުމަށް ވަނީ ބަދަލު ގެނެސްފައި
ނޫސްވެރިންގެ ދަފުތަރަކާއި ކާޑެއް
ކުރިމިނަލް ކޯޓުގެ ޝަރީއަތްތައް ކަވާކުރުމަށް އެ ކޯޓަށް ވަންނަ ނޫސްވެރިންގެ ދަފުރަތެއް ހަދައި، ހާއްސަ ކާޑެއް ދޫކުރުމަށް 2019 ވަނަ އަހަރުގެ ތެރޭ އެ ކޯޓުން އުސޫލެއް ހެދި އެވެ. އެ އުސޫލު މިއަދު އެކުލަވާލި ގަވައިދުގައި ވަނީ ހިމަނާފަ އެވެ.
އެގޮތުން ގަވައިދުގައި ބުނެފައިވާ ގޮތުގައި ނޫސްވެރިންނަށް ޝަރީއަތުގެ މަޖިލީހުގައި ފަސޭހަކަމާއެކު ބައިވެރިވުމުގެ ފުރުސަތު ފަހިކޮށްދިނުމަށްޓަކައި ކޯޓުގައި ނޫސްވެރިންގެ ދަފުތަރެއް އޮންނަން ޖެހޭނެ އެވެ.
އެ ދަފުތަރުގައި ހިމަނަނީ އެކަމަށް އެދި އެ ކޯޓަށް ހުށަހަޅާ ނޫސްވެރިންނެވެ. އަދި، އެ ނޫސްވެރިންނަށް ހާއްސަ ކާޑެއް ކުރިމިނަލް ކޯޓުން ދޫކުރާނެ އެވެ. ކާޑު ދޭ ނޫސްވެރިންނަށް ކުރިމިނަލް ކޯޓުގެ ޝަރީއަތަކަށް ވަނުމަށް ފަސޭހަ ގޮތްތަކެއް ހަމަޖައްސައިދޭން ގަވައިދުގައި ހިމަނާފައިވެ އެވެ.
އެގޮތުން، ކޯޓުގެ ބައްދަލުވުންތަކާއި ޖަލްސާތަކުގައި ބައިވެރިވުމުގެ ފުރުސަތު ވެސް އެ ނޫސްވެރިންނަށް ދޭނެ އެވެ. އަދި ކޯޓުގެ ނިންމުންތަކާ ގުޅޭ މައުލޫމާތު ފަސޭހަކަމާއެކު އެ ކޯޓުން ފޯރުކޮށްދޭނެ އެވެ.
