މިދިޔަ އަހަރު ބޭންކް އޮފް މޯލްޑިވްސް (ބީއެމްއެލް)އަށް ލިބުނު ފައިދާއިން ހިއްސާއަކަށް 15ރ. ގެ މަގުން 80.7 މިލިއަން ރުފިޔާ ބަހަން އެ ބޭންކުގެ ހިއްސާދާރުން މިއަދު ފާސްކޮށްފި އެވެ.
މޯލްޑިވްސް ސެކިއުރިޓީސް ޑިޕޮސިޓަރީގެ "ފަހި ވޯޓް" ޕްލެޓްފޯމު މެދުވެރިކޮށް ކުރިޔަށް ގެންދިޔަ ބީއެމްއެލްގެ އަހަރީ އާންމު ޖަލްސާގައި މި އަދަދަށް ފައިދާ ބަހަން ޖަލްސާގައި ބައިވެރިވި ހުރިހާ ހިއްސާދާރުން އިއްތިފާގުވި އެވެ.
ބޭންކުގެ މިދިޔަ އަހަރުގެ މާލީ ހިސާބުތައް ހިއްސާކުރަމުން ބޭންކުގެ ސީއީއޯ އަދި އެމްޑީ ޓިމް ސޯޔާ ވިދާޅުވީ ކޮވިޑް ބަލިމަޑުކަމުގެ ސަބަބުން އައި މާލީ ހީނާރުކަމުގެ ތެރޭގައި ބޭންކުގެ އާމްދަނީ ވަރަށް ބޮޑަށް ދަށްވި ކަމަށެވެ.
އޭގެ ސަބަބުން އޭގެ ކުރީ އަހަރަށް ވުރެ ބޭންކުގެ އާމްދަނީ 60 ޕަސަންޓު ދަށްވީ ކަމަށް އޭނާ ފާހަގަކުރި އެވެ.
"އަހަރު ކާމިޔާބު ކަމާއެކު ފެށިގެން ދިޔަނަމަވެސް ކޮވިޑް ގެ ބަލިމަޑުކަމުގެ ސަބަބުން އާމްދަނީ ވަަރަށް ބޮޑަށް ދަށްވެ ބޭންކަށް އެކަމުގެ ބޮޑު ނޭދެވޭ އަސަރެއް ކުރި" ބީއެމްއެލްގެ ސީއީއޯ އަދި އެމްޑީ ޓިމް ސޯޔާ ވިދާޅުވި އެވެ.
މި ގޮންޖެހުންތަކާ އެކު ވެސް ބީއެމްއެލްއަށް މިދިޔަ އަހަރު ސާފު ފައިދާގެ ގޮތުގައި 325 މިލިއަން ރުފިޔާ ލިބުނެވެ.
ބީއެމްއެލްގެ އާމްދަނީ ދަށްވި ނަމަވެސް މިދިޔަ އަހަރު ބޭންކަށް އެހެނިހެން ދާއިރާތަކުން ކުރިއެރުން ލިބުނެވެ. އެގޮތުން އަހަރުގެ ތެރޭގައި 12،000 ވުރެ ގިނަ ކަސްޓަމަރުން ބޭންކާ އަލަށް ގުޅުނެވެ. އަދި ބޭންކުން ދޫކުރި ލޯނުގެ އަގު ތިން ބިލިއަން ރުފިޔާއަށް އަރަ އެވެ.
