ކިންގް ސަލްމާން މިސްކިތުގެ ޑިޒައިނަކީ ކޮޕީރައިޓެއް ކަމާއި އެ މައްސަލާގައި ދައުވާކުރާނެކަން އިސްލާމިކް މިނިސްޓަރު ޑރ. އަހްމަދު ޒާހިރު އަލީއަށް އަންގައިފި އެވެ.
މިސްކިތް އަޅަން މެލޭޝިޔާ ކުންފުންޏެއް ކަމަށްވާ އެންއާރްވައި އާކިޓެކްސްއާއެކު ސަރުކާރުން މަޝްވަރާތަކެއް ކުރި އެވެ. ނަމަވެސް، އެ މަޝްރޫއު ހަވާލުކޮށްފައިވަނީ ތުރުކީގެ ޓާމެކްސް ކުންފުންޏާ އެވެ.
ތުރުކީގެ ޓާމެކްސް ކުންފުނިން އެޅި މިސްކިތަކީ އެންއާރްވައި އާކިޓެކްސްއިން ހުށަހެޅި ޑިޒައިނެއް ކަމަށް ބުނެ އެ ކުންފުނިން އިސްލާމިކް މިނިސްޓްރީއަށް ސިޓީއެއް ފޮނުވާފައިވެ އެވެ.
އިސްލާމިކް މިނިސްޓަރު "އަދަދު"އަށް މިއަދު ވިދާޅުވީ މިނިސްޓަރަށް އެޑްރެސްކޮށް ފޮނުވާފައިވާ އެ ސިޓީގައި މެލޭޝިޔާ އެ ކުންފުނީގެ ޑިޒައިނެއް ކޮޕީކޮށްގެން ބޭނުންކޮށްފައިވާ ކަމަށް ބުނެފައިވާ ކަމަށެވެ. އަދި އެ މައްސަލާގައި މެލޭޝިއާ ކުންފުނީގެ ހައްގު ހޯދުމަށްޓަކައި ކޯޓަށް ދާނެ ކަމަށް ވެސް ބުނެފައިވާ ކަމަށް މިނިސްޓަރު ވިދާޅުވި އެވެ.
"އެ ކުންފުނި މީހުންގެ އަތުގައި ހުރިހާ ލިޔެކިޔުންތަކާއި ހެކިތައް އެބަހުރި. އޭގެ ތެރޭގައި މަޝްވަރާތަކުގަ ސަރުކާރާއެކު އޭގައި ބައިވެރިވި މީހުންގެ ފޮޓޯތައް ވެސް ފޮނުވާފަ ހުރި." މިނިސްޓަރު ވިދާޅުވި އެވެ.
އެ ކުންފުނިން މަޝްވަރާ ކުރި ޑިޒައިންތަކާ މިހާރު އަޅާފައިވާ މިސްކިތުގެ ޑިޒައިނަށް ގެނެސްފައިވަނީ ކުޑަ ބަދަލެއްކަން މިނިސްޓްރު ވެސް ފާހަގަކުރެއްވި އެވެ.
މިނިސްޓަރު ވިދާޅުވި ގޮތުގައި އެކަމާ ގުޅިގެން ރައީސް އޮފީހުގެ ތެރޭގައި ވެސް ބައްދަލުވުންތައް ބޭއްވި ކަމަށާއި އެ ސިޓީއާ ގުޅޭ މައްސަލަ މިހާރު އެޓާނީ ޖެނެރަލްގެ އޮފީހަށް ފޮނުވާ މައްސަލަ ބަލަމުންދެ އެވެ.
މެލޭޝިޔާ ކުންފުންޏެއް ކަމަށްވާ އެންއާރްވައި އާކިޓެކްސް އިން ހުށަހެޅި މިސްކިތުގެ ޑިޒައިން
މިސްކިތް ނުހުޅުވާ ލަސްވުމުގެ ސަބަބުން އާންމުންގެ ފާޑުކިޔުން ސަރުކާރަށް ދަނީ އަމާޒު ވަމުންނެވެ. މިސްކިތް ހުޅުވާނެ ތާރީހެއް ކަނޑައަޅަން ސައުދީން ވަފުދެއް އަންނާނެ ކަމަށް މިދިޔަ މަހު ބުނި ނަމަވެސް އައިސްފައެއް ނުވެ އެވެ.
އެކަމާ ގުޅިގެން މިނިސްޓަރު ވިދާޅުވީ މިސްކިތް ހުޅުވަން ސައުދީގެ އޮފިޝަލުންގެ ވަފުދު ރާއްޖެ އައުން މިވަގުތަށް ލަސްވެފައިވާ ކަމަށާއި އައުން ލަސްވެފައިވާ ސަބަބު އެނގިވަޑައިނުގަންނަވާ ކަމަށެވެ.
މާލޭ ބޮޑުތަކުރުފާނު މަގުގެ އިރުމަތީ ފަރާތުގައި އިމާރާތްކޮށްފައިވާ ކިންގް ސަލްމާން މިސްކިތަކީ ސައޫދީ ރަސްގެފާނުގެ އެހީގައި އިމާރާތްކޮށްފައިވާ މިސްކިތެކެވެ.
ތުރުކީގެ ޓާމެކްސް ކުންފުންޏާއެކު ކުރީ ސަރުކާރުން އެއްބަސްވުމުގައި ސޮއިކުރީ ފެބްރުއަރީ 28، 2017 ގައެވެ. މިސްކިތުގެ މަސައްކަތުގެ އަގަކީ 24 މިލިއަން ޑޮލަރު (370 މިލިއަން ރުފިޔާ) އެވެ.
