ޕެރިސް، ފްރާންސް (ޖުލައި 14) - މޫސުމީ ބަދަލާ ދެކޮޅަށް ދުނިޔޭގެ ފެންވަރުގައި ރަނގަޅު މަސައްކަތެއް ކުރުމަށް އެމެރިކާގެ ނާސާ އާއި ޔޫރަޕުގެ ސްޕޭސް އެޖެންސީ ގުޅިއްޖެ އެވެ.
ޔޫރޮޕިއަން ސްޕޭސް އެޖެންސީ (އީއެސްއޭ) ގެ ބަޔާނެއްގައި ބުނީ މި ގުޅުމުގެ ސަބަބުން ދުނިޔެ އޮބްޒާވް ކުރާ ސެޓެލައިޓުތަކުގެ ޑޭޓާ އެންމެ އެދެވޭ ގޮތުގައި ބޭނުން ކުރެވޭނެ ކަމަށެވެ.
"ސެޓެލައިޓުތަކުގެ ޑޭޓާއިން އެންމެ ރަނގަޅު ފައިދާ ލިބިގަތުމަށް އީއެސްއޭ އާއި ނާސާއިން ވަނީ އާތު ސައިންސާއި މޫސުމީ ބަދަލާ ދެކޮޅަށް ސްޓްރެޓެޖިކް ޕާޓްނަޝިޕެއް ހަދާފައި،" އެ ތަނުން ބުންޏެވެ.
ޕާޓްނަޝިޕް ރަސްމީކޮށް ފެށީ އަންގާރަ ދުވަހު އީއެސްއޭގެ ޑިރެކްޓަރު ޖެނެރަލް ޖޯސެފް އޭޝްބެކާ އާއި ނާސާގެ އެޑްމިނިސްޓްރޭޓަރު ބިލް ނެލްސަން އެއްބަސްވުމުގައި ސޮއިކުރެއްވުމުންނެވެ.
"މީގެ މަގްސަދަކީ މޫސުމީ ބަދަލާ ދެކޮޅަށް ދުނިޔޭގެ ފެންވަރުގައި ކުރާ މަސައްކަތް ވަރުގަދަކޮށް، ދުނިޔެ އާއި ވަށައިގެންވާ މާހައުލަށް އަންނަ ބަދަލުތައް އެންމެ އަވަހަށް ދެނެގަތުން،" ބަޔާނުގައި ވެ އެވެ.
އެމެރިކާ އާއި ޔޫރަޕުގެ ޖައްވީ އިދާރާއިން މީގެ ކުރިން ވެސް ތިމާވެށީގެ ކަންކަމުގައި އެކުގައި މަސައްކަތް ކޮށްފައި ވެ އެވެ. އެގޮތުން އެންމެ ފާހަގަކުރެވެނީ "ކޮޕޭނިކަސް ސެންޓިނެލް-6" ޕްރޮގްރާމެވެ.
އެ ޕްރޮގްރާމުގެ ދަށުން ކުޑަ ވޭނެއްގެ ސައިޒު ހުންނަ ސެޓެލައިޓްތަކުން ކަނޑުގެ ލޮނުގަނޑު އުފުލޭ މިންވަރު ރިކޯޑް ކުރެ އެވެ.
"އެއްވެސް ޝައްކެއް ނެތި، މޫސުމީ ބަދަލު މޮނިޓާކޮށް މެޝާކުރުމަށް އެންމެ ރަނގަޅު ޑޭޓާ ލިބޭނީ ޖައްވުން. ގުޅިގެން މަސައްކަތް ކުރުމުން ލިބޭނެ ފައިދާ އިތުރުވާނެ،" އީއެސްއޭ އޭޝްބެކާ ވިދާޅުވި އެވެ.
އޭނާ އިތުރަށް ވިދާޅުވީ އަންނަ ނޮވެމްބަރު މަހު އޮންނަ ކޮޕް26 މޫސުމީ ކޮންފަރެންސްގައި ތިމާވެށީގެ ކަންކަމުގައި ޖައްވުން ޑޭޓާ ހޯދުމުގެ މަސައްކަތަށް އިތުރު ކުރިއެރުންތައް ލިބޭނެ ކަމަށެވެ.
