ރައްޔިތުންގެ މަޖިލީހުގެ މި އަހަރުގެ ދެވަނަ ދައުރު މިދިޔަ ބުރާސްފަތި ދުވަހު ނިންމާލިއިރު، ހުށަހެޅިފައިވާ މަސައްކަތްތަކުގެ ތެރެއިން ނިމިފައިވަނީ 39 ޕަސަންޓު ކަމަށް މަޖިލީހުގެ އިދާރާއިން ބުނެފި އެވެ.
އެ އިދާރާއިން މިއަދު އާންމުކުރި ތަފާސްހިސާބުތަކަށް ބަލާއިރު، ކުރީ ދައުރުގައި ނުނިމި ހުރި 25 ބިލަކާއި މި ދައުރުގައި ހުށަހެޅުނު 16 ބިލަކާއެކު ޖުމްލަ 41 ބިލެއްގެ މަސައްކަތް ކުރެވުނުއިރު، މި ދައުރުގެ ތެރޭގައި ނިންމިފައިވަނީ ނުވަ ބިލެއްގެ މަސައްކަތެވެ.
އެ ނުވަ ބިލުގެ ތެރޭގައި ގެމަނަފުށި ދާއިރާގެ މެންބަރު އަހުމަދު ސައީދު ހުށަހަޅުއްވައި، އަނބުރާ ނެންގެވި ދެ ބިލެއް ވެސް ހިމެނެ އެވެ.
އޭގެ ތެރޭގައި 2019 ވަނަ އަހަރުން ފެށިގެން މަސައްކަތް ކުރަމުން އައި، ރާއްޖޭގެ އެއާޕޯޓަކުން ބޭރަށް ފުރާ ފަސިންޖަރުންގެ އަތުން ޓެކްސްއާއި ފީތައް ބޮޑުކުރަން ހުށަހެޅި ބިލާއި، އާމްދަނީން ޓެކްސް ނެގުމުގެ ގާނޫނު އިސްލާހުކުރަން ހުށަހެޅި ބިލު ފާހަގަކޮށްލެވެ އެވެ.
ފުރަތަމަ ދައުރު ނުނިމިހުރި ނުވަ ގަރާރަކައި ދެވަނަ ދައުރުގައި ހުށަހެޅުނު ދެ ގަރާރެއްގެ ތެރެއިން ފާސް ކޮށްފައިވަނީ އެންމެ ގަރާރެކެވެ.
ވަޒީރުންނާއި ސުވާލުކުރުމުގެ ބައިން ވެސް މި ދައުރުގެ ތެރޭގައި ކުރެވުނު މަސައްކަތް މަދެވެ. އެގޮތުން، ކުރީ ދައުރުން ވާރުތަވި ސުވާލުތަކާއެކު ޖުމްލަ 14 ސުވާލެއްގެ ތެރެއިން، ނިންމިފައިވަނީ ހަ ސުވާލެވެ.
ނަވާރަ ވަނަ މަޖިލީހުގެ ކޮންމެ ދައުރެއްގައި ކުރެވޭ މަސައްކަތްތަކުގެ ނިސްބަތް އެވަރެޖުކޮށް 60 ޕަސަންޓަށް ވުރެ މަތީގައި ހުންނައިރު، މި އަހަރުގެ ދެވަނަ ދައުރުގެ މަސައްކަތް ކުރިއަށް ގެންދަންޖެހުނީ، މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓު ހަމަލާއަށްފަހު އެވެ.
ހަމަލާގައި ލިބިވަޑައިގެންނެވި ޒަހަމްތަކަށް ފަރުވާ ހޯއްދަވަން ރާއްޖޭން ބޭރުގައި ހުންނެވުވުމުގެ ސަބަބުން ނަޝީދަށް ދެވަނަ ދައުރުގެ އެއްވެސް ޖަލްސާއެއްގައި ބައިވެރިވެޑައި ނުގެންނެވެ އެވެ.
އެއާއެކު، މުޅި މަޖިލިސް އިގުރާރުވެގެން ރާއްޖޭގެ ތާރީހުގައި ފުރަތަމަ ފަހަރަށް ހިންގި ޕާލިމަންޓްރީ އިންކުޔަރީ އަކީ ދެވަނަ ދައުރުގެ ތެރޭގައި އެންމެ އިސްކަމެއް ދީގެން ކުރި މަސައްކަތެވެ. އެ މަސައްކަތް ނިންމަން މިދިޔަ ޖޫން މަހު ނިމެން އޮތް ދެވަނަ ދައުރު، ޖުލައި މަހުގެ އަށަކާ ހަމައަށް ދަންމައިލި އެވެ.
މަޖިލީހުގެ ސަލާމަތީ ހިދުމަތްތަކާބެހޭ (241) ކޮމިޓީން ގާތްގަނޑަކަށް ދޮޅު މަސް ދުވަހުގެ މަސައްކަތަށްފަހު އެކުލަވައިލި ރިޕޯޓު ފާސްކޮށްފައިވަނީ އެ ދުވަހުގެ ޖަލްސާ ފަތިހާ ހަމައަށް އިތުރުކޮށްގެންނެވެ.
ކޮވިޑުގެ ހަތަރު ވަނަ ރާޅާއެކު ބަލި ފެތުރުން އިންތިހާއަށް އިތުރުވުމާ ގުޅިގެން މަޖިލީހުގެ ގިނަ ޖަލްސާތަކެއް ވެސް ބާއްވަންޖެހުނީ އޮންލައިންކޮށެވެ.
ދިރާސީ އާ އަހަރަށް ދާދިފަހުން ގެނައި ބަދަލާ އެއްގޮތް ކުރަން މަޖިލިސް ޗުއްޓީއަށް ދާ ދުވަސްތައް ވެސް ބަދަލުކުރުމާ ގުޅިގެން، މަޖިލީހުގެ ތިން ވަނަ ދައުރު ފެށޭނީ އަންނަ މަހުގެ 16 ވަނަ ދުވަހެވެ.
