ރައީސް އިބްރާހިމް މުހައްމަދު ސޯލިހާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ސިޔާސީ ކޯޅުމުގެ ތެރެއަށް އިދިކޮޅު ކޯލިޝަނުން ވަންނަން ބޭނުންނުވާ ކަމަށާއި ރައީސް އަބްދުﷲ ޔާމީން، ނަޝީދާއެކު މަސައްކަތް ކުރައްވާނެ ކަމަށް ގަބޫލު ނުކުރައްވާ ކަމަށް ޕީޕީއެމްގެ ވަގުތީ ލީޑަރު އަބްދުއްރަހީމް އަބްދުﷲ މިރޭ ވިދާޅުވެއްޖެ އެވެ.
ކުރީގެ ރައީސް ނަޝީދާއެކު ކުރީގެ ރައީސް ޔާމީން މަސައްކަތް ނުކުރައްވާނެ ކަމަށް އަބްދުއްރަހީމް ވިދާޅުވެފައި މި ވަނީ، ސިޔާސީ ގޮތުން ރައީސް ސޯލިހާ ދެކޮޅަށް މަސައްކަތް ކުރައްވާނެ ކަމަށް ވެރިކަން ހިންގާ އެމްޑީޕީގެ އެތެރޭގެ ވަޓްސްއަޕް ގްރޫޕެއްގައި ނަޝީދު ވިދާޅުވެފައި އޮއްވަ އެވެ.
މެދުމިނުގެ ދީނީ ސިޔާސަތެއް ގެންގުޅޭނަމަ ރައީސް ޔާމީން އަދި ޕީޕީއެމްގެ އެހީއަށް އެދިވަޑައިގަންނަވާނެ ކަމަށް ވެސް ނަޝީދު ފޮނުއްވި މެސެޖުތަކުގައި ލިޔުއްވާފައިވެ އެވެ.
އެކަމާ ގުޅޭގޮތުން "އަދަދު" އިން ސުވާލު ކުރުމުން އަބްދުރަހީމް ވިދާޅުވީ ޔާމީންއަކީ ސިއްރުން އެއްވެސް ޑީލެއް ހައްދަވާނެ ބޭފުޅެއް ނޫން ކަމަށާއި ނަޝީދާއެކު އެއްވެސް ޑީލެއް ހައްދަވާފާނެ ކަމަށް އޭނާއަށް ގަބޫލުނުކުރެއްވޭ ކަމަށެވެ.
"ރައީސް ސޯލިހާއި ރައީސް ނަޝީދާ ތަޅާތެޅުމެއްގެ ތެރެއިން އެއަށް ޖަވާބު ދީ އޭގެ ތެރޭގައި ތާށިވާކަށް އަޅުގަނޑުމެން ނެތިން،" އަބްދުއްރަހީމް ވިދާޅުވި އެވެ.
މެދުމިނުގެ ދީނީ ސިޔާސަތަށް ތާއީދު ކުރާނަމަ އެހީއަށް އެދިވަޑައިގަންނަވާނެ ނަޝީދު ވިދާޅުވެފައިވާއިރު އަބްދުއްރަހީމް ވިދާޅުވީ ބޭނުން މީހެއްގެ ކައިރިން އެހީއަށް އެދުމަކީ ނަޝީދުގެ ހައްގެއް ކަމަށާއި އެކަމަކު އެމަނިކުފާނާއެކު ސިޔާސީ މަސައްކަތް ކުރަން އިދިކޮޅު ކޯލިޝަނުން ނުނިންމާ ކަމަށެވެ.
"ރައީސް ޔާމީނަކާ ނަޝީދަކާ އެއްވެސް ޑީލެއް ނެތް. އަދި އަޅުގަނޑުމެން އެއްވެސް މީހަކާއެކު ޑީލެއް ހެދުމުގެ ވިސްނުމެއް ވެސް ނެތް،" އޭނާ ވިދާޅުވި އެވެ.
ސިޔާސީ މަސައްކަތްތަކުގައި ޔާމީނާއި ޕީޕީއެމްގެ އެހީ ހޯއްދަވާނެ ކަމަށް ނަޝީދު މިއަދު ވިދާޅުވިއިރު ވެރިކަން ހިންގުން ބަރުލަމާނީ ނިޒާމަކަށް ބަދަލުކުރުމުގައި ޔާމީންގެ ތާއީދު ލިބިވަޑައިގަންނަވާނެ ކަމަށް އުއްމީދުކުރައްވާ ކަމަށް މިދިޔަ ހަފުތާގައި ނަޝީދު ވަނީ ވިދާޅުވެފަ އެވެ.
ރައީސް ސޯލިހާ ފިކުރު ދިމާނުވާ ކަމަށާއި އެކުގައި ސިޔާސީ މަސައްކަތް ނުކުރެއްވޭނެ ކަމަށް ނަޝީދު މި ވިދާޅުވީ އެމަނިކުފާނު އަވަހާރަކޮށްލަން ދިން ޓެރަރިސްޓް ހަމަލާއާ ގުޅޭ ގޮތުން ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ގުޅޭ ކޮމިޓީން ހިންގި އިންކުއަރީގައި، އެ ހަމަލާ ހިނގަން މެދުވެރިވުމުގައި ގިނަ ގޯސްތަކެއް ހެދިފައިވާކަން އާއްމުކޮށްފައި އޮއްވަ އެވެ.
އެ ރިޕޯޓުގައި ފާހަގަ ކުރި ކަންތައްތަކުގެ ތެރޭގައި ދީނީ ހައްދުފަހަނައެޅި ވިސްނުމުގެ ބަޔަކު އެމަނިކުފާނުގެ ސަލާމަތީ ކަންކަން އޮންނަ ގޮތް ބަލައި، ފާރަލައި، އިންޒާރުތަކަށް ފަހު ހަމަލާ އަމާޒުކުރިއިރު އެމްއެންޑީއެފަށް ނުހުއްޓުވުމުގެ ކަންބޮޑުވުން ފާޅުކޮށްފައިވެ އެވެ.
ނަޝީދާއި ރައީސް ސޯލިހާ ދެމެދު ސިޔާސީ ހިޔާލުތަފާތުވުން ބޮޑުވެފައިވާ ތަން ފެންނަން ފެށީ، ބަރުލަމާނީ ނިޒާމުގެ ވާހަކަތަކުންނެވެ. ނަޝީދު ވަނީ އެމަނިކުފާނު ބޮޑުވަޒީރަކަށް ވެވަޑައިގަތުމުގެ ފުރުސަތު ދެއްވަން ރައީސް ސޯލިހްގެ އަރިހުން އެދިވަޑައިގެންފަ އެވެ. އެކަމަކު ނިޒާމް ބަދަލުކުރުމަކީ ރައްޔިތުންގެ އަތްމަތީގައި އޮތް ކަމެއް ކަމަށް ތަކުރާރުކޮށް ރައީސް ސޯލިހް ވަނީ ވިދާޅުވެފަ އެވެ.
