ރާއްޖޭގައި ވަޒީފާ އަދާކުރެވޭ ނޫކަށިފުރައިގެ އުމުރުގެ މީހުންގެ ތެރެއިން، ދިވެހިންނަށް ވުރެ ބިދޭސީން ގިނަ ކަމަށް ތަފާސްހިސާބުން ދައްކައިފި އެވެ.
އިއްޔެ ފާހަގަކުރި ދުނިޔޭގެ އާބާދީގެ ދުވަހާ ގުޅިގެން ސްޓެޓިސްޓިކްސް ބިޔުރޯއިން އާންމުކޮށްފައިވާ ތަފާސްހިސާބުތައް ދައްކާ ގޮތުން، ރާއްޖޭގެ ޖުމްލަ އާބާދީގެ 568،362 ގެ ތެރެއިން 182،696 އަކީ ބިދޭސީންނެވެ.
ހިސާބުތައް ބުނާ ގޮތުން، ޖުމްލަ އާބާދީގެ 32 ޕަސަންޓަކީ ރާއްޖޭގައި ދިރިއުޅެމުންދާ ބިދޭސީންނެވެ.
އެގޮތުން ބަލާއިރު، ވަޒީފާ އަދާކުރާ އުމުރު ފުރައިގެ ތެރެއިން 20 އަހަރާއި 44 އަހަރާ ދެމެދު ދިވެހިންނަށް ވުރެ ބިދޭސީން ގިނަ ކަމަށް ބުނެފައި ވެ އެވެ.
"އެއީ އެ އުމުރު ފުރައިގެ ބިދޭސީ ފިރިހެނުން ގިނަ ކަމުން،" ސްޓެޓިސްޓިކްސް ބިޔުރޯއިން ބުންޏެވެ.
ބިދޭސީން މަސައްކަތްކުރާ ދާއިރާތަކަށް ބަލާއިރު، 38 ޕަސެންޓް މީހުން މަސައްކަތް ކުރަނީ ކޮންސްޓްރަކްޝަން ދާއިރާގަ އެވެ. ބިދޭސީން ދެން އެންމެ ގިނައީ ފަތުރުވެރިކަމުގެ ސިނާއަތުގަ އެވެ. އެއީ ރާއްޖޭގައި ދިރިއުޅޭ ބިދޭސީންގެ 18 ޕަސަންޓެވެ.
އާބާދީގެ ބޮޑު ބައި މާލޭގައި
ރާއްޖޭގެ އަތޮޅުތަކުގެ މައްޗަށް އާބާދީ ބެހިފައިވާ ގޮތަށް ބަލާއިރު، ބޮޑު ބައެއް އަދިވެސް ދިރިއުޅެނީ ވެރި ރަށް މާލޭގަ އެވެ. އެގޮތުން، ދިވެހިންނާއި ބިދޭސީން ހިމެނޭ ގޮތަށް މާލޭގެ އާބާދީއަކީ 234،454 އެވެ. އެއީ ޖުމްލަ އާބާދީގެ 41.3 ޕަސަންޓެވެ.
ދެވަނަ އަށް އެންމެ ގިނަ މީހުން ދިރިއުޅެނީ އދ. އަތޮޅުގަ އެވެ. އެ އަތޮޅުގައި 20،639 މީހުން ދިރިއުޅޭކަމަށް ތަފާސްހިސާބުތަކުން ދައްކަ އެވެ.
ރާއްޖޭގެ ޖުމްލަ އާބާދީގެ 23 ޕަސަންޓަކީ 17 އަހަރުން ދަށުގެ ކުޑަކުދިން ކަމަށް ވެސް ބުނެފައި ވެ އެވެ. އެގޮތުން، މިއަހަރު ރާއްޖޭގެ ކުޑަކުދިންގެ އާބާދީއަކީ 128،635 އެވެ.
އުމުރުން ދުވަސްވީ މީހުންގެ އާބާދީއަށް ބަލާއިރު، 65 އަހަރުން މަތީގެ މިވަގުތު 19،531 މީހުން އެބަތިއްބެވެ. އޭގެ ތެރެއިން 52 ޕަސަންޓަކީ ފިރިހެނުންނެވެ.
ނަމަވެސް، އުމުރުން 75 އަހަރާއި 79 އަހަރާ ދެމެދުގެ އާބާދީގައި އަންހެނުންގެ ނިސްބަތް ގިނަ އެވެ.
މިއީ އާބާދީގެ ނިސްބަތަށް ބަލާއިރު، ފިރިހެނުންނަށް ވުރެ އަންހެނުން ގިނަ ހަމައެކަނި ބޭންޑެވެ.
