ވެލާނާ އިންޓަނޭޝަނަލް އެއާޕޯޓަށް ފުރަންދިޔަ ޓޫރިސްޓެއްގެ އަތުން ވަޒަންތަކެއް ފެނުނު މައްސަލާގައި އޭނާ އިއްޔެ ހައްޔަރުކޮށް ބަންދު ޖަހައިފި އެވެ.
ވަޒަންތަކެއް ފެނުނީ މިދިޔަ ހޮނިހިރު ދުވަހު ހެނދުނު އެއާޕޯޓަށް ދިޔަ ޓޫރިސްޓެއްގެ ދަބަހުންނެވެ. އެ ވަޒަންތައް ފެނުމާއެކު އޭނާ ސުވާލުކޮށް، ފުލުހުންގެ ބެލުމުގެ ދަށަށް ގެންދިޔަ އެވެ.
އެއީ، އެފެރިކާގެ ގައުމެއް ކަމަށްވާ ނެމީބިއާއަށް ނިސްބަތްވާ 60 އަހަރުގެ ފިރިހެނެކެވެ.
ފުލުހުންގެ މީޑިއާ އޮފިޝަލް ވިދާޅުވި ގޮތުގައި، ތަހުގީގުގެ ބޭނުމަށް އޭނާގެ ބަންދަށް ތިން ދުވަސް އިއްޔެ ވަނީ ކޯޓުން ޖަހައިދީފަ އެވެ.
އެއާޕޯޓަށް ދިޔަ ޓޫރިސްޓެއް އަތުން ވަޒަންތަކެއް މި ފެނުނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ހަމަލާއަށްފަހު އެއާޕޯޓްގެ ސެކިއުރިޓީ ވަރުގަދަކޮށްފައިވަނިކޮށެވެ.
ވަޒަންތައް ފެނުނީ ރާއްޖެއިން ފުރަންވެގެން އެ ޓޫރިސްޓު އެއާޕޯޓަށް ދިޔުމުން ކަމަށްވާތީ، އޭނާ ރާއްޖެ އެތެރެވީ ވެސް ވަޒަންތަކާއެކު ކަމަށް ބެލެވެ އެވެ. ނަމަވެސް، ތަހުގީގު ނުނިމޭތީ މިކަން އަދި ސާފެއް ނޫނެވެ.
