ސީލައިފް ފްލެޓްތަކުގެ މައްސަލާގައި ހިޔާނާތްތެރިވިކަމުގެ ދައުވާ އުފުލާފައިވާ އެ ކުންފުނީގެ އެމްޑީ އަހުމަދު މޫސާ މުހައްމަދު (އަންމަޓީ) ބަންދުން ދޫކޮށްލުމަށް ކުރިމިނަލް ކޯޓުން ނެރުނު އަމުރު ބާތިލުކޮށް، އޭނާ ހައްޔަރުކުރުމަށް ހައިކޯޓުން މިއަދު ހުކުމްކޮށްފި އެވެ.
އެޗްޑީސީ އާއި ސީލައިފް ގްލޯބަލް އިންކް ޕްރައިވެޓް ލިމިޓެޑާ ދެމެދު 2015ގައި ވެފައިވާ އެއްބަސްވުމެއްގެ ދަށުން ހުޅުމާލޭގައި 3000 ހައުސިން ޔުނިޓް އެޅުމަށް، ހަވާލުކުރި އެވެ. ނަމަވެސް، އެއްބަސްވުމުގައިވާ މުއްދަތުގައި ހައުސިން ޔުނިޓްތައް އެޅުމުގެ އަމަލީ މަސައްކަތް ފުރިހަމަނުކޮށް، އެކި މީހުން އަތުން ބޮޑެތި އަދަދުތަކުން ފައިސާ ނެގި އެވެ.
އެ މައްސަލާގައި ޕްރޮސިކިއުޓާ ޖެނަރަލްގެ އޮފީހުން ވަނީ އަންމަޓީގެ މައްޗަށް ހިޔާނާތުގެ 42 ދައުވާއެއް އުފުލައިފަ އެވެ. އެއީ، އޭނާ ހިޔާނާތްތެރިވި ކޮންމެ މީހެއްގެ މައްސަލަ ވަކިންނެވެ.
އަންމަޓީ ތަހުގީގަށް ރާއްޖެ ގެނައި ލަންކާގައި އުޅެނިކޮށެވެ. ލަންކާއިން އަންމަޓީ ގެނައި ފަހުން އޭނާ ބަންދުގައި ހުރިއިރު ދައުވާ އުފުލުމަށްފަހު ވެސް އޭނާގެ ބަންދަށް މުއްދަތު ޖަހަމުން ދިޔަ އެވެ.
ނަމަވެސް، މައްސަލާގައި ޝަރީއަތް ފެށުމަށް ބަންދު ރިވިއުކުރަން ބޭއްވި މަޖިލީހުގައި އަންމަޓީ ޝަރީއަތް ނިމެންދެން ބަންދުކޮށްދޭން ދައުލަތުގެ ފަރާތުން އެދިފައިވަނިކޮށް އަންމަޓީ ދޫކޮށްލުމަށް ކުރިމިނަލް ކޯޓުގެ ގާޒީ ހަސަން ސައީދު އަމުރު ނެރުއްވި އެވެ.
އެ އަމުރު، ހައިކޯޓުގައި އިސްތިއުނާފުކޮށް ޕްރޮސިކިއުޓާ ޖެނަރަލްގެ އޮފީހުން ބުނެފައިވަނީ އަންމަޓީއަކީ ތަހުގީގަށް ފިލި މީހެއް ކަމާއި ދެން ވެސް އޭނާ ފިލައިދާނެ ކަމުގެ ބިރު އެބަ އޮތް ކަމަށެވެ. އަދި އޭނާ މީގެކުރިން އަމަލުކޮށްފައިވާ ގޮތުން ހެކިންނަށް ނުފޫޒު ފޯރުވުމުގެ އިހުތިމާލު ވެސް އެބަ އޮތް ކަމަށެވެ.
ނަމަވެސް، ދައުލަތަށް ރައްދުދީ އޭނާއަކީ ފިލައިގެން އުޅޭ މީހެއް ނޫން ކަމަށާއި ތަހުގީގަށް ފުރިހަމައަށް އެއްބާރުލުންދީފައިވާ ކަމަށް އަންމަޓީ ހައިކޯޓުގެ ޝަރީއަތުގައި ވަނީ ބުނެފަ އެވެ.
