ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ގިނަ ދުވަސްތަކެއްވަންދެން ކެބިނެޓްގައި މަސައްކަތް ކުރެއްވި އަބްދުﷲ ކަމާލުއްދީން، އަމިއްލަ ސިޔާސީ ޕާޓީއެއް އުފެއްދެވުމުގެ މަސައްކަތް ފައްޓަވައިފި އެވެ.
ކުރިން ރައްޔިތުންގެ މަޖިލީހުގެ މެންބަރުކަން ވެސް ކުރެއްވި ކަމާލުއްދީން ވަރަށް ފަހަކަށް ޖެހެންދެން ވެސް ހުންނެވީ މައުމޫންގެ އެމްއާރްއެމްގަ އެވެ. އެ ޕާޓީން ވަކިވެވަޑައިގަތީ ގައުމުގައި ހައްލުކުރަން ޖެހޭ ގިނަ ކަންތައްތަކެއް އެބަހުރި ކަމަށް ވިދާޅުވެ، އެ ޕާޓީން ތެރޭން އެކަން ހާސިލުވާނެ ކަމަށް ނުފެންނާތީ އެވެ.
އެމްއާރްއެމްއިން ވަކިވެވަޑައިގެންނެވުމުން، ކަމާލުއްދީންގެ ހިދުމަތަށް މައުމޫން ޝުކުރުއަދާކުރެއްވި އެވެ. އެމްއާރްއެމްގެ ސްލޮޓެއްގައި އެންމެފަހުން ބޭއްވި މަޖިލިސް އިންތިހާބުގައި ފޮނަދޫ ދާއިރާއަށް ވާދަކުރެއްވި ނަމަވެސް، ކާމިޔާބެއް ނުވި އެވެ.
މައުމޫންގެ ވެރިކަން ނިމުމުން، ކަމާލުއްދީން ގުޅިވަޑައިގެންނެވީ ޖުމްހޫރީ ޕާޓީއާ އެވެ. އެ ޕާޓީގެ ނައިބު ލީޑަރެއްގެ ގޮތުގައި ގިނަ ދުވަސްތަކެއްވަންދެން މަސައްކަތް ކުރެއްވި އެވެ. އެ ޕާޓީން ކަމާލުއްދީން ވަކިވެވަޑައިގެންނެވީ ނައިބު ލީޑަރު މަގާމުގެ އިތުރު ދައުރަކަށް ކުރިމަތިލައްވައި، ލިބުނު ނާކާމިޔާބީއާއެކު އެވެ.
ކަމާލުއްދީން މިއަދު ވިދާޅުވި ގޮތުގައި، ގާނޫނު އަސާސީގެ ދަށުން ރައްޔިތުން ބާރުވެރިކުރެވި ދައުލަތުގެ ބާރުތައް ވަކި ކުރެވިގެން ދިޔުމާއެކު ވެސް، ގައުމުގައި ހައްލު ނުކުރެވިހުރި އެތައްކެއް މައްސަލަތަކެއް އެބަހުއްޓެވެ.
"އިސްލާމްދީނަށް ނަސްރުދީ، ގައުމުގެ ސިޔާދަތު ދަމަހައްޓައި ރައްޔިތުންގެ ފުރުދީ ގޮތުން ބާރުވެރިކުރުމަށާއި ގައުމުގެ އިޖުތިމާއީ ދުޅަހެޔޮކަން ވަރުގަދަކުރުމަށް އާ ސިޔާސީ ފަލްސާއެއް ވުޖޫދުވާން ޖެހޭ،" ކަމާލުއްދީން ވިދާޅުވި އެވެ.
އެހެންވެ، "ގައުމީ އެއްބައިވަންތަކަމުގެ ޕާޓީ"ގެ ނަމުގައި އޭނާއާ އެއް ހިޔާލެއްގައި އެއް މަގުސަދެއްގައި މަސައްކަތް ކުރާނެ ބޭފުޅުންނާއެކު ޕާޓީ ރަޖިސްޓްރީކުރުމަށް ހުށަހަޅާފައިވާ ކަމަށް ވިދާޅުވި އެވެ.
ކަމާލުއްދީން އާ ސިޔާސީ ޕާޓީއެއް އުފައްދަވަން މަސައްކަތް ފެއްޓެވިއިރު، ދަނގެތީ ދާއިރާގެ މެންބަރު މުހައްމަދު ނާޒިމް އިސްވެ ހުންނަވައި އާ ސިޔާސީ ޕާޓީއެއް އުފެއްދެވުމުގެ މަސައްކަތް ވެސް ވަނީ ފައްޓަވާފަ އެވެ.
އާ ދެ ޕާޓީ އުފެއްދުމުގެ މަސައްކަތް ކުރަމުން އަންނައިރު ޕާޓީތައް އުފެއްދުމަށް އިލެކްޝަން ކޮމިޝަނުން މިފަހުން ވަނީ ކޮވިޑާ ގުޅިގެން ލުޔެއް ދީފަ އެވެ.
އެގޮތުން ސިޔާސީ ޕާޓީއެއް އުފައްދަން ހުއްދަދޭތާ 90 ދުވަހުގެ ތެރޭ 3000 މެންބަރުން ހަމަކޮށް އިލެކްޝަން ކޮމިޝަނަށް ހުށަހަޅަން ޖެހެ އެވެ. ނަމަވެސް، މިހާރު ކޮމިޝަނުން ވަނީ އެ މުއްދަތު ސަސްޕެންޑްކޮށް، ސިއްހީ ކުއްލި ނުރައްކަލުގެ ހާލަތު އިއުލާންކޮށްފައި އޮންނައިރު މުއްދަތު ނުގުނާ ގޮތަށް ނިންމާފަ އެވެ.
