ރައީސް އިބްރާހިމް މުހައްމަދު ސޯލިހު ދިރިއުޅުއްވާ ރިޔާސީ ގެކޮޅު ކަމަށްވާ، މުލިއާގެ ކައިރިއަށް ގޮސް ބޮމެއް އޮތް ކަމަށް ބުނެ އިންޒާރު ދިން ދެ މީހަކު މިއަދު ހައްޔަރުކޮށްފި އެވެ.
"އަދަދު"އަށް އެނގިފައިވާ ގޮތުގައި މުލިއާގެ ކައިރިން ދެ މީހުން ދިޔައީ ދަބަހަކާއި ރަތްކުލައިގެ ކޮތަޅެއް އަދި ކަރުދާސް ފޮއްޓެއް ހިފައިގެންނެވެ. އެމީހުން އިންޒާރު ދީފައިވަނީ ގެންގުޅުނު ފޮށިގަނޑު ތެރޭ ބޮމެއް އޮތް ކަމަށް ބުނެ އެވެ.
އެކަމާ ގުޅިގެން މުލިއާގެ ސެކިއުރިޓީން އެ ދެ މީހުން ހިފެހެއްޓި އެވެ. އޭގެފަހުން، ފުލުހުންގެ ހާއްސަ ޓީމެއް އެ ސަރަހައްދަށް ގޮސް އެމީހުން ގެންގުޅުނު ތަކެތި ބެލުމަށްފަހު ހައްޔަރުކޮށްގެން ވަނީ ގެންގޮސްފަ އެވެ.
ބޮމެއްގެ އިންޒާރު ދީގެން ހައްޔަރުކޮށްފައިވަނީ ދިވެހި ދެ ފިރިހެނުންނެވެ.
އެމީހުން ގެންގުޅުނު ބުނާ ސާމާނު -- ފޮޓޯ: އަދަދު
ފުލުހުންގެ މީޑިއާ އޮފިޝަލް ވިދާޅުވި ގޮތުގައި، މުލިއާގެ ކައިރިން ދިޔަ އެ ދެ މީހުން ހައްޔަރުކޮށްފައިވަނީ އެމީހުން ގެންގުޅުނު ފޮށިގަނޑުގެ ތެރޭގައި ބޮމެއް އޮތް ކަމަށް ބުނުންނެވެ.
އެ ސަރަހައްދުގައި ފުލުހުންނާއި ސިފައިން އަންނަނީ ހަރަކާތްތެރިވަމުންނެވެ.
މިކަން ހިނގާފައިމިވަނީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް އެމަނިކުފާނުގެ ގެކޮޅު ކައިރީގައި ދިން ހަމަލާއަށްފަހު މުލިއާގެ ސެކިއުރިޓީ ވެސް ވަރުގަދަކޮށްފައިވަނިކޮށެވެ.
އެ ހަމަލާއަށްފަހު ފުލުހުންނާއި ސިފައިން ޓެރަރިޒަމްއާ ދެކޮޅަށް ބޮޑު އޮޕަރޭޝަނެއް ހިންގައި، މާލެ، ހުޅުމާލެ އަދި އައްޑޫ ސިޓީން މީހުން ހައްޔަރުކުރި އެވެ.
ނަޝީދަށް ދިން ހަމަލާއާ ގުޅިގެން ރައްޔިތުންގެ މަޖިލީހުން އެކުލަވާލި އިންކުއަރީ ރިޕޯޓުން ހާމަވާ ގޮތުގައި އެމަނިކުފާނަށް ސެކިއުރިޓީ ފޯރުކޮށްދިނުމުގައި ބޮޑެތި އިހުމާލުތަކެއް އެބަ ހުއްޓެވެ. އެމަނިކުފާނަށް އެކި ފަހަރު މަތިން ހަމަލާ ދިނުމަށް ފާރަލަމުން ދިޔަކަން ވެސް ރިޕޯޓުން އެނގެން އެބަ އޮތެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ވެސް މުލިއާގެ ކައިރިން ބޮމެއް ފެނިގެން ފުލުހުންނާއި ސިފައިން އޮޕަރޭޝަނެއް ހިންގި އެވެ. އެ މައްސަލާގައި ބަޔަކު ހައްޔަރުކޮށް ދައުވާ ވެސް ކުރި އެވެ. ނަމަވެސް، އެ އޮޕަރޭޝަނުގައި ވެސް ފުލުހުންނާއި ސިފައިން އަމަލުކުރި ދޯހަޅި އެތައް ކަމެއް ސުޕްރީމް ކޯޓުން މިފަހުން ފާހަގަކޮށްފައިވެ އެވެ.
