ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާގެ ކުރިން އެމަނިކުފާނުގެ ސެކިއުރިޓީ އޮންނަ ގޮތް ހައްދުފަހަނައެޅި ފިކުރުގެ ބަޔަކު އެސެސްކުރާ ކަމުގެ މައުލޫމާތު އެމްއެންޑީއެފަށް ލިބިފައި އޮތް ކަމަށް ރައްޔިތުންގެ މަޖިލީހުން މިއަދު ނެރުނު ޕާލިމަންޓަރީ އިންކުއަރީ ރިޕޯޓުން ހާމަވެއްޖެ އެވެ.
ސައިކަލެއްގައި ބޮމެއް ހަރުކޮށްގެން ނަޝީދު އަވަހާރަކޮށްލުމަށް ހަމަލާދިނުމުގެ ތުހުމަތުވަނީ ދީނީ ގޮތުން ހަރުކަށި ފިކުރުގެ އަމަލުތަކަށް ތަބާވާ ބައެއް ކަމަށް ފުލުހުން އާއްމުކުރި މައުލޫމާތުތަކުން ބުނެފައިވެ އެވެ.
ހަމަލާ ދިނުމުގެ ކުރިން އެފަދަ ކަމެއް ކުރަން އުޅޭކަން އިންޓެލިޖެންސްއަށް އެނގިފައި ނުވާ ކަމަށް ސިފައިންނާއި ފުލުހުން ވެސް ކުރިން ބުނެފައިވެ އެވެ.
ނަޝީދު އަވަހާރަކޮށްލަން ދިން ޓެރަރިސްޓު ހަމަލާއާ ގުޅިގެން މަޖިލީހުގެ ސަލާމަތީ ހިދުމަތްތަކާބެހޭ (241) ކޮމިޓީން އެކުލަވާލި އިންކުއަރީ ރިޕޯޓުގައި ބުނެފައިވަނީ ސިފައިން ހަދާފައިވާ ތުރެޓް އެސެސްމަންޓްގެ ދެ ރިޕޯޓުން ވެސް ހަރުކަށި ފިކުރުގެ ބަޔަކު ނަޝީދުގެ ސެކިއުރިޓީ އޮންނަގޮތް ބަލަމުން ދިޔަކަން އެނގިފައިވާ ކަމަށެވެ. އެ ދެ ތުރެޓް އެސެސްމަންޓް ރިޕޯޓް ހަދާފައިވަނީ މިދިޔަ ފެބްރުއަރީ 25 އާއި މާޗް ތިން ވަނަ ދުވަހެވެ.
ނަޝީދަށް ބަޔަކު ފާރަލުމުގެ އިތުރުން ހަމަލާއެއް ދީފާނެކަން އެނގޭނެ ކަންތައްތަކެއް ފާހަގަ ވެފައި ހުރިކަން އެމްއެންޑީއެފް އަށް އެނގޭކަމަށް ވެސް ރިޕޯޓްގައި ބުނެފައިވެ އެވެ.
ރިޕޯޓްގައި ބުނެފައިވަނީ ނަޝީދަށް ހަމަލާއެއް ދިނުމަށް ފިޔަވައި، ދީނީ ހަރުކަށި ފިކުރުގެ ބައެއް އެމަނިކުފާނުގެ ސެކިއުރިޓީ އޮންނަގޮތް ބަލައި ދެނެގަތުމުގެ މަސައްކަތްކުރާނެ ސަބަބެއް ނޯންނާނެ ކަމަށެވެ.
"އެމްއެންޑީއެފް އިން ތަކުރާރުކޮށް މި އިންކުއަރީގައި ރައީސް މުހައްމަދު ނަޝީދަށް އެއްވެސް ހަމަލާ އެއް ދޭން އުޅޭކަމުގެ ސްޕެސިފިކް މައުލޫމާތެއް ލިބިފައި ނުވާ ކަމަށް ބުނި ނަމަވެސް، މި އެސަސްމަންޓް ރިޕޯޓުގައި އެގޮތަށް އޮތުން އެއީ ރައީސް މުހައްމަދު ނަޝީދަށް ހަމަލާ އެއް ދޭން ބަޔަކު ރާވާކަން "ފްލޭގް'' ވާންޖެހޭ، އަދި ''ފްލޭގް'' ވެފައިވާ ކަމެއް ކަމަށް ގަބޫލުކުރެވެ އެވެ.،" ރިޕޯޓްގައިވެ އެވެ.
ސިފައިން ހެދި ތްރެޓް އެސެސްމަންޓްގެ ރެކޮމެންޑޭޝަންގައި ފާހަގަކޮށްފައި ހުރި ހުރިހާ މައިގަނޑު ކަންތައްތަކަކީ އެއްޗެއް ގޮއްވާ ލައިގެން ހަމަލާ އެއް ދިނުމުގެ ފުރުސަތު ކުޑަކުރުމަށް ދީފައިވާ ރެކޮމެންޑޭޝަންސްކަން ވެސް ރިޕޯޓްގައި ފާހަގަ ކޮށްފައިވެ އެވެ.
ހަމަލާގެ ތަހުގީގާ ގުޅޭ ގޮތުން އެންމެ ފަހުން އާންމުކުރި މައުލޫމާތަށް ބަލާއިރު ޓެރަރިސްޓް ހަމަލާއާ ގުޅިގެން އަށް މީހެއްގެ މައްޗަށް ގެންދަނީ ތަހުގީގު ހިންގަމުންނެވެ. އޭގެ ތެރެއިން ފުލުހުން ވަނަވަރު ހާމަކޮށްފައިވާ މީހުންނަކީ، އަދުހަމް އަހުމަދާއި މުޖާޒް އަހުމަދާއި ތަހުމީން އަހުމަދު އާއި އަހުމަދު ފާތިހު އަދި އަލީ ހައިޝަމް އެވެ. އެމީހުން ތިބީ ބަންދުގަ އެވެ.
ނަޝީދަށް އަމާޒުކޮށް ދިން ހަމަލާއަށްފަހު ހިންގި އޮޕަރޭޝަނުގައި މާލެ، ހުޅުމާލެ އަދި އައްޑޫން ބަޔަކު ހައްޔަރުކުރި އެވެ.
