ކޮވިޑް-19ގެ ހާލަތު ގޯސްވާތީ މީގެ ދެ މަހެއްހާ ދުވަސް ކުރިން ކުޅިވަރުގެ ހަރަކާތްތައް މެދުކަނޑާލުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އެންގި އެންގުން އުވާލައި، ކުޅިވަރު ކުޅެން މިއަދު ހުއްދަދީފި އެވެ.
މުޅި ރާއްޖޭގައި ހާއްސަކޮށް މާލެ ސަރަހައްދުގައި ކޮވިޑް-19ގެ ހާލަތް ވަރަށް ބޮޑަށް ގޯސްވުމުން މިދިޔަ މެއި މަހު ތިން ވަަނަ ދުވަހުން ފެށިގެން ހާއްސަ ހުއްދައެއް ދީފައިވާ މުބާރާތެއް މެނުވީ ނުބާއްވަން އެޗްޕީއޭ އިން އަންގައިފަ އެވެ. އޭރު ހާއްސަ ހުއްދައެއް ދީފައި އޮތީ މެއި މަހު މާލޭގައި ކުޅެން ހަމަޖެހިފައި އޮތް އޭއެފްސީ ކަޕް ދެކުނު އޭޝިއާ ގްރޫޕްގެ މެޗުތަކަށެވެ. އެކަމަކު ފަހުން އެ މުބާރާތުގެ މެޗުތައް ވެސް ނުބާްއްވައި ވަނީ ފަސްކޮށްފަ އެވެ.
ރައީސް އޮފީހުގައި ކުރިއަށްދާ ނޫސްވެރިންގެ ބައްދަލުވުމުގައި ސަރުކާރުގެ ތަރުޖަމާން މުހައްމަދު މަބްރޫކް އަޒީޒް ވިދާޅުވީ ކުޅިވަރުތަކަށް މިއަދުން ފެށިގެން ލުއި ދޭން ނިންމާފައިވާ ކަމަށެެވެ.
"ހުރިހާ ކުޅިވަރެއް ކުޅެން މިހާރު އަދި ކަސްރަތު ކުރަން ހުރި ރެސްޓްރިކްޝަންތައް އުވާލައި ކުޅިވަރު ކުޅެން ހުއްދަދިނުމަށް ވަނީ ނިންމާފައި. އެހެން ނަމަވެސް ކުޅިވަރު މުބާރާތްތައް ބޭއްވުމަށް އަދި ހުއްދައެއް ނުދެވޭ،" މަބްރޫކް ވިދާޅުވި އެވެ.
ކުޅިވަރު ހަރަކާތްތައް މެދުކަނޑާލަން އެޗްޕީއޭ އިން އެންގި އެންގުމާ އެކު ފުޓްބޯޅަ ސީޒަން ކުރިއަށް ނުގެންދެވިގެން ވަނީ އަވަހަށް ސީޒަން ނިންމާލައިފަ އެވެ. އެއީ ސީޒަންގެ ފަހު ދެ މުބާރާތް ކަމަށްވާ އެފްއޭ ކަޕާއި ޕްރެޒިޑެންޓްސް ކަޕް ކެންސަލްކޮށްފަ އެވެ. އެކަމަކު، އެފްއޭއެމުން ވަނީ ފުރުސަތު ލިިބުނުހާ އަވަަހަކަށް ތިން ވަނަ ޑިވިޝަން ފަށަން ނިންމައިފަ އެވެ.
އެހެން ކުޅިވަރު ހަރަކާތްތަކަށް ބަލާއިރު، އަންނަ މަހު މާލޭގައި ބާއްވަން ނިންމި ޓީޓީ ބައިނަލްއަގުވާމީ ދެ މުބާރާތް އަންނަ އަހަރަށް ފަސްކުރަން މަސައްކަތް ކުރަމުން އަންނަ ކަމަށް ޓީޓީ އެސޯސިއޭޝަނުން ވަނީ ބުނެފަ އެވެ. އެއީ މިދިޔަ ދެ މަހެއްހާ ދުވަހު ފަރިތަކުރުން ފުރުސަތެއް ލިބިފައި ނެތުމާ އެކު އެވެ.
މީގެ އިތުރުން މި މަހު ފަށާ އޮލިމްޕިކްސްގައި ވާދަކުރާ ރާއްޖޭގެ އެތުލީޓުންނަށް މުބާރާތަށް ތައްޔާރުވުމުގައި ދަތިތަކެއް ދިމާވީ ކަނޑައަޅާފައިވާ އުސޫލުގެ ތެރެއިން މިދިޔަ ދެ މަހެއްހާ ދުވަހު ޓްރެއިނިން ކުރިއަށްގެންްދަން ފުރުސަތެއް ނެތުމުންނެވެ. އޮލިމްޕިކްސް އަށް މިހާރު ދެ ހަފްތާ އަށް ވުރެ ކުޑަ މުއްދަތެއް އޮތްއިރު، މިއަދު މި ދިން ލުއިތަކުގެ ސަބަބުން މާލޭގައި އެތުލީޓުންނަށް ގަވާއިދުން ޓްރެއިނިންތައް ގެންދެވޭނެ އެވެ.
