މުއައްސަސާތަކާއި އެކި މީހުންގެ ނަމުގައި ނަސާރާ ދީނުގެ ލިއުންތަކެއް ރާއްޖެ ފޮނުވަމުންދާ މައްސަލަ މޯލްޑިވްސް ކަސްޓަމްސް އިން ބަލަން ފަށައިފި އެވެ.
ކަސްޓަމްސް އިން މިއަދު ނެރުނު ނޫސްބަޔާނެއްގައި ބުނިގޮތުގައި ޕޯސްޓުގެ ޒަރިއްޔާ އިން ރާއްޖެއަށް އެތެރެކުރާ ލިޔެކިޔުންތައް ބަލައި ފާސްކުރުމުގެ ތެރޭގައި ނަސާރާދީނުގެ މައުލޫމާތު ދިވެހި ބަހުން ލިއެފައި ހުންނަ ލިއުންތަކެއް މިފަހަކަށް އައިސް ދަނީ ފެންނަމުންނެވެ. މި ލިއުންތައް ހުންނަނީ ސިޓީއުރަތަކުގައި އެކި މުއައްސަސާތަކާއި ވިޔަފާރި ކުންފުނިތަކާއި މީހުންގެ ނަންތައް ޖަހާފައި ކަމަށް ވެސް ކަސްޓަމްސް އިން ބުންޏެވެ.
"އެހެން ނަމަވެސް މިިހާތަނަށް ކަސްޓަމްސް އިން ބެލިބެލުމުން މިކަމަކީ އެ ލިއުންތައް އެޑްރެސްކޮށްފައިވާ ފަރާތްތަކަށް އެނގުމަކާ ނުލައި އޮޅުވާލުމެއްގެ ތެރެއިން ކުރަމުންދާ ކަމެއްގެ ގޮތުގައި ބެލެވެ އެވެ،" ބަޔާނުގައި ބުންޏެވެ.
އެތަނުން ބުނިގޮތުގައި އެފަދަ ތަކެތި ރާއްޖެ އެތެރެވިޔަ ނުދީ ކަސްޓަމްސް އިން ދަނީ ހިފަހައްޓަމުންނެވެ. އަދި މިކަމުގައި އަމަލީ ގޮތުން ބައިވެރިވާ ފަރާތްތައް ހޯދަން ވެސް މަސައްކަތް ކުރަމުން އަންނަ ކަމަށް ކަސްޓަމްސް އިން ބުންޏެވެ.
އިސްލާމްދީން ފިޔަވައި އެހެން ދީންތަކުގެ ފޮތްތައް ރާއްޖެ ގެނައުމާއި އިޝްތިހާރުކުރުމާއި ދިވެހިންނަށް ދެއްކުމާއި އެފަދަ ފޮތްތަކުގެ މައުރަޒް ބޭއްވުން ފަދަ ކަންކަމަކީ ދީނީ އެއްބައިވަންތަކަން ހިމާޔަތްކުރުމުގެ ގާނޫނުގެ ދަށުން މަނާ ކަންކަމެވެ. އަދި ރާއްޖެ ގެނައުން މަނާތަކެތީގެ ގާނޫނުގައި ވެސް އިސްލާމްދީނުގެ އަސްލުތަކާ ހިލާފުވާހަކަ ލިއެފައި ހުންނަ ނުވަތަ އެފަދަ ކުރެހުން ހުންނަ ފޮތްތައް އެތެރެކުރުން މަނަލެވެ.
