މި އަހަރުގެ މިހާތަނަށް ރާއްޖޭގެ ކުޅިވަރު އެސޯސިއޭޝަންތަކުގެ ތެރެއިން ކުޅިވަރު ހަރަކާތްތަކެއް ބޭއްވިފައިވަނީ މަދު އެސޯސިއޭޝަންތަކަކަށެވެ. އޭގެ ތެރެއިން ގިނަ ހަރަކާތްތައް ބޭއްވި އެސޯސިއޭޝަަނަކަށްވާނީ ޓޭބަލް ޓެނިސް އެސޯސިއޭޝަން އޮފް މޯލްޑިވްސް (ޓީޓީއޭއެމް) އެވެ. މި ކަހަލަ އުނދަގޫ ވަގުތެއްގައި ވެސް ޓީޓީއޭއެމްގެ މަސައްކަތް ރަނގަޅުވުމުން ދުނިޔޭގެ ޓޭބަލް ޓެނިސް ފެޑެރޭޝަން (އައިޓީޓީއެފް) އިން ވަނީ އެކަން ފާހަގަކޮށްފަ އެވެ.
ޓޭބަލް ޓެނިސް އެސޯސިއޭޝަނުން މި އަހަރުގެ މިހާތަނަށް ބާއްވާފައިވާ ތިން އިވެންޓަކީ ޖެނުއަރީ މަހު ކުރިއަށް ގެންދިޔަ ނެޝަނަލް ރޭންކިން މެޗުތަކާއި އޭޕްރީލް މަހު ދުނިޔޭގެ ޓޭބަލް ޓެނިސް ދުވަސް ފާހަގަކުރަން ކުރިއަށް ގެންދިޔަ ހަރަކާތުގެ އިތުރުން ރޯދަ މަހަށް ހާއްސަ ކޮށްގެން ބޭއްވި މުބާރާތެވެ.
ޓީޓީ އެސޯސިއޭޝަންގެ ރައީސް އަލީ ރަޝީދު (އައްޔަ)، އައިޓީޓީއެފްގެ ރަސްމީ ވެބްސައިޓަށް ދެއްވި އިންޓަވިއުއެއްގައި ވިދާޅުވީ ރާއްޖެ އަކީ އޭޝިއާ އަށް ބަލާއިރު ކޮވިޑްގެ ހާލަތު އެންމެ ބޮޑަށް ގޯސްވި އެއް ގައުމަށް ކަމަށެވެ. އަދި ޕޮޒިޓިވްވި ކޭސްތަކުގެ އަދަދު ގިނަވުމުގެ ސަބަބުން އަޅާފައިވާ އެކި ފިޔަވަޅުތައް އަދިވެސް ދަމަހައްޓަމުން އަންނަކަން އައްޔަ ފާހަގަކުރެއްވި އެވެ.
"އެކަމަކު ވެސް އުސޫލުތަކުގެ ތެރެއިން ލިބުނު ފުރުސަތުތަކުގައި ބޭއްވުނު އިވެންޓްތަކާ މެދު ހިތްހަމަ ޖެހޭ،" އައްޔަ ވިދާޅުވި އެވެ.
ޖެނުއަރީ މަހު މުނިއުފާ ޓީޓީ ހޯލުގައި ބޭއްވިގެންދިޔަ ރޭންކިން މެޗުތަކަކީ ހަގީގަތުގައި ކުޅުންތެރިންނަށް ލިބިގެންދިޔަ ރަނގަޅު ތަޖުރިބާއެއްގެ ގޮތުގައި އައްޔަ ދެކިލައްވަ އެވެ. އެއީ އެ މެޗުތައް ބޭއްވުމުގެ އެންމެ ބޮޑު މަގުސަދަކީ ކޮންމެ އުމުރުފުރާއެއްގެ ކުޅުންތެރިން ވެސް މެޗު މާހައުލަށް ހޭނިފައި ބެހެއްޓުމުގެ ވިސްނުމުގައި ކުރި ކަމެއް ކަމަށާއި އެެކަން ހާސިލްވުމުގައި ކުރިއެރުންތަކެއް ލިބިގެންދިޔަކަން ފާހަގަކުރެވުމުންނެވެ.
ޓޭބަލް ޓެނިސް ދުވަސް ފާހަގަކުރުމުގެ ހަރަކާތްތަކާއި ސްކޫލްތަކާ ގުޅިގެން ޔޫތު ޑިިވެލޮޕްމަންޓްގެ މަސައްކަތް ވެސް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ޕްރޮޓޮކޯލާ އެއްގޮތަށް ޓީޓީ އެސޯސިއޭޝަނުން ކުރިއަށް ގެންދިޔަ އެވެ. މީގެ އިތުރުން ރޯދަ މަހު ބޭއްވި މުބާރާތުގައި ކުރީގެ ކުޅުންތެރިންނާއި މިހާރުގެ ކުޅުންތެރިން އެކުވެގެން ރަނގަޅު މެޗުތަކެއް ކުޅެވޭނެ ގޮތަށް މުބާރާތް ރޭވިގެންދިއުމަކީ ވެސް މީގެ ފައިދާ ބޮޑު ކަމެއް ކަމަށް އައްޔަ ވިދާޅުވި އެވެ.
"މިކްސް ޓީމު އިވެންޓެއްގެ ގޮތުގައި ރޯދަ މުބާރާތް ކުރިއަށްގެންދިއުމުގެ ފައިދާ އަކީ ޒުވާން ކުޅުންތެރިންނަށް ތަފާތު ސްޓައިލްގެ ކުޅުންތެރިންނާ އެކު ކުޅެގެން ބޭނުންވާ ތަޖުރިބާ ލިބޭނެ،" އައްޔަ ވިދާޅުވި އެވެ.
ޔޫތު މިނިސްޓަރު އަހުމަދު މަހުލޫފްގެ އެއްބާރުލުމާ އެކު ގައުމީ ޓީޓީ ޓީމަށް ވަނީ ފެންވަރު ރަނގަޅު ކޯޗެއް ކަމަށްވާ ގްރީސްގެ ކޮންސްޓަންޓީނޯސް ކޮސްޓޮޕޮލޮސް ހަމަޖައްސައިފަ އެވެ. ކޮންސްޓަންޓީނޯސް އަކީ ގްރީސްގައި ޓީޓީ ކުޅުންތެރިން ކުރިއެރުވުމުގައި ގިނަ މަސައްކަތްތަކެއް ކޮށްފައިވާ ތަޖުރިބާކާރު ކޯޗެކެވެ.
ކޮންސްޓަންޓީނޯސް އެންމެ އިސް މަސައްކަތެއްގެ ގޮތުގައި ކުރާނީ ރާއްޖޭގައި އަންނަ މަހު ބާއްވަން ތާވަލުކޮށްފައިވާ ކޮމަންވެލްތު ޔޫތު ޓުއާ ޓީޓީ މުބާރާތާއި ސައުތު އޭޝިއަން ޖޫނިއާ އެންޑް ކެޑޭޓް ޓީޓީ ޗެމްޕިއަންޝިޕަށް ޖޫނިއާ ކުޅުންތެރިން ތަމްރީން ކުރުމެވެ.
"އެ ދެ މުބާރާތް ބޭއްވުމުގެ މަޝްވަރާތައް މި ދަނީ ފެޑެރޭޝަންތަކާ އެކީ ކުރަމުން،" އައްޔަ ވިދާޅުވި އެވެ.
މިދިޔަ އަހަރުގެ ސެޕްޓެމްބަރު މަހު ޓީޓީ އެސޯސިއޭޝަންގެ ރައީސްކަމަށް ދެ ވަނަ ދައުރަކަށް އިންތިހާބުވެވަޑައިގަތުމަށް ފަހު އައްޔަ ވަނީ ބައިނަލްއަގުވާމީ މުބާރާތްތައް ރާއްޖޭގައި ބޭއްވުމުގެ އަމާޒުގައި ގިނަ މަސައްކަތްތަކެއް ކުރައްވާނެ ކަމަށް ވިދާޅުވެފަ އެވެ. މި އަހަރު ބޭއްވޭ ދެ މުބާރާތަކީ އޭގެ ފެށުމެކެވެ.
