ކާރެއް ބަލާފާސްކުރުމުގައި ފުލުހުން އަމަލުކޮށްފައިވާ ގޮތް ގޯސްވުމުގެ ސަބަބުން، ބަނގުރާ ގެންގުޅުނު ބަޔަކު ދޫކޮށްލަން ޖެހިއްޖެ އެވެ.
ކުރިމިނަލް ކޯޓުން އިއްޔެ ބަންދުން ދޫކޮށްލާފައިވަނީ ބަނގުރާ ގެންގުޅެ، އޭގެ ވިޔަފާރިކުރާ ކަމުގެ ތުހުމަތުގައި ހައްޔަރުކުރި ހަތަރު މީހެކެވެ. އެމީހުން ހައްޔަރުކޮށްފައިވަނީ ކާރެއް ބަލާފާސްކުރުމަށްފަހު އެވެ.
އެ ކާރު ފުލުހުން ފާސްކުރީ، ސައިކަލެއްގައި ޖެއްސުމަށްފަހު މަޑުނުކޮށް ދިޔަ ކަމުގެ ރިޕޯޓް އާންމު މީހެއްގެ ފަރާތުން ފުލުހަށް ރިޕޯޓްކުރުމުންނެވެ.
އެ ރިޕޯޓާ ގުޅިގެން ފުލުހުން ކާރު ހުއްޓުވައި ބެލިއިރު އޭގެން ބަނގުރާ ފުޅިތަކެއް ފެނިފައިވާތީ، އެ ވަގުތު އެ ކާރުގައި ތިބި ހަތަރު މީހުން ވެސް ހައްޔަރުކުރީ އެވެ.
އެމީހުންގެ ބަންދު ޖެހުމަށް އިއްޔެ ކުރިމިނަލް ކޯޓަށް ހާޒިރުކުރުމުން މައްސަލާގެ ފުލުހުންގެ އިންވެސްޓިގޭޝަން އޮފިސަރު ބުނެފައިވަނީ ކާރު މަޑުކުރުމަށް އަންގައި، ފުލުހުން ބަރުގޮނު އެޅުމުން ވެސް ކާރު ހުއްޓާފައިނުވާ ކަމަށެވެ.
ކާރު ހުއްޓުވަން މަސައްކަތްކުރީ ސައިކަލެއްގައި ޖައްސާފައި މަޑުނުކޮށް ދިޔުމުގެ ސަބަބުން ކަމުގައިވީ ނަމަވެސް، ކާރު މަޑުނުކުރުމުން އޭގައި ގާނޫނާއި ގަވައިދާ ހިލާފު އެއްޗެއް ހުރީ ކަމަށް ޝައްކު ކުރެވުނު ކަމަށް އޮފިސަރު ބުންޏެވެ.
ނަމަވެސް، ކާރުގައި ތިބި މީހުން ބުނި ގޮތުގައި، ކާރު ހުއްޓަން ނޭނގުނީ އޭގައި އަޑުގަދަކޮށް ލަވަ ޖަހާފައި ހުރުމުގެ ސަބަބުން ފުލުހުން ބަރުގޮނު އެޅިކަން ނޭނގުނީމަ އެވެ.
ކާރު މަޑުކުރުމަށްފަހު، އެ ބަލާފާސްކުރުމުން ފެނުނީ ތިން ބަނގުރާފުޅި ކަމަށް އޮފިސަރު ބުންޏެވެ.
ކުރިމިނަލް ކޯޓުން އިއްޔެ ނެރެފައިވާ އަމުރުގައި ބުނި ގޮތުގައި، ދުއްވާފައިދާ އުޅަނދެއް ފާސްކުރަން ހުއްޓުވަން ޖެހިއްޖެ ހާލަތެއްގައި އަމަލު ކުރަން ޖިނާއީ މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވައިދުގައި ބަޔާންކޮށްފައިވާ ގޮތަށް އަމަލުކުރިކަން އޮފިސަރަށް ސާފުކޮށް ނުދެވެ އެވެ.
އެ ގަވައިދުގައިވާ ގޮތުން އުޅަނދެއް ހުއްޓުވަން ޖެހިއްޖެނަމަ، އަނގަބަހުން ނުވަތަ އިޝާރާތުން ނުވަތަ އެކަމަށް ގެންގުޅޭ ބޯޑަކުން މަޑުކުރަން އެންގިދާނެ އެވެ. އެގޮތުން ވެސް މަޑުނުކޮށްފިނަމަ ވަގުތަށާއި ހާލަތަށް ބަލައި ހަތަރު ގޮތަކަށް އަމަލުކުރެވޭނެ އެވެ. އެއީ، ފަހަތުން ދިޔުމާއި ފުރޮޅު ފަޅާލުމާއި ސައިރަން އަޅައި އުޅަނދު ފަހަތުން ދިޔުން އަދި ރަޖިސްޓްރީ ނަންބަރު ނޯޓުކުރުމެވެ.
ގާޒީ އާދަމް މުހައްމަދު ނެރުއްވި އަމުރުގައި ބުނި ގޮތުގައި، ކާރު ފާސްކޮށްފައިވަނީ ސައިކަލެއްގައި ޖައްސާ މަޑުނުކޮށް ދިޔުމުގެ ސަބަބުން ކަމަށް ބުނި ނަމަވެސް، އެއީ ކާރު ބަލާ ފާސްކުރެވޭނެ ސަބަބެއް ނޫނެވެ. އަދި، އެ ކާރު މަޑުކުރުވިއިރު މަސްތުވާތަކެތީގެ އެއްވެސް ތުހުމަތެއް ނެތްކަން އޮފިސަރު ދެއްކި ވާހަކަތަކުން އެނގޭ ކަމެވެ.
ކޯޓު އަމުރެއް ނެތި އުޅަނދެއް ބަލާ ފާސްކުރެވިދާނެ ހާލަތްތަކެއް ގާނޫނުގައި އޮތް ނަމަވެސް، މި މައްސަލައަކީ އެފަދަ ހާލަތަކަށް ފެތޭ މައްސަލައެއް ނޫން ކަމަށް ފުލުހުންގެ އޮފިސަރު ވެސް ބުނެފައިވާ ކަމަށެވެ.
އުޅަނދެއް ބަލާފާސްކުރުމުގައި އަދި އުޅަނދެއް ބަލާފާސްކުރުމަށް ހުއްޓުވުމުގައި ފުލުހުން އަމަލުކުރަން ޖެހޭނެ އިޖުރާއަތްތަކެއް އޮތްއިރު، އެއަށް ފުލުހުން އަމަލުކޮށްފައިނުވާކަން ފާޅުކަން ބޮޑު ގޮތެއްގައި ފެންނަން އެބަ އޮތް ކަމަށް އުމުރުގައި ބުންޏެވެ. އެހެންވެ، މި މައްސަލާގައި ހަތަރު މީހުން ބަންދުގައި ބެހެއްޓިދާނެ ކަމަށް ނުފެންނަ ކަމަށެވެ.
މައްސަލާގައި ހައްޔަރުކުރި މީހުންގެ ކުޑަކަމުދާ ތަކެތި ޓެސްޓްކުރިއިރު ޓީއެޗްސީއަށް ޕޮޒިޓިވްވެފައިވާ ކަމަށް ލިޔެފައި އޮތް ނަމަވެސް، ކުޑަކަމުދާތަކެތި އެއްވެސް ބާވަތަކަށް ޕޮޒިޓިވްވެފައި ނެތް ކަމަށް ފުލުހުންގެ އޮފިސަރު ބަންދު މަޖިލީހުގައި ބުނެފައިވެ އެވެ.
އެހެންވެ، ގާޒީ އާދަމް މުހައްމަދު އަމުރުކޮށްފައިވަނީ ހަތަރު މީހުން ވެސް ބަންދުން ދޫކޮށްލުމަށެވެ.
