މާލެ އާއި ވިލިމާލެ އާއި ގުޅިފަޅު އަދި ތިލަފުށި ގުޅުވައިދޭ ބްރިޖް ހަވާލުކުރަން ނިންމާފައި ވަނީ އިންޑިއާގެ އެފްކޮން އިންފްރަސްޓްރަކްޗާ ލިމިޓެޑާ ކަން "އަދަދު"އަށް އެނގިއްޖެ އެވެ.
މި ސަރުކާރުގެ އެންމެ ބިޔަ މަޝްރޫއާ ގުޅޭ ގޮތުން، ރައީސް އިބްރާހިމް މުހައްމަދު ސޯލިހް އެންމެ ފަހުން ވިދާޅުވެފައި ވަނީ ބިޑުތައް އިވެލުއޭޓްކޮށް މި މަސް ނިމުމުގެ ކުރިން ބަޔަކާ ހަވާލުކުރާނެ ކަމަށެވެ. ރައީސް ވިދާޅުވި މުއްދަތު ހަމަވާއިރު، ޕްލޭނިން މިނިސްޓްރީން މި ހަފުތާގައި ބުނެފައި ވަނީ އެ މަސައްކަތް ހަވާލުކުރަން ގާތްގަނޑަކަށް 10 ދުވަސް ނަގާނެ އެވެ.
ރާއްޖޭގައި ހިންގާ އުމްރާނީ ތަރައްގީގެ އެންމެ ބޮޑު މަޝްރޫއު ކަމަށްވާ "ގްރޭޓާ މާލެ ކަނެކްޓިވިޓީ ޕްރޮޖެކްޓް"، އެފްކޮންސްއާ ހަވާލުކުރުމުގެ ހުއްދައަށް އެގްޒިމް ބޭންކަށް ފޮނުވާފައިވާ ކަން "އަދަދު"އަށް ވަނީ ކަށަވަރުވެފަ އެވެ. އެކަމަކު ރަސްމީ އެއްވެސް އިދާރާއަކުން އަދި މިކަން ހާމައެއްނުކުރެ އެވެ.
އެފްކޮންއަކީ އައްޑޫގެ މަގުތައް ހެދުމާއި ފެން ހިންދުމުގެ ނިޒާމު ގާއިމްކުރަން ވެސް ހަވާލުކޮށްފައިވާ ކުންފުންޏެވެ.
ބުރިޖުގެ މަސައްކަތަށް ފިނޭންސް މިނިސްޓްރީން ހުޅުވާލާފައިވާ ބީލަމުގައި ބައިވެރިވުމަށް އެގްޒިމް ބޭންކުން ޕްރީކޮލިފައިކުރީ ހަތަރު ކުންފުންޏެވެ. މި ހަތަރު ކުންފުންޏަކީ ވެސް މިފަދަ މަޝްރޫއުތަކުގެ މަސައްކަތުގެ ތަޖުރިބާ އާއި، މަޝްރޫއުއަށް ބޭނުންވާ ޓެކްނިކަލް މާހިރުކަމާއި ގާބިލިއްޔަތު، އަދި މާލީ ތަނަވަސްކަން ލިބިފައިވާ ކުންފުނިތަކެއްގެ ޔަގީންކަން ވަނީ ދީފަ އެވެ.
އިންޑިއާ ކުންފުނިން އެހެން ގައުމެއްގައި އަޅާފައިވާ ބްރިޖެއް
ބްރިޖު ޕްރޮޖެކްޓު ހިންގަން ދިވެހި ސަރުކާރުން ވަނީ އިންޑިއާގެ އެގްޒިމް ބޭންކުން 400 މިލިއަން ޑޮލަރުގެ ލޯނެއް ނަގައިފަ އެވެ. މިއީ ޕްރޮޖެކްޓު ނިމޭތާ ފަސް އަހަރު ފަހުން އަނބުރާ ދައްކަން ފަށަންޖެހޭ ލޯނެކެވެ.
އެފްކޮން ކުންފުންޏާ ބްރިޖް މަޝްރޫއު ހަވާކުރަން ނިންމީ އެނގިފައިވާ ގޮތުގައި، މި މަޝްރޫއުގައި ވާދަކުރި އިންޑިއާގެ އަނެއް ދެ ކުންފުންޏާ ވާދަކޮށެވެ. އެއީ، އަޝޯކާ ބިލްޑްކޮން އާއި ލާސެން އެންޑް ޓުއަބްރޯ ލިމިޑެޓާ އެވެ.
މި ބީލަމުގެ ޓެކްނިކަލް އިވެލުއޭޝަން ޓީމަށް މި މަޝްރޫއުގެ ކޮންސަލްޓަންސީ މަސައްކަތް ކުރަން ސަރުކާރުން ކަނޑައަޅާފައިވާ "އެމްއެސް އަރޫޕް" އިން އެހީތެރިކަން ފޯރުކޮށްދީފައިވެ އެވެ.
މި ބްރިޖު އެޅުމުގެ ސާވޭގެ މަސައްކަތް ކުރަން ހަވާލުކޮށްފައި ވަނީ ނެދަލެންޑްސްގެ ކުންފުންޏަކަށް 15 މިލިއަން ޑޮލަރަށެވެ.
ބްރިޖް މަޝްރޫއުގައި، މާލެ އިން ގުޅީފަޅަށް 67 ކިލޯމީޓަރު ބްރިޖް އަދި ކޯޒްވޭއެއް ގާއިމްކުރާނެ އެވެ.
އެގްޒިމް ބޭންކުގެ ލޯނާ އެކު މި ބްރިޖަށް ދެން ފަންޑުކުރާނީ އިންޑިއާ ސަރުކާރުގެ ހިލޭ އެހީގެ ގޮތުގައި ދީފައިވާ 100 މިލިއަން ޑޮލަރާއި ދިވެހި ދައުލަތުގެ ފައިސާއިންނެވެ. ސަރުކާރުން ކުރިން ބުނެފައި ވަނީ ތިލަފުށްޓާއި މާލެ ގުޅާލާ ބްރިޖްގެ މަޝްރޫއު އަށް 500 މިލިއަން ޑޮލަރު ހަރަދުވާނެ ކަމަށް އަންދާޒާ ކުރެވޭ ކަމަށެވެ. މި އަހަރަށް ކަނޑައެޅި ބަޖެޓުގައި މި ބްރިޖަށް 411 މިލިއަން ހިމަނާފައިވެ އެވެ.
އިންޑިއާގެ ކުންފުންޏެއް ކަމަށްވާ ޝަޕޫރުޖީ ޕައްލޮންޖީ ކުންފުނިން މެޖޯރިޓީ ހިއްސާ ގަނެފައިވާ އެފްކޮން އިން ވަނީ އިންޑިއާގައި އުމްރާނީ ތަރައްގީގެ ބިޔަ މަޝްރޫއުތައް ކާމިޔާބުކަމާ އެކު ނިންމައިފަ އެވެ.
އިންޑިއާގެ ޓާޓާ ކުންފުންޏާ ވެސް ގުޅުން އޮންނަ އެފްކޮންގެ މަޝްރޫއުތަކުގެ ތެރޭގައި، ގަބޯންގައި އެ ގައުމުގެ އިރުން ހުޅަނގަށް ގުޅުވައިދޭ ޓްރާންސް ގަބޮނީސް ރޯޑް ޕްރޮޖެކްޓެއް ވެސް އެފްކޮން އިން ވަނީ ކާމިޔާބުކޮށްފަ އެވެ. އަދި އެފްރިކާގެ ގާނާގައި އަޅާ ވޮލްޓާ ރެއިލްވޭ ބްރިޖްގެ މަސައްކަތް ހަވާލުކޮށްފައި ވަނީ އެފްކޮންއާ އެވެ. މިއީ ޖަޕާނުގެ ސަރުކާރުން 100 މިލިއަނަށް ވުރެން ގިނަ ޑޮލަރުގެ ލޯނެއްގެ ދަށުން ގާނާގައި ތަރައްގީކުރާ ޕްރޮޖެކްޓެވެ.
މި މަޝްރޫއަށް ޕްރީ ކޮލިފައިވި އަޝޯކާ އިން ވަނީ ހުޅުމާލޭގައި 2000 ހައުސިން ޔުނިޓް އަޅަން ހަވާލުކޮށްފަ އެވެ. މި ކުންފުނިން އެކި ވައްތަރުގެ 15 ބްރިޖް އަޅާފައިވާ ކަމަށް ކުންފުނިން އާއްމުކޮށްފައިވާ މައުލޫމާތުތަކުގައިވެ އެވެ.
ލާސެން ކުންފުނިން ވެސް ވަނީ އިންޑިއާގެ އެކި ސްޓޭޓްތަކުގައި ބްރިޖުގެ މަސައްކަތްތަކެއް ކޮށްފަ އެވެ.
