ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން މަޖީދީ މަގުގައި ގޮއްވާލި ބޮމުގައި ޒަހަމްވި އެމަނިކުފާނުގެ ހަށިފާރަވެރިޔާ އިލްހާމް އާދަމް މާދަމާ ކަނދުރާގެ އޮޕަރޭޝަނެއް ކުރުމަށް ހަމަޖެހިއްޖެ އެވެ.
މަޖީދީ މަގާއި ނަޝީދުގެ ގެކޮޅު ގ. ކެނެރީގެ ހުންނަ ނީލޯފަރު މަގު ކަންމަތީގައި ސައިކަލެއްގައި ހަރުކޮށްގެން މިދިޔަ މެއި 6، ގައި ބޮން ގޮއްވާލި އިރު އެމަނިކުފާނާ އެންމެ ގާތުގައި ހުންނެވި އެކަކީ އިލްހާމެވެ.
"އެ ހަމަލާގައި ލިބުނު ގެއްލުމެއް އެއީ. ކަނދުރާގެ ޑިސްކުތައް ހުރީ ސަކަރާތްވެފަ. މާދަމާ އައިޖީއެމްއެޗުގައި އޮޕަރޭޝަން ކުުރުމަށް ހަމަޖެހިފައި އޮތީ،" މި ނޫހާ ވާހަކަ ދައްކަވަމުން އިލްހާމް ވިދާޅުވި އެވެ.
ނަޝީދަށް ދިން ހަމަލާގައި ބޮން ގޮއްވާލާފައި ވަނީ ރިމޯޓެއް ބޭނުންކޮށްގެން، ބޮމާ އެމަނިކުފާނު އެންމެ ކައިރިވި ވަގުތު ބެލުމަށްފަހު އެވެ. ބޮން ގޮއްވާލުމާ އެކު ރައީސް ނަޝީދު ބިންމަތިން ނަގައި ކާރަށް އެރުއްވީ އިލްހާމެވެ.
"ރައީސް ނަޝީދުގެ ފުރާނަ ސަލާމަތް ކުރުމަށް އިލްހާމް ވަރަށް ބޮޑު ދައުރެއް އަދާ ކުރި،" ނަޝީދު ކޮއްކޯފުޅު ނާޒިމް ސައްތާރު ވިދާޅުވި އެވެ.
މޯލްޑިވްސް ނެޝަނަލް ޑިފެންސް ފޯސް އިން ބުނާ ގޮތުގައި ބޮން ގޮއްވާލިތާ ހަ މިނެޓު ތެރޭގައި ރައީސް ނަޝީދު ވަނީ އޭޑީކޭ ހޮސްޕިޓަލަށް ގެންގޮސްފަ އެވެ.
އޭޑީކޭގެ ޑޮކްޓަރުން ނަޝީދުގެ ހަށިކޮޅުގައި ގާތްގަނޑަކަށް 16 ގަޑިއިރުގެ ސާޖަރީތަކެއް ހެދި އެވެ. ބޮމުގެ ތެރެއަށް އަޅާފައި އޮތް 10 ބެއަރިން ބޯލްސް އެމަނިކުފާނުގެ ހަށިކޮޅުން ނެގި އެވެ. އަދި ބޮން ހަރުކޮށްފައި ހުރި ސައިކަލުގެ ޕްލާސްޓިކު އެތިކޮޅެއް ވެސް ހަށިގަނޑުން ފެނުނެވެ.
ބޮން ގޮއްވާލި މައްސަލައިގައި މިހާތަނަށް ފުލުހުން ވަނީ ހަތަރު މީހަކު ހައްޔަރުކޮށްފަ އެވެ. އަހުމަދު އަދުހަމް، 25، އާއި މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އަދި ދަރަވަންދޫއިން ލ.ގަން، ދުންފިނި އުފާ، އަހުމަދު ފާތިހު، 23، އެވެ.
އޭގެ ތެރެއިން އަދުހަމަކީ ބޮން ގޮއްވާލި ކަމަށް ތުހުމަތު ކުރެވޭ މީހާ އެވެ. ތަހުމީނަކީ ސައިކަލުގެ ވެރި މީހާ އެވެ. ދެން ތިބި މީހުން ހަމަލާއާ ގުޅެނީ ކޮން ގޮތަކުންކަން ފުލުހުން އަދި ހާމަކޮށްފައެއްނުވެ އެވެ.
