ސިޔާސީ މަންފާއެއް ހާސިލް ކުރުމަށްޓަކައި އެއްވެސް އަސާސެއްނެތި ގާނޫނާ ހިލާފަށް މީހުން ހިފާ ހައްޔަރު ކުރުމަކީ ކޮށްގެންވާނެ ކަމެއް ނޫން ކަމަށް އިދިކޮޅު ކޯލިޝަން، ޕީޕީއެމް/ޕީއެންސީން މިއަދު ބުނެފި އެވެ.
އެމްޑީޕީގެ 16 ވަނަ އަހަރީ ދުވަހާ ގުޅިގެން އިއްޔެ ބޭއްވި ބައްދަލުވުމުގައި ބައިވެރިވެވަޑައިގެން ރައްޔިތުން މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވަނީ ޓެރަރިޒަމްގެ ކުށްތައް ރާއްޖޭގައި ހުއްޓުވުމަށް ގިނަ އަދަދެއްގެ ބަޔަކު ހައްޔަރު ކުރަން ޖެހޭ ކަމާއި އެކަން ކުރުމުގައި ސަރުކާރު ފަހަތު ފަޔަށް ބުރަ ނުވާން ރައީސް އިބްރާހިމް މުހައްމަދު ސޯލިހްގެ އަރިހުން އެދިވަޑައިގެންފަ އެވެ.
އެކަމާ ގުޅިގެން އިދިކޮޅު ކޯލިޝަނުން ނެރުނު ބަޔާނެއްގައި ބުނީ ޓެރަރިޒަމް ހުއްޓުވުމަށްޓަކައި ގާނޫނީ އިމުގެ ތެރެއިން މަސައްކަތްކުރުމަކީ ކުރަންޖެހޭ ކަމެއްކަމަށް ގަބޫލުކުރާ ކަމަށެވެ.
އެގޮތުން ޓެރަރިޒަމް ހުއްޓުވުމަށްޓަކައި ކުރީގެ ރައީސް އަބްދުﷲ ޔާމީންގެ ވެރިކަމުގައި ގިނަ މަސައްކަތްތަކެއް ކުރެވިފައިވާ ކަމަށްވެސް އިދިކޮޅުން ބުންޏެވެ. އެހެންނަމަވެސް ގާނޫނުއަސާސީއާ ހިލާފަށް އެއްވެސް މީހަކު ހިފާ ހައްޔަރުކުރުމަކީ ކޮށްގެންވާނެ ކަމެއް ނޫން ކަމަށް އެ ކޯލިޝަނުން ބުނެ އެވެ.
އެގޮތުން އެއްވެސް މީހަކު ހިފާހައްޔަރުކޮށްފައި ބެހެއްޓޭނެ ގޮތްތައް ގާނޫނުއަސާސީގެ އިތުރުން ޖިނާއީ އިޖުރާއަތުގެ ގާނޫނުގައި ވަރަށް ސާފުކޮށް ބަޔާންކުރެވިފައިވާ ކަން އިދިކޮޅުން ފާހަގަކުރި އެވެ.
އެހެންކަމުން ގިނަ އަދަދެއްގެ ބަޔަކު ހިފާ ހައްޔަރު ކުރަންޖެހޭކަމަށް އެމްޑީޕީގެ ރައީސް އަދި ކުރީގެ ރައިސް މުހައްމަދު ނަޝީދު ވިދާޅުވެފައިވާތީ އެކަމާ މި ކޯލިޝަނުން ކަންބޮޑުވުން ފާޅުކުރަމެވެ.
އެ ކޯލިޝަނުން ބުނީ ގިނަ އަދަދެއްގެ ބަޔަކު އެއްފަހަރާ ހައްޔަރު ކުރުމަކީ ގާނޫނުއަސާސީގެ ރޫހާއި ޑިމޮކްރެސީގެ ހަމަތަކާއި މުޅިން ހިލާފުކަމެއް ކަމަށާއި އެއްވެސް މީހަކު ހައްޔަރު ކުރަންވާނީ އެމީހެއްގެ މައްޗަށް ކުރެވޭ ތުހުމަތުތަކަށް ބާރުލިބޭ އިތުރު ހެކިތައް ހުރެގެން ކަމަށެވެ.
އަދި މީހަކު ހިފާ ހައްޔަރުކޮށްފައި ބެހެއްޓޭނީ މުޖްތަމައުގެ ސަލާމަތަށް ނުރައްކާވާ ހާލަތެއް އޮވެގެން ކަމަށްވެސް އެ ޕާޓީން ބުނެއެވެ.
އެ ކޯލިޝަނުން ވަނީ ކުށެއްނެތް މައުސޫމް މީހުން ސިޔާސީ މަގްސަދެއް ހާސިލްކުރުމަށްޓަކައި ހިފާ ހައްޔަރުކޮށް އަނިޔާވެރިކަން އިސް ނުކުރުމަށް ސަރުކާރަށް ގޮވާލާފަ އެވެ. އަދި ނޫނުއަސާސީއާއި ގާނޫނުތަކުގައި ލިޔެވިފައިވާ ގޮތުގެ މަތިން ކަންކަން ކުރުމަށްވެސް އެ ޕާޓީން ވަނީ ސަރުކާރަށް އިލްތިމާސްކޮށްފައެވެ.
