ބޮލަށް ވަޅި ހަރައި މަރާލި ހއ. ތަކަންދޫ، އިބްރާހިމީ ހިޔާ، ނަދީމް އަބްދުއްރަހީމްގެ މަރުގެ މައްސަލާގައި ހިމެނޭ ސިއްރު ހެކިން އަލުން ޝަރީއަތަށް ހާޒިރުކުރުމަށް ނިންމުމުން ދައުލަތުން އެކަމަށް އިއުތިރާޒުކޮށްފި އެވެ.
ނަދީމްގެ މަރާ ގުޅިގެން ދައުވާ އުފުލާފައިވަނީ ގއ. ގެމަނަފުށި ހަވާސް، މުހައްމަދު ކަރަމް ސުހައިލު އާއި ރ. އިންނަމާދޫ ސަމަންތާ، ހުސައިން ޝާމިން އާއި ލ. ގަން ވިދާތަރި، އަލީ ނިފާޒު އަދި ގ. ޝާރާޒް، މުހައްމަދު މަފާޒުގެ މައްޗަށެވެ.
ދިގުލައިގެން ގޮސްފައިވާ މި މައްްސަލާގެ ޝަރީއަތުގައި ގިނަ ހެކިންތަކެއްގެ ހެކި ބަސް ނަގާފައިވެ އެވެ. އޭގެ ތެރޭގައި ސިއްރު ހެކިން ވެސް ގިނަ އަދަދަކަށް ހިމެނޭއިރު، އެމީހުންނަށް ބިރު ދައްކާ ކަމާއި ހެކި ބަސް ދޭން ޖެހިލުންވާ ކަމުގެ ޝަކުވާތައް ކޯޓާ ހަމައަށް ދިޔަ އެވެ.
ކޯޓުގައި ހެކި ބަސް ނަގަމުން ދިޔައިރު މާލޭގައި އެކަމާ ގުޅޭ މާރާމާރީތަކެއް ވެސް ހިނގި އެވެ. އެކަމާ ގުޅޭ އިންޓެލް ރިޕޯޓެއްް ވެސް އޭރު ދައުލަތުން ކޯޓަށް ހުށަހެޅި އެވެ.
މިއަދު މި މައްސަލާގައި ހެކި ބަސްތައް ނަގައި ނިންމުމަށް ބޭއްވި އަޑުއެހުމުގައި މައްސަލަ ބައްލަވާ ގާޒީ ހުސެއިން ފާއިޒު ވިދާޅުވި ގޮތުގައި، މައްސަލާގައި ސިއްރު ހެކިބަސް ދީފައިވާ މީހުންތަކެއް އެ ކޯޓަށް ސިޓީތަކެއް ފޮނުވާފައިވާ ކަމަށެވެ.
އެ ސިޓީތަކުގައި އޮތް އެއްޗެއް ގާޒީ ވިދާޅެއް ނުވެ އެވެ.
ގާޒީ ފާއިޒު ވިދާޅުވި ގޮތުގައި، ހެކިވެރިން ފޮނުވާފައިވާ ސިޓީތަކުގެ ހަގީގަތް ބެލުމަށާއި އެއީ އެމީހުން ފޮނުވި އެއްޗެއްކަން ޔަގީންކުރުމަށް އެ ހެކިވެރިން އަލުން ޝަރީއަތަށް ހާޒިރުކުރުމަށް ނިންމާފައިވާ ކަމަށެވެ. ގާޒީ އެހެން ވިދާޅުވުމާއެކު، ދައުލަތުގެ ވަކީލު އެކަމަށް އިއުތިރާޒު ކުރެއްވި އެވެ.
ޕްރޮސިކިއުޓާ ޖެނަރަލްގެ ވަކީލް ފާތިމަތު މީޝާ ވިދާޅުވި ގޮތުގައި ސިއްރު ހެކިވެރިން އަލުން ހާޒިރުކުރުމަކީ އެމީހުންގެ އައިޑެންޓިޓީ ހާމަވުމަށް ހުޅުވޭ ފުރުސަތެކެވެ. މައްސަލާގައި ސިއްރު ހެކިންނަށް ނުފޫޒު ފޯރުވުމުގެ އިހުތިމާލު ވެސް އޮތްއިރު، އެމީހުންގެ އައިޑެންޓިޓީ ހާމަވާނެ ފުރުސަތު ހުޅުވާލުމަކީ ރަނގަޅު ކަމެއް ނޫން ކަމަށެވެ.
އަދި، އެ ހެކިވެރިންނަށް އަލުން ކޯޓަށް ހާޒިރުކުރުމަށް އަންގައި މަޖުބޫރުކޮށްގެން ނުވާނެ ކަމަށް ގަބޫލު ކުރައްވާ ކަމަށް ވެސް ވަކީލް ވިދާޅުވި އެވެ. ވަކީލު ވިދާޅުވި ގޮތުގައި، އެމީހުން އަލުން ހާޒިރުނުކޮށް ވެސް ސިޓީތަކުގެ ސައްހަކަން ކަށަވަރު ކުރެވިދާނެ އެވެ.
އެގޮތުން، އެމީހުންގެ ސޮއި އަދި އިނގިލީގެ ނިޝާން ތަހުލީލު ކުރެވިދާނެކަން އޭނާ ފާހަގަ ކުރެއްވި އެވެ. ނަމަވެސް، އެއީ އެންމެ ރަނގަޅު ގޮތެއް ކަމަށް ނުފެންނަ ކަމަށް ދައުވާ ލިބޭ ފަރާތްތަކުގެ ވަކީލް އިބްރާހިމް ޝިޔާމް ވިދާޅުވި އެވެ.
ވަކީލް ޝިޔާމް ވިދާޅުވި ގޮތުގައި، ހެކިވެރިން ޝަރީއަތަށް ހާޒިރުކޮށް އެކަން ސާފުކުރުމުން އެއް ދުވަހުން އެކަން ނިމިގެންދާނެ އެވެ. ނަމަވެސް، ތަހުލީލުތައް ކުރަންވެއްޖެނަމަ، އެކަމުގައި ބޭކާރު ވަގުތުތަކެއް ހޭދަވެގެން ދާނެ ކަމަށެވެ. އަދި، ތަހުލީލަށްފަހު ހަދާ ރިޕޯޓާމެދު ތުހުމަތު ކުރުމުގެ ފުރުސަތު ވެސް އޮންނާނެކަން އޭނާ ފާހަގަކުރެއްވި އެވެ.
ނަމަވެސް، ދައުލަތުން ތަކުރާރުކޮށް އެކަން އެގޮތަށް ކޮށްދިނުމަށް އެދެމުންދާތީ ގާޒީ ނިންމެވީ ހެކިވެރިން އަލުން ހާޒިރުކުރުމާމެދު ގޮތެއް ކަނޑައެޅުމަށެވެ. އެގޮތުން، މައްސަލާގައި އަންނަ މަހު ބާއްވާ އަޑުއެހުމަށް އެކަމުގައި ގާޒީ ގޮތެއް ކަނޑައަޅުއްވައި، ހާޒިރުކުރަން ޖެހޭނަމަ އެ އަޑުއެހުމަށް ސިއްރު ހެކިވެރިން އަލުން ހާޒިރު ކުރާނެ ކަމަށް ގާޒީ ވިދާޅުވި އެވެ.
ހެކިބަސް ނަގައި ނިންމައި، މައްސަލަ ނިންމުމާ ގާތަށް
މިއަދުގެ އަޑުއެހުމުގައި މައްސަލާގައި ހިމެނޭ ފަސް ދިފާއީ ހެއްކެއްގެ ހެކި ބަސް ނެގި އެވެ. އޭގެ ތެރޭގައި ހިމެނޭ ތިން މީހުންނަކީ ނަދީމަށް ޓާމިނަލް ކެފޭ ތެރޭ ހަމަލާދިން ވަގުތު ޖެހިގެން ހުރި މޭޒުގައި ކޮފީ ބޯން ތިބި ތިން މީހުންނެވެ.
އެ ތިން މީހުން ވެސް ބުނެފައިވަނީ ހަމަލާދިން މީހުން ތިބީ މޫނާއި ބޮލާ ނިވާކޮށްގެން ކަމާއި އެހެންވެ، އެކަން ކުރި ބައެއް އެމީހުންނަށް ނޭނގޭ ކަމެވެ. ހަމަލާދޭން އެތަނަށް ވަން ދެ މީހުންނަކީ ވެސް އިސްކޮޅުން ދިގު ބައެއް ނޫން ކަމާއި އާދައިގެ އިސްކޮޅެއް ތިބި، ހަށިގަނޑު ހިކިކޮށް ތިބި ބައެއް ކަމަށެވެ.
އެމީހުން އެކަން ފާހަގަކުރިއިރު މައްސަލާގައި ގަސްދުގައި މީހަކު މަރާލުމުގެ ދައުވާކުރާ މަފާޒަކީ އިސްކޮޅު ވަރަށް ދިގު މީހެކެވެ. އެއް ހެކިވެރިޔަކު ބުނި ގޮތުގައި ހަމަލާދިން މީހުންގެ ތެރޭ މަފާޒު ނެތްކަން އޭނާއަށް ޔަގީންނެވެ.
އެއީ، މަފާޒުގެ ގާތް އެކުވެރިއެއް ކަމާއި އޭނާ މޫނު ނިވާކޮށްގެން ހުރި ނަމަވެސް ވަކިކުރަން އެނގޭނެކަން އޭނާ ފާހަގަކުރި އެވެ.
ތިން ހެކިވެރިންގެ ވާހަކަތައް ވެސް އާންމުކޮށް އެއްގޮތަކަށް ހުރިއިރު ފުށުއަރާ ކަމެއްގެ ގޮތުގައި ފާހަގަވީ ހަމަލާ ހިނގި ވަގުތު އެމީހުން ތިބި ތަނެވެ. އެގޮތުން، ދެ ހެކިވެރިޔަކު ބުނި ގޮތުގައި ނަދީމަށް ހަމަލާ އަމާޒުވިއިރު އެމީހުން ތިބީ ކެފޭގެ ގްރައުންޑް ފްލޯގަ އެވެ. ނަމަވެސް، ތިންވަނަ ހެކިވެރިޔާ ބުނީ އެމީހުން ތިބީ ފުރަތަމަ ފަންގިފިލާގަ އެވެ.
ދެން ހެކިބަސް ދީފައިވަނީ މީހަކު މަރާލުމުގައި ބައިވެރިވި ކަމުގެ ދައުވާކުރާ ކަރަމްއާއެކު ހާދިސާ ހިނގި ވަގުތު އުޅުނު ކަމަށް ބުނާ މީހެއްގެ އެވެ. އޭނާ ބުނި ގޮތުގައި، ކަރަމް އެ ދުވަހު ހަވީރުން ފެށިގެން އިރުއޮއްސެންދެން އުޅުނީ އޭނާއާއެކު އޭނާގެ ސައިކަލް ފަހަތުގަ އެވެ.
ނަދީމަށް ހަމަލާ ޓާމިނަލް ކެފޭ ތެރޭ ދިންއިރު އެއީ ހެންވޭރުގަ ހުންނަ ކެފޭއެކެވެ. ހެކިވެރިޔާ ބުނި ގޮތުގައި، އޭރު އެމީހުން މުޅިން ވެސް އުޅުނީ މާފަންނު އެކި ސަރަހައްދުތަކުގައި ސައިކަލް ދުއްވަން ކަމަށެވެ.
އެ ދެ މީހުން އެކުގައި މާފަންނު ރާނބާ ރެސްޓޯރެންޓް ކައިރިން ފެނުނު ކަމަށް ބުނެ ވެސް މީހަކު ހެކި ބަސް ދިނެވެ. ނަމަވެސް، ކަރަމްއާއެކު ސައިކަލް ދުއްވި މީހާ، ހެކިބަސް ދެމުން ބުނެފައިވަނީ ވަކި މީހަކާ އެ ވަގުތު ބައްދަލުނުވާ ކަމަށެވެ.
ނަދީމް، 2017 ވަނަ އަހަރުގެ ޖުލައި މަސް ތެރޭ މަރާލިއިރު، ހަތަރު މީހުންގެ އިތުރުން ކުޑަކުއްޖެއްގެ މައްޗަށް ވެސް ވަނީ ދައުވާ އުފުލާފަ އެވެ. އެ މައްސަލާގެ ޝަރީއަތް ވެސް ޖުވެނައިލް ކޯޓުގައި ދަނީ ކުރިއަށެވެ.
