މިދިޔަ މެއި މަހުގެ ހަ ވަނަ ދުވަހު ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާއަށްފަހު، އެމަނިކުފާނުގެ ރަސްމީ ހައިސިއްޔަތުން ފުރަތަމަ ބައްދަލުވުން އިއްޔެ ބާއްވައިފި އެވެ.
ގެކޮޅުން ނުކުމެވަޑައިގެން ކާރަށް އަރައިވަޑައިގަންނަވަނިކޮށް ބާރުގަދަ އައިއީޑީއެއް ގޮއްވާލައިގެން އެމަނިކުފާނަށް ލިބިވަޑައިގެންނެވި ޒަހަމްތަކަށް އެންމެ ފުރަތަމަ ފަރުވާދިނީ އޭޑީކޭ ހޮސްޕިޓަލުގަ އެވެ.
އޭޑީކޭގެ ޑޮކްޓަރުންގެ ޓީމަކުން 16 ގަޑިއިރުގެ އޮޕަރޭޝަންތަކަކަށްފަހު އެމަނިކުފާނުގެ ހަށިކޮޅުން، އައިޑީގެ ގެއްލުން ބޮޑުކުރަން އެތެރެއަށް އަޅާފައިވާ ރޭޒާފުއްތަކުގެ ތެރެއިން، 10 އަށް ވުރެ ގިނަ ރޭޒާފުއް ނެގި އެވެ.
އެމަނިކުފާނު އިތުރު ފަރުވާއަށް ޖަރުމަނަށް ވަޑައިގެންނެވީ މިދިޔަ މެއި މަހުގެ 13 ވަނަ ދުވަހެވެ.
ނަޝީދުގެ ހާލުކޮޅު މަޑުމަޑުން ރަނގަޅުވަމުން އަންނަ ކަމަށް ވިދާޅުވެފައިވާއިރު، އިއްޔެ އެމަނިކުފާނު ވަނީ ޖަރުމަނުގެ ގާނޫނު ހަދާ މަޖިލީހުގެ ތިރިގޭގެ ރައީސް ވުއަލްފްގަންގް ޝުއައިބުލައާ ބައްދަލުކުރައްވައިފަ އެވެ.
މިއީ އެ ހަމަލާއަށްފަހު މަޖިލީހުގެ ރައީސްގެ ހައިސިއްޔަތުން ނަޝީދު ބޭއްވެވި ފުރަތަމަ ރަސްމީ ބައްދަލުވުމެވެ.
އެ ބައްދަލުކުރެއްވުމުގައި ދެ ގައުމުގެ ދެމެދުގައި އޮތް ރަހުމަތްތެރި ކަމުގެ ގުޅުމުގެ މައްޗަށް އަލިއަޅުވާލެއްވި ކަމަށް މަޖިލީހުގެ އިދާރާއިން ބުންޏެވެ.
ނަޝީދަށް ހަމަލާ ދިނުމުގައި އަމަލީ ގޮތުން ބައިވެރިވިކަމުގެ ތުހުމަތުގައި ފަސް މީހަކު މިހާތަނަށް ހައްޔަރުކޮށްފައިވީ ނަމަވެސް، އެ ހަމަލާއަށް ފަންޑު ކުރި މީހުން ހޯދުން ލަސްވާތީ އެމްޑީޕީގެ ތެރެއިން ވެސް ތަހުގީގީ އިދާރާތަކަށް އަމާޒުވާ ފާޑުކިޔުންތައް ގިނަ އެވެ.
އެ ހަމަލާއާ ގުޅިގެން ރާއްޖޭގެ ތާރީހުގައި ފުރަތަމަ ފަހަރަށް މުޅި މަޖިލިސް އިގުރާރުވެގެން ޕާލިމަންޓަރީ އިންކުޔަރީ އަންނަނީ ހިންގަމުންނެވެ.
އެ އިންކުޔަރީއަށް ސަލާމަތީބާރުތަކުގެ އިސްވެރިންގެ އިތުރުން ކަމާގުޅޭ އެހެން މުއައްސަސާތައް ހާޒިރުކޮށް، ސުވާލުކޮށްގެން ވަނީ މައުލޫމާތު އެއްކޮށްފަ އެވެ.
އެ އިންކުޔަރީގެ ރިޕޯޓު އަންނަ ހަފްތާގެ ތެރޭގައި އާއްމުކުރާނެކަމަށް ވަނީ ބުނެފަ އެވެ.
