ރެޕް އާޓިސްޓް އިސްމާއީލް އިފްހާމް މުހައްމަދު (ޕެސްޓު) ޝަރީއަތް ނިމެންދެން ބަންދުކުރަން ކުރިމިނަލް ކޯޓުން މިއަދު ނިންމައިފި އެވެ.
މިދިޔަ ފެބުރުއަރީ 13ގައި ހައްޔަރުކޮށް، ފަސް ދައުވާއެއް އުފުލާފައިވާ ސިންބޮލިކް ރެކޯޑްސްގެ ރެޕް އާޓިސްޓު ޕެސްޓް މީގެކުރިން ވެސް ޝަރީއަތް ނިމެންދެން ބަންދުކުރި އެވެ.
އެކަމަކު، ޝަރީއަތް ފެށުމަށްފަހު ބޭއްވި ފުރަތަމަ އަޑުއެހުމުގައި ބަންދު ރިވިއުކުރުމަށްފަހު، ގާޒީ ނިންމެވީ 30 ދުވަހަށް ބަންދުކުރުމަށެވެ. އެގޮތަށް ނިންމީ މައްސަލާގައި ހެއްކެއްގެ ގޮތުގައި ހުށަހަޅާފައިވާ ސީސީޓީވީ ފުޓޭޖުތަކާއި އޭގެ އެނާލިސިސް ރިޕޯޓް ހުށަހަޅާފައިނުވާތީ އެވެ.
ދައުލަތުން މިއަދު ވަނީ އެތަކެތި ކުރިމިނަލް ކޯޓަށް ހުށަހަޅައިފަ އެވެ.
ޕްރޮސިކިއުޓާ ޖެނަރަލްގެ އޮފީހުގެ ވަކީލް ފާހަގަ ކުރެއްވި ގޮތުގައި، މަސްތުވާތަކެތި ޓްރެފިކްކޮށް، ރަށްރަށަށް ފުޅާ ދާއިރާއެއްގައި މަސްތުވާތަކެއްތި ފޮނުވައި، އޭގެ މާލީ މަންފާ ހޯދަމުންދާ ކަމުގެ ހެކި އެބަހުރި ކަމަށެވެ. އެއީ މުޖުތަމައުއަށް ނުރައްކާވާ ހާލަތެކެވެ.
އެހެންކަމުން ޕެސްޓް ޝަރީއަތް ނިމެންދެން ބަންދުކުރުމަށް ލާޒިމް ހާލަތެއް އެބަ އޮތް ކަމަށް ވަކީލް ވިދާޅުވި އެވެ.
ބަންދު މަޖިލީހުގެ ތެރެއިން
ނަމަވެސް، އެކަމަށް ޕެސްޓްގެ ވަކީލުން އިއުތިރާޒު ކުރެއްވި އެވެ. ވަކީލުން ވިދާޅުވި ގޮތުގައި ޕެސްޓްގެ މައްޗަށް ތުހުމަތު ކުރެވޭ ކަންކަމަށް ބާރުދޭ އެއްވެސް ހެއްކެއް ނެތެވެ. އެހެންކަމުން، އޭނާ ބަންދުގައި ބަހައްޓަން ޖެހޭ ހާލަތެއް ނެތް ކަމަށެވެ.
ބަންދު މަޖިލީހުގައި ޕެސްޓް އެއްވެސް ވާހަކައެއް ނުދައްކަ އެވެ.
މައްސަލަ ބައްލަވާ ގާޒީ ނިންމެވީ، ޕެސްޓްގެ މައްޗަށް އެކަށީގެންވާ މިންވަރަށް ހެކި ހުށަހެޅިފައިވާތީ ޝަރީއަތް ނިމެންދެން ބަންދުކުރުމަށް އަމުރުކުރާ ކަމަށެވެ. އެގޮތަށް ބަންދުކުރުމުން ޝަރީއަތް އަވަހަށް ކުރިއަށް ގެންދިޔުމަށް މަސައްކަތް ކުރައްވާނެ ކަމަށް ވެސް ގާޒީ ވިދާޅުވި އެވެ.
ޕެސްޓްގެ މައްޗަށް އުފުލާފައިވަނީ، ކެނަބިސް ޓްރެފިކްކުރުމުގެ ކުށުގެ ދައުވާ އާއި ޑައިމޯފިން ޓްރެފިކްކުރުމުގެ ކުށުގެ ދައުވާ އާއި މަސްތުވާއެއްޗެއް ޓްރެފިކް ކުރުމުގެ ކުށުގެ ދައުވާ އާއި ކެނެބިސް ބޭނުންކުރުމުގެ ކުށުގެ ދައުވާގެ އިތުރުން، ކުށްކޮށްގެން ހޯދާ މުދަލާއި ފައިސާ ބޭނުންކުރުމާއި އަތުގައި ބެހެއްޓުމާއި ސިއްރުކުރުމުގެ ކުށުގެ ދައުވާ އެވެ.
މި ދައުވާތަކުގެ ޝަރީއަތުގެ އަޑުއެހުމެއް އަންނަ މަހުގެ ކުރީކޮޅު ބޭއްވުމަށް ވެސް ގާޒީ ވަނީ ނިންމަވާފަ އެވެ.
މައްސަލާގައި ދެން ހިމެނޭ ލ. ގަން-ތުނޑި، އަބަދަށްއުފާ، މުހައްމަދު ސުއައިދު ޝަރީއަތް ނިމެންދެން ބަންދު ކުރުމަށް ވެސް މިއަދު ކުރިމިނަލް ކޯޓުން ނިންމި އެވެ. އަދި، މައްސަލާގައި ދެން ދައުވާކޮށްފައިވާ އަހުމަދު ހުސާމްގެ ބަންދަށް އިތުރު 30 ދުވަސް ޖެހި އެވެ.
ދައުލަތުން އެދުނީ އޭނާ ވެސް ޝަރީއަތް ނިމެންދެން ބަންދުކުރުމަށެވެ. ނަމަވެސް، ބައެއް ލިޔެކިޔުންތައް ނެތުމުން އެއަށް ރިއާޔަތްކުރުމަށްފަހު ބަންދު އަނެއްކާވެސް ރިވިއު ކުރާއިރު ޝަރީއަތް ނިމެންދެން ބަންދު ކުރާމެދު ގޮތެއް ނިންމަވާނެ ކަމަށް ގާޒީ ވިދާޅުވި އެވެ.
