ލަންޑަން (ޖޫން 24) - މި ފަހަރުގެ ޔޫރޯ ފުޓްބޯޅަ މުބާރާތުގެ ދެ ވަނަ ބުރުގެ ފަހު ޖާގަ ޔޫކްރެއިނަށް ލިބިއްޖެ އެެވެ.
މިއީ ޔޫކްރެއިންގެ ނަމުގައި އެ ޓީމު ކުޅެން ފެށި ފަހުން މި މުބާރާތުގެ ދެ ވަަނަ ބުރުން ފުރުސަތު ލިބުނު ފުރަތަަމަ ފަހަރެވެ. މީގެ ކުރިން 2012 އާއި 2016 ވަަނަ އަހަރު ވާދަކޮށްގެން ޔޫކްރެއިން ވަނީ ގްރޫޕް ސްޓޭޖުން ކަޓައިފަ އެވެ.
މިރޭ ގްރޫޕް ސްޓޭޖުގެ މެޗުތައް ނިމުނުއިރު، ޔޫކްރެއިނަށް ފަހު ޖާގަ ލިބުނީ އެންމެ ރަނގަޅު ނަތީޖާ ނެރޭ ތިން ވަނަ ޓީމުތަކުގެ ތެރެއިން ހަތަރު ވަނަ ހޯދައިގެންނެވެ. ހަ ގްރޫޕްގެ ތިން ވަނަ އަށް ދާ ޓީމުތަކުގެ ރޭންކިން އިން އަނެއް ބުރަށް ހޮވުނު ހަތަރު ޓީމަކީ ޔޫކްރެއިންގެ އިތުރުން ޕޯޗުގަލް އާއި ސްވިޒަލެންޑް އަދި ޗެކް ރިބަޕްލިކް އެވެ.
ތިން ވަަނަ އަށް ދިޔަ ޓީމުތަކުގެ ތެރެއިން ކެޓީ މުޅިން އަލަށް މި މުބާރާތުގައި ވާދަކުރި ފިންލެންޑާއި މިރޭ ސްޕެއިން އަތުން ތަފާތު ބޮޑުކޮށް ބަލިވި ސްލޮވާކިއާ އެވެ. ޔޫކްރެއިންއާ އެއްވަރަށް ސްލޮވާކިއާ އާއި ފިންލެންޑަށް ތިން ޕޮއިންޓް ލިބުނު ނަމަވެސް ޔޫކްރެއިން ލަނޑުގެ ތަފާތުން ކުރީގައި އޮތުމުން އެ ޓީމު އަނެއް ބުރަށް ދިޔައީ އެވެ.
ގަދަ 16 ޓީމުގެ ބުުރުގެ މެޗުތައް:
ބެލްޖިއަމް - ޕޯޗުގަލް
އިޓަލީ - އޮސްޓްރިއާ
ފްރާންސް - ސްވިޒަލެންޑް
ކްރޮއޭޝިއާ - ސްޕެއިން
ސްވިޑެން - ޔޫކްރެއިން
އިންގްލެންޑް - ޖާމަނީ
ނެދަލެންޑްސް - ޗެކް ރިޕަބްލިކް
ވޭލްސް - ޑެންމާކް
ގަދަ 16 ޓީމުގެ ބުރުގެ މެޗުތައް ފަށާނީ އަންނަ ހޮނިހިރު ދުވަހު އެވެ. އެ ދުވަހު ކުޅޭނީ އިޓަލީ އާއި އޮސްޓްރިއާގެ މެޗާއި ވޭލްސް އަދި ޑެންމާކް ބައްދަލުކުރާ މެޗެވެ.
