ޓޯކިޔޯ (ޖޫން 23) - އަންނަ މަހު ޓޯކިޔޯގައި ފަށާ އޮލިމްޕިކްސްގެ ސްޓޭޑިއަމްތަކަށް އިވެންޓްތައް ބަލަން ވަދެވޭނީ 10،000 ސަޕޯޓަރުން ކަމަށް ގޭމްސް އިންތިޒާމްކުރާ ކޮމިޓީން ބުނެފި އެވެ.
ޖަޕާނުގައި ކޮވިޑް-19ގެ ކޭސްތައް އަނެއްކާ ވެސް ގިނަވުމުންދާ މައްސަލައިގައި މި އަހަރު އޮލިމްޕިކްސް ކެންސަލްކުރަން ޖެހިދާނެ ކަމަށް ވާހަކަ ދެކެވުނު ނަމަވެސް ޖަޕާން ސަރުކާރާއި އިންޓަނޭޝަނަލް އޮލިމްޕިމް ކޮމިޓީ (އައިއޯސީ) އިން ވަނީ އިތުރު އަހަރަކަށް އޮލިމްޕިކްސް ފަސްކޮށްފިނަމަ ވަރަށް ބޮޑެތި ގެއްލުންތަކެއް މާލީ ގޮތުން ލިބޭނެ ކަމަށް ބުނެފަ އެވެ.
މި ފަހަރުގެ އޮލިމްޕިކްސް އަކީ ހަގީގަތުގައި މިދިޔަ އަހަރު ބާއްވަން ތާވަލުކުރި ގޭމްސް އެކެވެ. އެކަމަކު ކޮވިޑް-19ގެ ހާލަތު އޭރު އޮތްގޮތުން ގޭމްސް ކުރިއަށް ގެންދެވޭނެ އެއްވެސް ގޮތެއް ނެތެވެ.
އޮލިމްޕިކްސް ބަލަން އެހެން ގައުމުތަކުގެ ސަޕޯޓަރުންނަށް ނާދެވޭ ގޮތަށް ކަނޑައަޅާފައިވާ އުސޫލަށް އަމަލުކުރާ ގޮތަށް އަދިވެސް ނިންމާފައިވާއިރު، ގޭމްސްގެ އޮގަނައިޒިން ކޮމިޓީން ނިންމީ އޮލިމްޕިކްސްގެ އިވެންޓްތައް ހިނގާ ކޮންމެ ސްޓޭޑިއަމަކަށް ވަދެވޭނީ އެ ތަނެއްގެ ޖާގައިގެ 50 ޕަސެންޓް މީހުންނަށް ކަމަށެވެ. އެ އުސޫލުން ބަލާކަމަށްވާނަމަ ކޮންމެ ސްޓޭޑިއަމަކަށް ވަދެވޭނީ 10،000 މީހުންނަށެވެ.
ޖަޕާނުގެ ސަރުކާރަށް ކަނޑައަޅާފައިވާ މެޑިކަލް އެޑްވައިޒަރު ޑރ. ޝިގޭރޫ އޯމީ ވިދާޅުވީ އެންމެ ރައްކާތެރި ގޮތަކީ ސަޕޯޓަރުން ނުވައްދައި ގޭމްސްގެ އިވެންޓް ކުރިއަށް ގެންދިއުން ކަމަށެވެ. ސަޕޯޓަރުން ވައްދާނަމަ ހުރިހާ ސަޕޯޓަރުން އިވެންޓްގެ 14 ދުވަސް ކުރިން ވެކްސިން ދެ ޑޯޒު ފުރިހަަމަކޮށްފައިވޭތޯ ކަށަވަރު ކުރަން ޖެހޭނެ ކަމަށް ވިދާޅުވެފައިވެ އެވެ.
ޖަޕާނުގެ އާބާދީ އަކީ 126 މިލިއަން މީހުންނެވެ. ކޮވިޑް ޖެހިގެން މިހާތަނަށް ޖަޕާނުން ވަނީ 14،000 މީހުން މަރުވެފަ އެވެ. ޖަޕާނުގެ އާބާދީގެ 6.5 ޕަސެންޓް ވަނީ ވެކްސިން ދެ ޑޯޒް ފުރިހަމަކޮށްފަ އެވެ. އަދި 16.5 ޕަސެންޓް މީހުން ވަނީ ވެކްސިންގެ ފުރަތަމަ ޑޯޒު ޖަހައިފަ އެވެ.
ޖަޕާނުގެ ބޮޑުވަޒީރު ޔޮޝިހީޑޭ ސޫގާ ވިދާޅުވީ މި ވަގުތަށް ބަލާއިރު ކޮވިޑްގެ ހާލަތު އޮތްގޮތުން ވަކި އަދަދަކަށް އޮލިމްޕިކްސް ބަލަން ސަޕޯޓަރުން ވެއްދިދާނެ ކަމަށާއި އެކަމަކު ހާލަތު ބަދަލުވާ ގޮތެއް ބެލުމަށް ފަހު އެ ހުއްދަ އަނބުރާ ނެގުމުގެ ފުރުސަތު ވެސް އެބައޮތް ކަމަށެވެ.
ޓޯކިޔޯ އޮލިމްޕިކްސްގެ އިވެންޓްތަކަށް 3.64 މިލިިއަން ޓިކެޓް ވިއްކާފައިވާއިރު، އޭގެ ތެރެެއިން އިވެންޓްތަކަށް ވަދެވޭނީ ގާތްގަނޑަކަށް 900،000 މީހުންނަށް ކަމަށް ގޭމްސްގެ އޮގަނައިޒިން ކޮމިޓީން ވަނީ ބުނެފަ އެވެ. ޓިކެޓް ވިއްކައިގެން 800 މިިލިއަން ޑޮލަރުގެ އާމްދަނީ އެއް ލިބޭނެ ކަމަށް ކުރިން ބަޖެޓްކޮށްފައިވީ ނަމަވެސް މިހާރު ބެލެވޭ ގޮތުގައި އޭގެ ދެބައި ކުޅަ އެއްބައި ލިބުމުގެ ފުރުސަތު ވެސް ކުޑަ އެވެ.
އޮލިމްޕިކްސް ކުރިއަށްދާނީ އަންނަ މަހުގެ 23 އިން އޮގަސްޓް އަށް ވަނަ ދުވަހުގެ ނިޔަލަށެެވެ.
