އަނިޔާކޮށް މަރާލުމަށްފަހު، ފޮއްޓެއްގެ ތެރެއަށްލާ މޫދަށް އެއްލާލާފައި އޮއްވާ އިއްޔެ ފެނުނު 13 އަހަރުގެ ކުއްޖާގެ މަރުގެ މައްސަލައިގައި ހައްޔަރު ކުރި އިބްރާހިމް ޒިހާންއަށް ޖިންސީ ގޯނާ ކުރުމުގެ ތުހުމަތު ކޯޓުގައި އުފުލައިފި އެވެ.
މުހައްމަދު ރާއިފް އަންވަރު ވަގަށް ނެގުމަށް ފަހު، އަނިޔާކޮށް މަރާލިކަމުގެ ތުހުމަތު ކުރެވޭ ޒިހާންގެ ބަންދުގެ މުއްދަތު އިތުރު ކުރުމަށް ކްރިމިނަލް ކޯޓަށް ގެންގޮސް އޭނާގެ މައްޗަށް ފުލުހުން ވަނީ ބޮޑު ހަތަރު ޖިނާއީ ކުށެއްގެ ތުހުމަތު އުފުލައިފަ އެވެ. އޭގެ ތެރޭގައި ޖިންސީ ގޯނާ ކުރުމުގެ ތުހުމަތު ވެސް ހިމެނެ އެވެ.
ޒިހާންގެ މައްޗަށް ކުރާ ތުހުމަތުތަކަކީ ގަސްދުގައި މީހަކު މެރުމާއި ރަހީނު ކުރުމާއި ކުޑަކުއްޖަކާމެދު ޖިންސީ ގޯނާކުރުމާއި މަރާމާރީ ހިންގުން ކަމަށް ފުލުހުން ވަނީ ރޭ ކޯޓުގައި ބުނެފަ އެވެ.
ފުލުހުން ހުށަހެޅި ކަންތައްތަކަށް ބަލާފައި ކޯޓުން ނިންމީ އެ މައްސަލައިގައި ޒިހާންގެ މައްޗަށް ދައުވާކޮށް އެ މައްސަލައިގެ ޝަރީއަތް ނިމެންދެން ބަންދުގައި ބެހެއްޓުމަށެވެ. ތަހުގީގު މަރުހަލާގައި ޝަރީއަތް ނިމެންދެން ބަންދުކުރުމަކީ ވަރަށް މަދު ހާލަތެއްގައި ނޫނީ ކުރާ ކަމެއް ނޫނެވެ.
ކުޑަކުއްޖެއްގެ މަސްލަހަތު ހިމެނޭތީ ޒިހާންގެ ބަންދު މަޖިލިސް ކޯޓުގައި ކުރިއަށް ގެންގޮސްފައި ވަނީ ސިއްރުކޮށްގެންނެވެ.
އެ މައްސަލާގައި ޒިހާންގެ އިތުރުން ފުލުހުން ހައްޔަރުކޮށްފައި 17 އަހަރުގެ ކުއްޖެކެވެ. އޭނާގެ ބަންދަށް ކޯޓުން ވަނީ 15 ދުވަސް ދީފަ އެވެ.
މި ނޫހަށް އެނގިފައިވާ ގޮތުގައި ޒިހާންއަކީ އެކި ކަހަލަ ކުށްތަކުގެ ރެކޯޑު އޮންނަ މީހެކެވެ. ވަރަށް ފަހުން ވެސް މައްސަލައެއްގެ ތުހުމަތަށް އޭނާ ހައްޔަރުކޮށް ޖަލަށްލާފައިވާކަން ވެސް އެނގިފައިވެ އެވެ.
ހައްޔަރުކުރި ޒިހާން އާއިި ކުޑަކުއްޖާ މިދިޔަ އާދީއްތަ ދުވަހުން ފެށިގެން ތިބީ ހެންވޭރު ދުނބުރިމަގުގައި ހުންނަ އެކްސްޓްރާ ހެވަން ކިޔާ ގެސްޓް ހައުސްއެއްގަ އެވެ. އެކަމަކު އެތަން ކުއްޔަށް ނެގީ މި މައްސަލައިގައި ހައްޔަރު ކުރި މީހެއްގެ ނަމުގައެއް ނޫނެވެ. އެ މީހުން ހައްޔަރު ކުރީ ގެސްޓް ހައުސްގައި ތިއްބަ އެވެ.
އާދީއްތަ ދުވަހު އެ މީހުން ފިލަން ގެސްޓް ހައުސްއަށް ދިޔައިރު ކުއްޖާ ގެއްލުނީ މިދިޔަ ހޮނިހިރު ދުވަހު އެވެ. ކުއްޖާ ނުފެނިގެން އާއިލާ އިން ފުލުހުންނަށް ރިޕޯޓްކުރީ ވެސް އެ ދުވަހު އެވެ.
މަރާލާފައި މޫދުގައި އޮއްވާ ފެނުނުއިރު އެ ކުއްޖާގެ ހަށިގަނޑުގައި އަނިޔާކޮށްފައިވާ ކަމާއި ކަރުގައި ވެސް އެއްޗެއް ބާރަށް ބައްދާފައިވާ ކަމުގެ ނިޝާންތައް ފެންނަން ހުރި ކަން އެނގިފައިވެ އެވެ. އެ ކުއްޖާގެ ޕޯސްޓްމޯޓަމް ހަދަން ރާއްޖެ އިން ބޭރަށް ގެންދަން ވަނީ ނިންމައިފަ އެވެ.
