ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ އާ ލީޑަޝިޕުން އެކުލަވާލާފައިވާ ޑިވެލޮޕްމަންޓް ޕްލޭނަށް އޭޝިއަން ވޮލީބޯލް ކޮންފެޑެރޭޝަން (އޭވީސީ)ގެ އެހީތެރިކަން ހޯދުމަށް މިއަދު މަޝްވަރާކޮށްފި އެވެ.
ވީޑިއޯ ކޮންފަރެންސް މެދުވެރިކޮށް މިއަދު ބޭއްވި ބައްދަލުވުމުގައި ވީއޭއެމްގެ ފަރާތުން އެސޯސިއޭޝަންގެ ރައީސް މުހައްމަދު ރަނޭޝް (ރަނޭ) އާއި އެސޯސިއޭޝަންގެ ޖެނެރަލް ސެކްރެޓަރީ އައިޝަތު ސޫޒަން ހަނީފް ވަނީ ބައިވެރިވެވަޑައިގެންފަ އެވެ. އޭވީސީގެ ފަރާތުން ބައިވެރިވެވަޑައިގަތީ އެ ފެޑެރޭޝަންގެ ރައީސް ރީތާ ސުބޯވޯ އެވެ.
އެ ބައްދަލުވުމުގައިވަނީ ރާއްޖޭގައި ވޮލީބޯޅަ ކުރިއަރުވަން ވީއޭއެމްގެ މިހާރުގެ ލީޑަޝިޕުން ތައްޔާރުކޮށްފައިވާ ޑިވެލޮޕްމަންޓް ޕްލޭނަށް އޭވީސީން ވެދެވޭނެ އެހީތެރިކަމާ ބެހޭގޮތުން ވަރަށް ފުޅާދާއިރާއެއްގައި ވާހަކަ ދެކެވިފަ އެވެ.
ބައްދަލުވުމާ ބެހޭގޮތުން ރަނޭޝް "އަދަދު" އަށް ވިދާޅުވީ ވީއޭއެމްގެ ޑިވެލޮޕްމަންޓް ޕްލޭނުގެ ކަންތައްތަކުގެ ތެރެއިން އޭވީސީ އަށް އެހީތެރިވެދެވޭނެ އެކި ކަންކަމާ ބެހޭގޮތުން މަޝްވަރާކުރެވިގެންދިޔަ ކަމަށެވެ. އެ ގޮތުން އިންޑޮނީޝިއާ އާއި ތައިލެންޑް ފަދަ ގައުމުތަކުގައި ހުރި ޑިވެލޮޕްމަންޓް ސެންޓަރުތަކުގެ އެހީތެރިކަން ހޯދުމަށް ވެސް ވާހަކަ ދެކެވުނު ކަމަށް ވިދާޅުވި އެވެ.
"ދެން އިންޓަނޭޝަނަލް ބީޗް ވޮލީބޯޅަ އެފްއައިވީބީ ބީޗް ޓުއާ ފަދަ މުބާރާތްތައް ރާއްޖޭގައި ބޭއްވުމާއި ވޮލީބޯޅައިގެ ޑިވެލޮޕްމަންޓްގެ މަސައްކަތުގެ ތެރެއިން އަންހެނުން ބާރުވެރިކުރުން ވެސް އެއީ މުހިއްމު ކަމެއް. ދެން އެކި ޑިވެލޮޕްމަންޓްގެ ކަންކަމުގެ މަޝްވަރާތަކެއް މިދިޔައީ މައިގަނޑު ގޮތެއްގައި،" ރަނޭޝް ވިދާޅުވި އެެވެ..
ވީއޭއެމްގެ އާ ލީޑަޝިޕްގެ ޑިވެލޮޕްމަންޓް ޕްލޭނުގައިވާ ގޮތުން ވޮލީ ބަހާލެވޭނީ ތިން ރީޖަނަކަށެވެ. އެއީ އުތުރާއި ސެންޓްރަލް އަދި ދެކުނަށެވެ. އޭގެ އިން ކޮންމެ ޒޯނެއް އިތުރު ސަބް ދެ ޒޯނަށް ބަހާލާފައި ގިނަ ޕްރޮގްރާމްތަކެއް ހިންގައި ރާއްޖެ އަށް ހުޅުވާލައިގެން ބޮޑު މުބާރާތެއް ބޭއްވުމަކީ ވީއޭއެމްގެ ރައީސް ރަނޭޝްގެ ތަސައްވުރެެކެވެ. މިކަމަށް އެންމެ ބޮޑަށް ބާރުލިބެނީ ސަރުކާރުން ކުޅިވަރު އިންފްރާސްޓްރަކްޗާތައް ތަރައްގީ ކުރަން ގެންގުޅޭ ޕްލޭނުންނެވެ.
މީގެ ކުރިން "އަދަދު" އަށް ދެއްވި އިންޓަވިއުއެއްގައި ރަނޭޝް ވަނީ ރާއްޖޭގެ ވޮލީ ކުރިއެރުވުމަށްޓަކައި އެއްބަސްވުމެއް ހެދުމުގެ ގޮތުން ނެދަލެންޑްސް ވޮލީބޯޅަ ފެޑެރޭޝަނާ މަޝްވަރާކުރަމުން އަންނަ ކަމަށް ވިދާޅުވެފަ އެވެ.
ވީއޭއެމްގެ ރައީސަކަށް ރަނޭޝް އިންތިހާބުވީ މިދިޔަ އޭޕްރީލް އެއް ވަނަ ދުވަހު އެވެ. ވީއޭއެމްގެ ހަރަކާތްތައް ފަށަން މަސައްކަތްކުރި ނަމަވެސް ކޮވިޑް-19ގެ ސަބަބުން ކުޅިވަރު ހަރަކާތްތަކަށް އައިސްފައިމިވާ ހުއްޓުވުމުގެ ސަބަބުން އެކަށީގެންވާ ވަރަށް ކަންތައްތައް ކުރުމުގައި ދަތިތަކެއް އެބަހުއްޓެވެ.
