ބަކޫ، އަޒަރުބައިޖާން (ޖޫން 21) - ޔޫރޯ ފުޓްބޯޅަ މުބާރާތުގައި ރޭ ސްވިޒަލެންޑަށް ގްރޫޕްގެ ދެ ވަނަ ޓީމުގެ ގޮތުގައި އަނެއް ބުރުން ފުރުސަތު ނުލިބުނު ކަމުގައި ވިޔަސް އެންމެ ރަނގަޅު ނަތީޖާ ނެރޭ ތިން ވަނަ ޓީމުތަކުގެ ތެރެއިން ސްވިޒަލެންޑަށް މުބާރާތުގެ ގަދަ 16 ޓީމުގެ ބުރުން ފުރުސަތު ލިބޭނެ ކަމުގެ ޔަގީންކަން އެބައޮތް ކަމަށް އެ ޓީމުގެ ކޯޗު ވްލަޑިމީރް ޕެޓްކޮވިޗް ބުނެފި އެވެ.
ގްރޫޕް އޭގެ ހުރިހާ މެޗެއް ނިމުނުއިރު އިޓަލީ އެއް ވަނަ ހޯދީ ސައްތަ އިން ސައްތަ ރެކޯޑަކާ އެކު ނުވަ ޕޮއިންޓް ހޯދައިގެންނެެވެ. ދެ ވަނައިގައި ނިންމާލި ވޭލްސް އާއި ރޭ ތުރުކީ 3-1 އިން ބަލިކުރި ސްވިޒަލެންޑަށް ވަނީ ހަތަރު ޕޮއިންޓް ލިބިފަ އެވެ. ވޭލްސް އަށް ކުރި ލިބުނީ ލަނޑުގެ ތަފާތުންނެވެ. ވޭލްސްގެ ފައިދާ އެއް ގޯލު އޮތްއިރު، ސްވިޒަލެންޑްގެ އޮތީ ގެއްލުން އެއް ގޯލެވެ. ގްރޫޕްގެ ފުލަށް ދިޔަ ތުރުކީ މުބާރާތް ނިންމާލީ ޕޮއިންޓެއް ނުލިބި އެވެ. ތުރުކީ އަކީ މި ފަހަރުގެ މުބާރާތުން ކެޓި ދެ ވަނަ ޓީމެވެ.
މެޗަށް ސްވިޒަލެންޑް ނުކުތްއިރު މި ގްރޫޕްގެ ގަދަ ދެ ޓީމުގެ ތެރޭގައި ހިމެނިގެން އަނެއް ބުރުން ފުރުސަތު ހޯދާނަމަ އެ ޓީމަށް އޮތީ ފަސް ގޯލު ޖަހަން ޖެހިފަ އެވެ. އެކަމަކު އިޓަލީ އާއި ވޭލްސްގެ މެޗު ދިޔަ ގޮތުންނާއި ސްވިޒަލެންޑަށް ބޭނުންވާ ވަރަށް ގޯލު ނުޖެހި އެ ޓީމަށް މި ގްރޫޕްގެ ދެ ވަނަ ނުލިބުނީ އެވެ. އެކަމަކު އެކަމާ މާ ބޮޑަށް މާޔޫސްވެފައި ހުންނަން ކޯޗު ޕެޓްކޮވިޗް ބޭނުމެއް ނުވެ އެވެ.
"މިއީ އެންމެ ފުރިހަަމަ މެޗެއް ނޫން. އެކަމަކު މިއީ ރަނގަޅު މެޗެއް. އަހަރެމެން މި ހޯދި މޮޅާ އެކު އަހަރެންގެ ނަޒަރުގައި މި ޓީމު ދެން އަންްނަ ބުރުގައި ކުޅޭނެ. މި މޮޅުން އަނެއް ބުރުގެ ޖާގަ ލިބޭނެ. ކުރިއަށް އޮތް ދުވަސްތަކުގައި އަހަންނަށް އޮތް ކަމަކީ އިންތިޒާރުކުރުން ހުރިހާ ގްރޫޕެއްގެ މެޗުތައް ނިމެންދެން،" ރޭގެ މެޗަށް ފަހު ޕެޓްކޮވިޗް ބުންޏެވެ.
ސްވިޒަލެންޑަށް އަނެއް ބުރުގެ ޖާގަ ލިބުމުގެ ފުރުސަތު ބޮޑެވެ. ޔޫރޯގައި ވާދަކުރާ ހަ ގްރޫޕްގެ ތެރެއިން އެންމެ ރަނގަޅު ނަތީޖާ ނެރޭ ތިން ވަނަ އަށް ދާ ޓީމުތަކުގެ ތެރެއިން ހަތަރު ޓީމަކަށް ގަދަ 16 ޓީމުގެ ބުރުން ފުރުސަތު ލިބޭނެ އެވެ. މި ވަގުތު ގަދަ ތިނެއްގެ ތާވަލުގެ އެންމެ ކުރީގައި އޮތީ ވެސް ސްވިޒަލެންޑް އެވެ.
ޕެޓްކޮވިޗް ވަނީ މި ފަހަރުގެ ގްރޫޕް ސްޓޭޖުގެ މެޗުތައް ކުޅެން އޭނާގެ ޓީމު ދަތުރުކުރަން ޖެހުނު ގޮތާ މެދު ކަންބޮޑުވުން ފާޅުކޮށްފަ އެވެ. ފުރަތަމަ މެޗު އަޒަރުބައިޖާނުގެ ބަކޫގައި ކުޅެފައި ދެ ވަނަ މެޗަށް އިޓަލީގެ ރޯމަށް ދިއުމަށް ފަހު އަނެއްކާ ވެސް ފަހު މެޗަށް އަޒަރުބައިޖާނަށް އަންނަން ޖެހުމުން މި ކުރަން ޖެހުނީ ވަރަށް އުނދަގޫ ދަތުުރުތަކެއް ކަން އޭނާ ފާހަގަކޮށްފައިވެ އެެވެ.
"ވަރަށް ދިގު ރާސްތާ ދަތުރުތަކެއް މި ކުރީ. މިއީ ޝަކުވާއެއް ނޫން. އެކަަމަކު މި އަށް ވުރެ ރަނގަޅަށް ރޭވެން ޖެހޭނެ. މި ހާލަތްތައް އޮތްއިރު ވެސް ކުޅުންތެރިން ކުރި ބުރަ މަސައްކަތް ފާހަގަކުރަން،" ޕެޓްކޮވިޗް ބުންޏެވެ.
ސްވިޒަލެންޑުން ވަނީ 2016 ވަނަ އަހަރު ފްރާންސްގައި ބޭއްވި ޔޫރޯގެ ދެ ވަނަ ބުރުގައި ކުޅެފަ އެވެ. ފްރާންސް ހިމެނޭ ގްރޫޕްގެ ދެ ވަނަ ޓީމުގެ ގޮތުގައި ނޮކައުޓް ބުރަށް ދިޔަ ސްވިޒަލެންޑް ކެޓީ ގަދަ 16 ޓީމުގެ ބުރުގައި ޕޮލެންްޑް އަތުން ޕެނަލްޓީ ޖަހައިގެންނެެވެ.
