އިންޑިއާގައި އުފެދުނު އެންމެ ބާރު އެއް ދުވުންތެރިޔާ މިލްކާ ސިންގް ކޮވިޑް ބަލީގައި ރޭ މަރުވެއްޖެ އެވެ.
އިނގިރޭސިންގެ ދަށުގައި އިންޑިއާ އޮތްއިރު ގޯވިންދުޕޫރަށް 1929 ގައި އުފަންވި މިލްކާ ސިންގް މަރުވީ، ކޮވިޑުގެ އަލާމާތްތަކުން ރަނގަޅުނުވެ މަހެއްހާ ދުވަސްވުމަށް ފަހު ރޭ ޗަންދިގަރުގަ އެވެ.
މިލްކާ ސިންގުގެ ޖަނާޒާ މިއަދު ހަވީރު ރަސްމީ އިއްޒަތުގައި ބާއްވަން އިންޑިއާ ސަރުކާރުން ވަނީ ނިންމައިފަ އެވެ.
މިލްކާ ސިންގް ވަނީ އިންޑިއާ އަށް އޭޝިއަން ގޭމްސް އިން ހަތަރު ރަން މެޑަލް ހޯދައިދީފަ އެވެ. އެއީ 1958 ގައި 200 މީޓަރު ދުވުމާއި 400 މީޓަރު ދުވުމުން އަދި 1962 ވަނަ އަހަރު 400 މީޓަރު ދުވުމުންނާއި 400 މީޓަރު ރިލޭ އިންނެވެ. އަދި 1958 ވަނަ އަހަރުގެ ކޮމަންވެލްތު ގޭމްސް އިން ވެސް ރަން މެޑަލް ހޯދި އެވެ. އެ ކާމިޔާބީތަކާ އެކު އޭނާ އޮލިމްޕިކްސް އިން ރަން މެޑަލް ހޯދާނެ ކަމަށް އޭރު ބެލެވުނެވެ. އެކަމަކު ރޯމުގައި 1960 ގައި ބޭއްވި އޮލިމްޕިކްސްގެ 400 މީޓަރު ދުވުމުން އޭނާ އަށް ލިބުނީ ހަތަރު ވަނަ އެވެ.
މިލްކާގެ ކެރިއަރުގެ މައްޗަށް ބޮލީވުޑުން 2013 ވަނަ އަހަރު ވަނީ "ބާގް މިލްކާ ބާގް" ގެ ނަމުގައި ސްޕޯޓްސް ފިލްމެއް އުފައްދައިފަ އެވެ. ފަރްހާން އަހްތަރް ލީޑް ރޯލުން ފެނުނު އެ ފިލްމް ބޮކްސް އޮފީހުގައި ބޮޑު ކާމިޔާބެއް ހޯދި އެވެ.
އެ ފިލްމުގައި ވަނީ މިލްކާ ކުޑައިރު، އިންޑިއާ ދެބައިވެ ޕާކިސްތާން އުފެދުމުން ހިނގައިދިޔަ ހަމަނުޖެހުންތަކުގައި މަންމަ އާއި ބައްޕަ މަރުވި ހާދިސާ އާއި އޭނާ ދަތި އުނދަގުލުގައި އުޅެ ބާރު ދުވުންތެރިއަކަށްވި ގޮތް ދައްކައިފަ އެވެ.
