މާލޭ ދެކުނު ފަރާތު ބަނދަރު، ފަޅުތެރޭގައި މިއަދު ހިނގި އަލިފާނުގެ ހާދިސާގައި ބިދޭސީ މީހާގެ 25 ޕަސެންޓް ފިހިފައިވާ ކަމަށް އައިޖީއެމްއެޗްއިން ބުނެފި އެވެ.
އައިޖީއެމްއެޗްގެ މީޑިއާ އޮފިޝަލް ވިދާޅުވީ ފިހިގެން ފަރުވާ ދެމުން ދަނީ 20 އަހަރުގެ ބިދޭސީ ފިރިހެނަކަށް ކަމަށެވެ. އިމަޖެންސީ ރޫމްގައި އޭނާއަށް ފަރުވާ ދެމުން އަންނައިރު ހާލަތު ބުނަން އަދި ނޭންގޭ ކަމަށް އޭނާ ވިދާޅުވި އެވެ.
ފިހުނު ބިދޭސީ މީހާއަކީ ރޯވި ލޯންޗެއްގައި ހުރި މީހެކެވެ.
އެ ހާދިސާގައި ހަތަރު ލޯންޗެއް ވަރަށް ބޮޑަށް އަނދާފައިވާ އިރު ކައިރީގައި އޮތް ލޯންޗަކަށް އަލިފާނުގެ އަސަރުކޮށްފައިވެ އެވެ. އެ ހާދިސާ ހިނގިއިރު އެ ސަރަހައްދުގައި ދުވުމާއި ކަސްރަތުގައި ތިބި މީހުންނަށް ބާރުއަޑުފައްގަނޑެއް އިވުނު ކަމަށް ވެ އެވެ.
އަލިފާނުގެ ހާދިސާގައި ގެއްލުންވެފައި ވަނީ ތިން މަސް ލޯންޗާއި ދެ ޕެސެންޖާ ލޯންޗަށެވެ. އެންމެ ބޮޑަށް އެނދި ކޮންމެ ލޯންޗެއްގެ އަގު ގާތްގަނޑަކަށް މިލިއަނެއްހާ ރުފިޔާ އަށް އަރާނެ ކަމަށް ބެލެވެ އެވެ.
މި ހާދިސާ ހިނގި ގޮތެއް އަދި ސާފެއް ނުވެ އެވެ. އެކަން އަންނަނީ ތަހުގީގު ކުރަމުންނެވެ.
