މެޑްރިޑް (ޖޫން 17) - ރެއާލް މެޑްރިޑަށް 16 އަހަރު ކުޅެދިނުމަށް ފަހު ތަޖުރިބާކާރު ކުޅުންތެރިޔާ ސާޖިއޯ ރާމޯސް އެ ޓީމު ދޫކޮށްލަން ނިންމާފައިވާ ކަމަށް އެ ކްލަބުން ބުނެފި އެވެ.
އުމުރުން 35 އަހަރުގެ ރާމޯސް ރެއާލް ދޫކޮށްލާނީ ހިލޭ ޓްރާންސްފާއެއްގަ އެވެ. މި މަސް ނިމުމުން ރާމޯސް ރެއާލާ އެކު ހަދާފައިވާ އެއްބަސްވުން ހަމަވާނެ އެވެ. ރާމޯސް ގުޅޭނެ ކަމަށް އެންމެ ބޮޑަށް ވާހަކަ ދެކެވެނީ ފްރާންސްގެ ޕީއެސްޖީއާ އެވެ.
ރެއާލުން ރޭ ނެރުނު ބަޔާނެއްގައި ބުނީ ރާމޯސް އެ ޓީމު ދޫކޮށްލަން ނިންމާފައިވާ ކަމަށާއި އޭނާ އަށް ކްލަބުން ދޭ ފެއާވެލްގެ ކަންތައްތައް މިއަދު ކުރިއަށްދާނެ ކަމަށެވެ. އަދި އެ ބައްދަލުވުމުގައި ރެއާލްގެ ރައީސް ފްލޮރެންޓީނޯ ޕެރޭޒް ބައިވެރިވެ ވަޑައިގަންނަވާނެ ކަމަށް ރެއާލްގެ ބަޔާނުގައިވެ އެވެ.
މި ސީޒަނުގައި ރެއާލް ހުސްއަތާ ނިންމާލަން ޖެހި އެ ޓީމުގެ މެނޭޖްމަންޓާ ދެމެދު ހުރި ނުތަނަވަސްކަމުގެ ސަބަބުން ރެއާލްގެ ކޯޗުކަން ޒިނެދިން ޒިދާން ދޫކޮށްލި އެވެ. އެ ޓީމުގެ ކޯޗަކަށް ހަމަޖެއްސީ އެވަޓަންގެ ކޯޗަކަށް ހުރި ކާލޯ އަންޗެލޮޓީ އެވެ.
އަންޗެލޮޓީ އަކީ ކުރިން ރެއާލަށް އިރުޝާދުދިން ކޯޗެކެވެ. އަންޗެލޮޓީ ވަނީ ރެއާލް ކޯޗެއްގެ ގޮތުގައި މީޑިއާ އަށް ތައާރަފްކުރަން ބޭއްވި ނޫސްވެރިންގެ ބައްދަލުވުމުގައި ރާމޯސް އެ ޓީމުގައި ބަހައްޓަން ބޭނުންވާ ކަމަށް ބުނެފަ އެވެ.
ރިޕޯޓްތައް ބުނާ ގޮތުން ރެއާލުން ރާމޯސް އަށް އެއްބަސްވުން އާ ކުރަން ދެ ގޮތެއް ހުށަހެޅި އެވެ. ފުރަތަމަ ގޮތަކީ މިހާރު ލިބޭ މުސާރަ އަށް އިތުރު އެއް އަހަރަށް އާ ކުރުމަށެވެ. ދެ ވަނަ ގޮތަކީ މިހާރު ލިބޭ މުސާރަ އަށް ވުރެ 10 ޕަސެންޓް މަދުކޮށް އިތުރު ދެ އަހަރުގެ ކޮންޓްރެކްޓެއްގައި ސޮއިކުރުމެވެ. އެކަމަކު ރާމޯސް އޭގެއިން ގޮތަކަށް އެއްބަސްނުވެ، މަޝްވަރާތައް ދިގުލައި ގޮސް އެންމެ ފަހުން އޭނާ ޓީމު ދޫކޮށްލަން ނިންމީ އެވެ.
ރާމޯސް ރެއާލަށް ބަދަލުވީ ސެވިއްޔާ ދޫކޮށް 2005 ވަނަ އަހަރު އެވެ. ރެއާލުން އޭނާގެ ސޮއި ހޯދީ 27 މިލިއަން ޔޫރޯ ދައްކައިފަ އެވެ. އެއީ އޭރު ސްޕެއިނުގެ ޑިފެންޑަރަކަށް ހޭދަކުރި އެންމެ ބޮޑު ޓްރާންސްފާ ފީ އެވެ. ރެއާލަށް 671 މެޗު ކުޅެދިން ރާމޯސް ވަނީ އެ ޓީމާ އެކު ފަސް ލީގު ތަށްޓާއި ހަތަރު ޗެމްޕިއަންސް ލީގާއި، ހަތަރު ކްލަބް ވޯލްޑް ކަޕާއި އަދި ދެ ސްޕެނިޝް ކަޕް ކާމިޔާބުކޮށްފަ އެވެ.
ރެއާލާ އެކު 22 ތަށި އުފުލާލި ރާމޯސް ވަނީ އެ ޓީމަށް 101 ގޯލު ޖަހައިފަ އެވެ. އަދި 40 ގޯލު ޖަހަން ފުރުސަތު ތަނަވަސްކޮށްދިނެވެ.
ދުނިޔޭގެ ފުޓްބޯޅައިގައި ކުޅުނު އެންމެ މޮޅު އެއް ޑިފެންޑަރު ކަމަށްވާ ރާމޯސް ވަނީ ސްޕެއިން ޓީމުގައި ވެސް ކާމިޔާބު ހޯދައިފަ އެވެ. އެ ގޮތުން 2008 އާއި 2012 ވަނަ އަހަރުގެ ޔޫރޯ އާއި 2010 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރި ޓީމުގައި ރާމޯސްގެ ދައުރު ބޮޑެވެ. ދާދި ފަހަކާ ޖެހެންދެން ސްޕެއިނުގެ ކެޕްޓަންކަން ކުރި ރާމޯސް އަށް މި ފަހަރުގެ ޔޫރޯ ސްކޮޑުން ޖާގަ ނުދިނީ އަނިޔާގެ މައްސަލަތަކުގެ ސަަބަބުން ކަމަށް ސްޕެއިނުގެ ކޯޗު ލުއިސް އެންރީކޭ ވަނީ ބުނެފަ އެވެ.
