އަތޮޅުތެރޭގައި ގެދޮރު އިމާރާތްކުރަން ބޭނުންވާ ފަރާތްތަކަށް މިރޭ ތައާރަފުކުރި ގެދޮރުވެރިޔާ ލޯނަކީ އަމިއްލަ ރަށުގައި ވަޒަންވެރިންވެގެން ދިރިއުޅެން އިހްތިޔާރުކުރުމުގެ ފުރުސަތެއް ކަމަށް ހައުސިން މިނިސްޓަރު މުހައްމަދު އަސްލަމް މިރޭ ވިދާޅުވެއްޖެ އެވެ.
ހައުސިން މިނިސްޓްރީ އަދި އެޗްޑީއެފްސީ ގުޅިގެން ހިންގާ ގެދޮރުވެރިޔާ ލޯން ސްކީމަކީ ރަށްރަށުގައި ދިރިއުޅޭ ފަރާތްތަކަށް ގެދޮރު އިމާރާތްކުރަން ދޫކުރާ ދިގު މުއްދަތުގެ އިންޓްރެސްޓް ކުޑަ ލޯނު ދޫކުރުމަށް ހިންގާ ގެދޮރުވެރިކަމުގެ ސްކީމެކެވެ. މި ލޯނުގެ ތެރެއިން ގިނަވެގެން ހަތް ލައްކަ ރުފިޔާ ގެދޮރު އިމާރާތްކުރަން ނުވަތަ މަރާމާތުކުރަން ދޫކުރެވޭނެ އެވެ.
މި ސްކީމް އިއުލާންކުރަން ބޭއްވި ރަސްމިއްޔާތުގައި އަސްލަމް ވިދާޅުވީ މި ލޯނުގެ ކެޕްގެ ގޮތުގައި ކަނޑައަޅާފައިވާ ހަތް ލައްކަ ރުފިޔާ ހަރަދުކޮށްގެން އަތޮޅުތެރޭގައި ރަނގަޅު ފެންވަރުގެ ގެޔެއް އެޅޭނެ ކަމަށެވެ.
"އަޅުގަނޑުމެން ގަބޫލުކުރާ ގޮތުގައި މީހަކު އެ މީހަކު ދިރިއުޅޭނެ ގެ އިމާރަތްކުރުމަށްޓަކައި އަތޮޅުތެރޭގައި ފަސް ލައްކަ ރުފިޔާއާ ހަތް ލައްކަ ރުފިޔާއާ ދެމެދުގެ އަދަދަކުން.. ރަނގަޅު ފެންވަރުގެ ބޯހިޔާވަހިކަމެއް ލިބިގަނެވޭ" އަސްލަމް ވިދާޅުވި އެވެ.
ލޯން ސްކީމުގެ އިންފޯގްރެފިކްސް: އަބްދުﷲ ޝަފީއު (އަބޯ) / އަދަދު
ގެދޮރުވެރިޔާ ލޯނަކީ ހަ ޕަސެންޓް އިންޓްރެސްޓް ރޭޓުގައި މަހަކު ކުޑަ އިންސްޓޯލްމަންޓެއް ދައްކައިގެން 20 އަހަރު ދުވަހުން އަދާކުރަން ޖެހޭ ލޯނެކެވެ. މިއީ މިހާރު ރާއްޖޭގައި ހުރި ކޮމާޝަލް ބޭންކުތަކާއި މާލީ އިދާރާތަކުން ދޫކުރާ ހައުސިން ލޯނުތަކުގެ އިންޓްރެސްޓް ރޭޓަށް ވުރެ ގާތްގަނޑަކަށް ދެބައިކުޅަ އެއްބައި ކުޑަ އަދަދެކެވެ.
އަސްލަމް ވިދާޅުވީ މިހާރު ލިބެން ހުރި ލޯނުތަކުގެ އިންޓްރެސްޓް ބޮޑުވުމަކީ އަތޮޅުތެރޭގައި ގެދޮރުވެރިކަމަށް އޮތް އެންމެ ބޮޑު ހުރަސް ކަމަށެވެ.
"މިއަދު އަޅުގަނޑުމެން މި ފަށާ ސްކީމް ހާއްސަ ވެގެން ދަނީ އަތޮޅުތަކުގެ ރައްޔިތުން އަތޮޅުތަކުގެ ދިރިއުޅެ އެތަންތަން އާބާދުވެ ކުރިއަރާ ގޮސް މާލެއަށް ހިޖުރަކުރުމަށް މިއޮންނަ ޝައުގުވެރިކަން ކުޑަކުރެވޭ ކަމަކަށްވާތީ މިފަށާ ލޯނުގެ އިންޓްރެސްޓް ރޭޓަކީ ހަ ޕަސެންޓް" އަސްލަމް ވިދާޅުވި އެވެ.
އަސްލަމް އިތުރަށް ވިދާޅުވީ މި ލޯނުތަކަށް އެޗްޑީއެފްސީން ކަނޑައަޅާފައިވާ ޝަރުތުތައް ހަމަވާ ހުރިހާ ފަރާތްތަކަށް ލިބޭނެ ކަމަށެވެ. އަދި މިއީ އަތޮޅުތެރޭގައި ވަޒީފާ އަދާކުރާ ޒުވާނުންނަށް އެ މީހުންގެ ގެދޮރު އިމާރާތްކުރުމަށާއި ބާވެފައިވާ އިމާރާތްތައް އާކުރަން ބޭނުންވާ މީހުންނަށް ލިބޭ ފުރުސަތެއް ކަމަށް ވިދާޅުވި އެވެ.
