ސައިކަލަކުން ވެއްޓި ގާޑިޔަލެއްގެ މުއްގަނޑުގައި ޖެހި އުމުރުން 21 އަހަރުގެ އިސްމާއިލް ޔަޒްދާން އަލީ މަރުވި އެކްސިޑެންޓުން ފިލި ކަމުގެ ތުހުމަތުވާ މީހާގެ މާބޮޑު އިހުމާލެއް އޮތް ކަމަށް އާއިލާއިން ގަބޫލު ނުކުރާ ކަމަށް ކޯޓުގައި ބުނެފި އެވެ.
ކާފިއު ގަޑީގައި ބާރުސްޕީޑްގައި ދުއްވާފައިދިޔަ ސައިކަލް އެކްސިޑެންޓްވުމަށްފަހު ވެސް ޔަޒްދާން ކޮޅަށް ތެދުވެ، ހިނގައިގަންނަ މަންޒަރު ފެންނަ ވީޑިއޯއެއް އާންމުވެފައިވެ އެވެ. އެ ވީޑިއޯގައި ފެންނަ ގޮތުން ޔަޒްދާން ހިނގައިގަތްތަނާ އެކު ވެއްޓުނެވެ. އޭރު އޭނާގެ ކަރުން ވަރަށް ގިނަ ލޭ ފައިބަމުން ދިޔަ އެވެ.
އެ ތަނުން އޭޑީކޭ ހޮސްޕިޓަލަށް ޔަޒްދާން ގެންދިޔައީ ވަނީ މަރުވެފަ އެވެ.
އެކްސިޑެންޓް ހިނގިތާ ދެ ދުވަސް ފަހުން ފުލުހުން ހައްޔަރުކޮށްފައިވަނީ ސައިކަލް ދުއްވަން އިން އަހުމަދު އާތިފް އަބްދުﷲ އެވެ. އޭނާގެ މައްޗަށް މަރުގެ ތުހުމަތު ފުލުހުން އުފުލާފައިވާއިރު، އެ ތުހުމަތުތަކަށް އޭނާ ވަނީ އިންކާރުކޮށްފަ އެވެ.
މައްސަލާގައި އެންމެ ފަހުން ބޭއްވި ބަންދު މަޖިލިސްގައި ނެރެފައިވާ ކޯޓު އަމުރުގައިވާ ގޮތުން، އާތިފްގެ ވަކީލް ވިދާޅުވެފައިވަނީ ޔަޒްދާންގެ އާއިލާއިން އޭނާ މަރުވުމުގައި އާތިފްގެ މާބޮޑު އިހުމާލެއް އޮތް ކަމަށް ނުދެކޭ ކަމަށެވެ. މައްސަލާގެ އިންވެސްޓިގޭޝަން އޮފިސަރު ވެސް ވިދާޅުވި ގޮތުގައި އާތިފް ވަނީ ޔަޒްދާންގެ އާއިލާ ކިބައިން މާފަށް އެދިފަ އެވެ.
ވަކީލް ދެން ފާހަގަ ކުރައްވާފައިވަނީ އާތިފްގެ ތިން މަހުގެ ދަރިފުޅެއް އޮންނަ ކަމެވެ. އެހެންކަމުން އޭނާ ބަންދުގައި ބެހެއްޓުމަކީ އެ ކުއްޖާއަށް އޭގެ ގެއްލުންވާނެ ކަމެއްގެ ގޮތުގަ އެވެ. މީގެކުރިން ބޭއްވި ބަންދު މަޖިލީހުގައި އާތިފް ވެސް އެކަން ފާހަގަކޮށްފައިވެ އެވެ. އެކްސިޑެންޓް ހިނގި ސަރަހައްދުން ދާން ޖެހުނު ސަބަބެއްގެ ގޮތުގައި ވެސް ދެއްކީ ތިން މަހުގެ ދަރިފުޅެވެ.
ބަންދުގެ މަޖިލީހުގައި އޭނާ ބުނިގޮތުގައި، އެ އެކްސިޑެންޓާ ގުޅިގެން ހައްޔަރުކޮށް ބަންދުގައި ހުންނަން ޖެހިއްޖެ ނަމަ ތިން މަހުގެ ދަރިއަށް އަޅާލާނެ މީހަކު ނުހުންނާނެ އެވެ.
މިދިޔަ ބުރާސްފަތި ދުވަހު ބޭއްވި ބަންދު މަޖިލީހުގައި މައްސަލާގެ އިންވެސްޓިގޭޝަން އޮފިސަރު ވިދާޅުވި ގޮތުގައި، އާތިފް ސައިކަލް ދުއްވާފައިދިޔައީ ބާރު ސްޕީޑް ކަމަށެވެ. އެކަން އެނގޭނެ ސީސީޓީވީ ފުޓޭޖްތައް ވެސް ލިބިފައިވާ ކަމަށް ވިދާޅުވި އެވެ. ނަމަވެސް، އެ ވީޑިއޯތައް އެނަލައިޒްކޮށް އަދި ނުނިމޭކަން ފާހަގަ ކުރެއްވި އެވެ.
ވަކީލާއި އައިއޯގެ ވާހަކަތައް އަޑުއެއްސެވުމަށްފަހު، ގާޒީ އާދަމް މުހައްމަދު ނިންމެވީ އާތިފްގެ ބަންދަށް އިތުރު 15 ދުވަސް ޖެހުމަށެވެ. މީގެކުރިން އޭނާ ހުރީ 10 ދުވަހުގެ ބަންދެއްގަ އެވެ.
ބަންދަށް 15 ދުވަސް ޖަހަން ގާޒީ ނިންމެވީ، އާތިފްގެ މައްޗަށް ތުހުމަތު ކުރެވޭ މިންވަރަށް ހެކި ލިބިފައިވުމާއި އޭނާ ދޫކޮށްލައިފިނަމަ މުޖުތަމައުއަށް ނުރައްކާވެދާނެ ކަމަށް ފެންނާތީ އެވެ.
