ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެމްބަރު އަހްމަދު އީސައާ ދެކޮޅަށް ފުލުހުންނަށް މައްސަލަ ހުށަހަޅައި ބަޔާން ދިނީ ޖެހުނު މައްސަލައެއްގެ ރުޅި އާއި ޖަޒުބާތުގައި ކަމަށް ވިދާޅުވެ ދައުވާ ކުރިއަށް ނުގެންދަން އަނބިކަނބަލުން އަސްރާ ނަސީމް ޕްރޮސިކިއުޓަ ޖެނެރަލްގެ އޮފީހުގައި އެދިވަޑައިގެންފި އެވެ.
އަސްރާގެ ސިޓީއެއް ލިބިފައިވާކަން ޕީޖީ އޮފީހުގެ އޮފިޝަލަކު މިއަދު ކަށަވަރުކޮށްދެއްވި އެވެ. ނަމަވެސް ތަފްސީލެއް ނުދެއްވަ އެވެ. މީގެ ކުރިން އަސްރާ ވަނީ އެ މައްސަލައިގެ ތަހުގީގު ކުރިއަށް ނުގެންދަން ފުލުސް އޮފީހުގައި ވެސް އެދިވަޑައިގެންފަ އެވެ.
އަސްރާއަށް އީސަ އަނިޔާކުރި ކަމަށް ތުހުމަތުކުރި މައްސަލަ ޕީޖީން ކްރިމިނަލް ކޯޓުގައި ދައުވާ އުފުލައި އަންނަ ހޯމަ ދުވަހު ޝަރީއަތް ކުރިއަށް ގެންދަން އޮތީ ޝެޑިއުލްކޮށްފަ އެވެ.
ޕީީޖީ އޮފީހުގައި އަސްރާ އެދިވަޑައިގަތީ, އެނގިފައިވާ ގޮތުގައި, މައްސަލަ ކޯޓުގައި ކުރިއަށް ނުގެންގޮސް ނިންމާލުމަށެވެ. ސަބަބަކީ އެ މައްސަލައިގައި އީސަގެ މައްޗަށް ޝަރީއަތުން ހުކުމެއް އައުން އިންސާފުވެރި ނޫން ކަމަށް ވިދާޅުވެ އެވެ.
އެނގިފައިވާ ގޮތުގައި ސިޓީގައި އަސްރާ ވިދާޅުވީ މައްސަލަ ޕޮލިހަށް ހުށަހެޅީ އުފެދުނު ދެބަސްވުމެއްގައި ކަމަށެވެ. މިކަމުގައި ފުލުސް އޮފީހަށް ގޮސް ބަޔާން ދިނީ ޖަޒުބާތުގައި ކަމަށް ވެސް އަސްރާ ވަނީ ޕީޖީ އޮފީހުގައި ވިދާޅުވެފަ އެވެ.
އަސްރާ ވިދާޅުވީ މައްސަލައިގައި ކަން ވީ ގޮތް އެންމެ ފަހުން ފުލުސް އޮފީހަށް ދިން ބަޔާނުގައި ކިޔައިދީފައިވާނެ ކަމަށާއި ދިމާވި މައްސަލަ ދެމަފިރިންނަށް ވާހަކަ ދައްކައިގެން ހައްލުކުރެވޭނެ އެވެ. އަދި މިކަމުގައި އިސްކުރަން ބޭނުންވަނީ ދަރިފުޅުގެ މަސްލަހަތު ކަމަށް ވެސް ވިދާޅުވި އެވެ.
ގެވެށި އަނިޔާގެ ތުހުމަތުކޮށް، ފަހުން އީސަގެ ދިފާއުގައި ތެދުވެވަޑައިގެން މައްސަލަ ކުރިއަށް ނުގެންދަން އަސްރާ ބޭނުންވާއިރު، އަނިޔާއާ ގުޅިގެން ފޭސްބުކްގައި ކުރިން ލިއުއްވި ޕޯސްޓެއްގައި ވިދާޅުވީ އެ ހާދިސާ އިން އޭނާ އާއި ދަރިފުޅަށް އުނދަގޫ އިހްސާސްތަކެއް ކުރަން ޖެހުނު ކަމަށެވެ. އަދި އެއީ، ދުވަހަކު ވެސް ކުރިމަތިވެދާނެ ކަަމަށް ހީކުރެއްވި ތަޖުރިބާތަކެއް ނޫން ކަމަށް ވިދާޅުވި އެވެ.
އެ ތުހުމަތުތަކަށް އިންކާރު ކުރައްވައި އީސަ ވިދާޅުވެފައި ވަނީ ގާނޫނުތަކާއި ގަވާއިދުތަކާ ހިލާފު އެއްވެސް އަމަލެއް ކޮށްފައި ނުވާނެ ކަމުގެ ޔަގީންކަން އަރުވާ ކަމަށެވެ. މި މައްސަލައިގައި ފާޑުކިއުން އަމާޒުވެ ޕްރެޝާ ބޮޑުވުމުން އޭނާ ވަނީ އިޖުތިމާއީ ކޮމިޓީގެ މުގައްރިރު ކަމުން ވެސް އިސްތިއުފާ ދެއްވައިފަ އެވެ. އެއީ، އޭނާއަށް ތުހުމަތުކުރާ ގެވެށި އަނިޔާގެ މައްސަލައެއް ބަލާތީ، މުއައްސަސަތަކަށް އެއްބާރުލުން ދެއްވުމުގެ ގޮތުން ކަަމަށެވެ.
އީސަގެ މައްޗަށް އުފުލާފައިވާ ކުށުގެ އަދަބަކީ، ހަ މަސް ދުވަހަށް ވުރެ ދިގުނޫން މުއްދަތަކަށް ޖަލަށްލުމެވެ. ޖޫރިމަނާގެ އަދަބު ކަނޑައަޅާ ނަަމަ، އަދަބަކީ 24،000 ރުފިޔާއިން ޖޫރިމަނާ ކުރުމެވެ.
މި މައްސަލަ ސާބިތުވި ނަމަވެސް އީސަގެ ގޮނޑިއެއް ނުގެއްލޭނެ އެވެ. އެއީ ގާނޫނުއަސާސީގައި ބުނެފައިވާ ގޮތުން، މެމްބަރެއްގެ ގޮނޑި ގެއްލޭނީ އެ މީހެއްގެ މައްޗަށް 12 މަހަށް ވުރެން ދިގު މުއްދަތެއްގެ ޖަލު ހުކުމެއް އައުމުންނެވެ.
