ބީއެމްއެލް މޮބައިލް ބޭންކިންގެ އެޕަށް ބޮޑެތި ބަދަލުތަކެއް ގެނެސްގެން އާ ހިދުމަތްތަކާއެކު އަންނަ ހޮނިހިރު ދުވަހު ތައާރަފުކުރަން ބޭންކް އޮފް މޯލްޑިވްސް (ބީއެމްއެލް)އިން ތައްޔާރުވެއްޖެ އެވެ.
ބީއެމްއެލްގެ އާ މޮބައިލް ބޭންކިން އެޕަކީ ބޭންކުގެ މައިގަނޑު ހުރިހާ ހިދުމަތެއް ކަސްޓަމަރުންނަށް ލިބޭ ގޮތަށްފަރުމާކޮށްފައިވާ އެޕެކެވެ.
މި އެޕްގެ ބީޓާ ވާޝަން ބަލާލުމުގެ ފުރުސަތު "އަދަދު"ގެ ނޫސްވެރިންނަށް ލިބުނެވެ؛
އާ އެޕުގައި ބޭންކުގެ ކަސްޓަމަރުން އާންމުކޮށް ޝަކުވާކުރާ ހުރިހާ ކަމަކަށް ހައްލު ލިބޭ ފީޗާތަކާއި ހިދުމަތްތައް އެބަ ހުއްޓެވެ. އަދި، މީގެ ކުރިން މޮބައިލް ބޭންކިން އެޕުން ކަސްޓަމަރުންނަށް ނުކުރެވޭ ގިނަ ކަންތައްތަކެއް އާ އެޕް މެދުވެރިކޮށް ކުރެވެ އެވެ.
ބީއެމްއެލް މޮބައިލް ބޭންކިން އެޕްގެ އަޕްގްރޭޑްގައި ހިމެނޭ ބައެއް ފީޗާތަކުގެ ތެރޭގައި ކޮންމެހެން އެކައުންޓް ނަމްބަރު ސޭވް ނުކޮށް އެޕްގެ މެދުވެރިކޮށް ފައިސާ ފޮނުވާ ކުއިކް ޕޭ ފީޗާ އަދި ފަސޭހައިން ރިސިޓްތައް ރައްކާކުރެވޭ ފީޗާ ހިމެނެ އެވެ.
އޭގެ އިތުރުން ކުރިން އިންޓަނެޓް ބޭންކިންއިން އެކަނި ލިބޭ ގިނަ ހިދުމަތްތަކެއް ސީދާ އެޕުން ލިބޭނެ އެވެ.
މިފަހަރުގެ އެޕްގެ އެންމެ ހާއްސަ އެއް ފީޗާއަކީ ޕާސަނަލް އެކައުންޓާއި، ޖޮއިންޓް އެކައުންޓާއި ވިޔަފާރީގެ ބިޒްނަސް ޕްރޮފައިލްތައް އެޕާ ގުޅާލެވޭތީ އެވެ. އެޕުގެ ތެރެއިން ހުރިހާ އެކައުންޓްތަކެއްގެ މުއާމަލާތްތައް ބީއެމްއެލްގެ ކަސްޓަމަރުންނަށް ކުރެވޭނެ އެވެ.
އަދި، މޮބައިލް ބޭންކިން އެޕުން ކްރެޑިޓް ކާޑް އަދި ޑެބިޓް ކާޑްގެ ހާއްސަ ހިދުމަތްތައް ވެސް ލިބެ އެވެ. އޭގެ ތެރޭގައި ޕިން ބަދަލުކުރުމުން ފެށިގެން ގޮސް ޓެމްޕަރަރީ ކާޑް ސަސްޕެންޝަން އަދި ދާއިމީކޮށް ކާޑު ކެންސަލް ކުރުން ހިމެނެ އެވެ.
ބީއެމްއެލްއިން އަންނަނީ އެ ބޭންކުގެ ސޯޝަލް މީޑިއާ އެކައުންޓްތަކުން އެޕްގެ ޓީޒާތައް ދޫކުރަމުންނެވެ.
މިއީ ބީއެމްއެލްގެ ހިދުމަތްތައް ޒަމާނީ ޓެކްނޮލޮޖީތަކުން އެ ބޭންކުން ކަސްޓަމަރުންނަށް ފޯރުކޮށްދޭ ހިދުމަތްތައް އިތުރަށް ފުރިހަމަކުރުމަށް އެ ބޭންކުން ކުރި މަސައްކަތެކެވެ. އަދި، ބޭންކުގެ އެންމެ ބޮޑު އަމާޒަކީ ހިދުމަތްތައް ޑިޖިޓަލްކޮށް، ލުއިފަސޭހަ ކަމާއެކު ހިދުމަތް ދިނުމަށާއި ކަސްޓަމަރުން ކޮންމެތާކު ހުރެގެން ވެސް ބޭންކިން ހިދުމަތް ހޯދެނޭ ގޮތް މަގުފަހިކޮށް ދިނުމެވެ.
