ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ހަމަލާއާ ގުޅިގެން ތަފާތު އެކި ވާހަކަތައް ދެއްކުމުގެ ސަބަބުން އޭގެ އަސްލު ގެއްލޭ ހިސާބަށް ކަންކަން ގޮސްފައިވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރައީސް ސޯލިހު މިހެން ވިދާޅުވެފައިމިވަނީ ހަމަލާއާ ގުޅިގެން ރައްޔިތުންގެ މަޖިލީހުގެ 241 ކޮމިޓީން ކުރިއަށް ގެންދާ އިންކުއަރީއާއެކު، އެމްޑީޕީގެ ތެރޭގައި ދެމެދު ނުތަނަވަސްކަމެއް އުފެދިފައިވާ ދަނޑިވަޅެއްގަ އެވެ. އެ ނުތަނަވަސްކަމުގެ އަސްލަކީ، އިންކުއަރީއަށް ވަކިވަކި ސިފައިން ހާޒިރުކުރުމަށް ކޮމިޓީން ނިންމާފައިވަނިކޮށް އެކަމަށް ޑިފެންސް މިނިސްޓްރީން ދެކޮޅު ހެދުމެވެ.
ޑިފެންސް މިނިސްޓްރީން އެކަން އަންގައި ފޮނުވި ސިޓީގައި ސޮއި ކުރެއްވި އެ މިނިސްޓްރީގެ ނައިބު ހަސަން ޒަމީލުގެ މައްޗަށް ދައުވާކޮށް ދޭން ވެސް ރައީސް ނަޝީދު އެދިވަޑައިގެންނެވި އެވެ. އަދި، އެ މައްސަލަ މަޖިލީހުގެ ސުލޫކީ ކޮމިޓީއަށް ވެސް އެމަނިކުފާނު ވިދާޅުވެގެން ހުށަހެޅި އެވެ. ނަމަވެސް، އެމްޑީޕީގެ ހަތަރު މެންބަރުންގެ ވޯޓާއެކު އެ މައްސަލަ ބޭރުކޮށްލި އެވެ.
އެއާއެކު، ރައީސް ނަޝީދު ވަނީ ވަރަށް ބޮޑަށް ނުރުހުންވެވަޑައިގެން، ރައީސް ސޯލިހަށް ބޮޑު ތުހުމަތެއް ވެސް ކުރައްވާފަ އެވެ. އެގޮތުން ރައީސް ނަޝީދު ވަނީ ރައީސް ސޯލިހު ފޮރުވަން އުޅެނީ ކޮން ކަމެއްތޯ ސުވާލު އުފައްދަވާފަ އެވެ. އަދި، ވަކިވަކިން ސިފައިން ހާޒިރުނުކުރަން އުޅެނީ ސީދާ ރައީސް ސޯލިހު އިސްވެ ހުންނަވައިގެން ކަމަށް ވިދާޅުވެފަ އެވެ.
މަޖިލީހުގެ ނައިބު ރައީސް އީވާ އަބްދުﷲ ވެސް ވަނީ އެކަމާ ހިތްހަމަނުޖެހިވަޑައިގެން، "މާތްކަލާކޯ މިއީ ވާ ސަރުކާރެއް،" ކަމަށް ވިދާޅުވެ، ސަރުކާރާމެދު ހިތްހަމަނުޖެހުން ހާމަކުރައްވާފަ އެވެ. ނަމަވެސް، އެ މައްސަލާގައި 241 ކޮމިޓީގެ މުގައްރިއްރު ވަނީ ނަޝީދާއި އީވާއަށް ގުޅުއްވައި ކަންބޮޑުވުން ފާޅު ކުރައްވާފަ އެވެ.
އެގޮތުން، ކޮމިޓީގެ އިންކުއަރީއާ ގުޅިގެން ޒަމީލުގެ މައްސަލަ ހުށަހެޅުމަކީ ކަންބޮޑުވާ ކަމެއް ކަމަށް އޭނާ ވިދާޅުވެފައިވެ އެވެ. އަދި، ސަރުކާރާއި ރައީސް ސޯލިހު ވެސް އިންކުއަރީއަށް ހުރަސް އަޅަން އެއްވެސް ކަމެއް ނުކުރައްވާ ކަމަށް ވިދާޅުވެ، ސިފައިންގެ ފަރާތުން ވެސް ފުރިހަމަ އެއްބާރުލުން ލިބެމުންދާ ކަމަށް އަސްލަމް ވިދާޅުވެފަ އެވެ.
އެމްޑީޕީ އިސްބޭފުޅުންގެ މެދުގައި މި ނުތަނަވަސްކަން އޮތްވައި ރައީސް ސޯލިހު މިއަދު ބޭއްވި ނޫސްވެރިންގެ ބައްދަލުވުމުގައި ވިދާޅުވި ގޮތުގައި، ރައީސް ނަޝީދަށް އަމާޒުކޮށް ދިން ހަމަލާއަކީ ވަރަށް ނުރައްކާތެރި ބިރުވެރިކަމެކެވެ. އެއީ، ރާއްޖޭގައި އެފަދަ ކަމެއް ދެވަނަ ފަހަރަށް ތަކުރާރު ވެގެން ނުވާނެ ވަރުގެ ބިރުވެރިކަމެއް ކަމަށެވެ.
ނަމަވެސް، އެފަދަ ކަމެއްގެ އަސްލު ގެއްލިގެންދާ މިންވަރަށް ވާހަކަތައް އެނބުރެމުންދާ ކަމުގެ ކަންބޮޑުވުން ރައީސް ފާޅުކުރެއްވި އެވެ.
"މިހާރު އޭގެ ވަށައިގެން ހުރި ކަންކަމަށް އަމާޒުކޮށް އެކި ދިމަދިމާލުން ވާހަކަ ދައްކަމުން ގޮސް މުޅި މައްސަލައިގެ އަސްލު ގެއްލޭ ހިސާބަށް އެބަދޭ،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި، އެންމެންގެ ވެސް އަމާޒަކަށް ވާންވީ އެފަދަ ކަމެއް ހިނގިޔަ ނުދިނުމަށްޓަކައި ކުރެވެން ހުރި މަސައްކަތްތަކެއް ކުރުމެވެ. އަދި، އެކަމުގައި ޝާމިލުވަނީ ކޮން ބައެއްތޯ ކަމާއި އެއީ ކޮން މަގުސަދެއްގައި ކިހާ ފައިސާއެއް ހިމެނިގެން ހިނގައިދިޔަ ކަމެއްތޯ ބެލުމަކީ މިހާރު އޮތް އެންމެ މުހިންމު މަސައްކަތުގެ ގޮތުގައި ރައީސް ސިފަ ކުރެއްވި އެވެ.
އެކަމަކު ފެންނަނީ އޭގެން ވަރަށް ބޮޑަށް ނެއްޓި މުޅިން އެހެން ދިމާލަކަށް އަމާޒު ހިފާފައިވާ ތަން ކަމަށް ރައީސް ވިދާޅުވި އެވެ.
"އެހެން ނުހެއްދުވުމަށް އަޅުގަނޑު ވަރަށް ބޮޑަށް އެދެން ހުރިހާ ބޭފުޅުންގެ ކިބައިން ވެސް،" ރައީސް ވިދާޅުވި އެވެ.
ރައީސް ސޯލިހު ވަނީ އެމަނިކުފާނު، މަޖިލީހުގެ އިންކުއަރީއަށް ހުރަސް އަޅުއްވަން މަސައްކަތް ކުރައްވާ ކަމަށް ކުރެވޭ ތުހުމަތުތަކަށް ވެސް ޖަވާބު ދެއްވާފަ އެވެ. ރައީސް ސޯލިހު ވިދާޅުވި ގޮތުގައި، އިންކުއަރީ އެންމެ ފުރިހަމައަށް ގެންދިއުމަށް ސަރުކާރުން ވެސް އެދޭ ކަމަށާއި އެކަމަށް ސަރުކާރުން އެއްވެސް ހުރަހެއް ނާޅާނެ ކަމަށެވެ.
"ރައީސް ނަޝީދަށް އެނގިވަޑައިގަންނަވާނެ އަޅުގަނޑު ހުރަސް ނާޅާނެކަން، އެހެން އަދި ވިދާޅުވެފައި އޮތް ނަމަވެސް،" ރައީސް ސޯލިހު ވިދާޅުވި އެވެ.
ރައީސް ސޯލިހު ވިދާޅުވި ގޮތުގައި ވަކިވަކި ސިފައިންނަށް ފަރުދީ ގޮތުން ޖަވާބުދާރީ ނުވެވޭނެ ކަމަށް ބުނެ ޑިފެންސް މިނިސްޓްރީން ނެރުނު ބަޔާނަކީ ސިފައިންގެ ގާނޫނަށް ރިއާޔަތް ކުރުމަށްފަހު ނެރުނު ބަޔާނެއް ކަމަށެވެ. އެ ބަޔާނަށްފަހު ވެސް ސިފައިން އަންނަނީ އިންކުއަރީއަށް ފުރިހަމައަށް އެއްބާރުލުން ދެމުންކަން ރައީސް ފާހަގަ ކުރެއްވި އެވެ.
މިއީ ސިޔާސީ ހަލަބޮލިކަމަށް ދާންވީ ވަގުތެއް ނޫން: ރައީސް
ރައީސް ސޯލިހު ވިދާޅުވި، ގޮތުގައި މިހާރު ރާއްޖެ މިއޮތީ ސިޔާސީ ހަލަބޮލިކުރަން ޖެހޭ ހާލަތެއްގައި ނޫނެވެ. ގައުމުގައި މާބޮޑެތި މައްސަލަތަކާއި ހައްލު ކުރަން ޖެހޭ އެތައް ކަމެއް އެބަ އޮތް ކަމާއި މިއީ އެކަމަށް ވަގުތު ދޭންވީ ދަނޑިވަޅު ކަމަށް ރައީސް ވިދާޅުވި އެވެ.
"މިއީ ވަރަށް ރަނގަޅު ފުރުސަތެއް މި ގައުމު ސަލާމަތް ކުރުމަށް، ސަރުކާރާއި މަޖިލީހާއި އެކީގައި މަސައްކަތް ކޮށްގެން ގައުމު ވެއްޓިފައި މިއޮތް އަނދަވަޅުން ސަލާމަތް ކުރުމަށް ކުރެވެން ހުރި ވަރަށް ބައިވަރު މަސައްކަތް އެބަހުރި،" ރައީސް ވިދާޅުވި އެވެ.
"އަޅުގަނޑުގެ އެދުމަކީ އެކަމުން އަމާޒު ހިފައިގެން ހުރިހާ ބޭފުޅުން ކުރިއަށް ވަޑައިގެންނެވުން،"
އެމްޑީޕީއަށް ކާމިޔާބުވީ އެންމެންގެ މަސައްކަތުން
ރައީސް ވަނީ ރައްޔިތުންގެ މަޖިލީހަށް މިހާރު އިންތިހާބުވެފައިވާ މެންބަރުން އިންތިހާބުވީ ރައީސް ނަޝީދުގެ ފޮޓޯ ޖަހައިގެން ކަމަށް ބުނެ ފެންމަތިކުރުވި ވާހަކަތަކަށް ވެސް މިއަދު ރައްދު ދެއްވާފަ އެވެ.
އެ ވާހަކަތައް ފެންމަތިވެގެން ދިޔައީ ޑެޕިއުޓީ މިނިސްޓަރު ޒަމީލުގެ މައްސަލަ ބޭރުކޮށްލުމަށް އެމްޑީޕީގެ ހަތަރު މެންބަރަކު ވޯޓު ދެއްވުމުން، އެއީ ރައީސް ނަޝީދާ ދެކޮޅަށް، ރައީސް ސޯލިހު އަންގަވައިގެން ކުރެއްވި ކަމެއް ކަމަށް ބުނެ އެވެ. ނަމަވެސް، އެ މެންބަރުން ވެސް އިންތިހާބުވީ ރައީސް ނަޝީދުގެ އެހީއާއެކު ކަމަށް ބުނެ އެމްޑީޕީގެ އެހެން ބައެއް މެންބަރުން ފާޑުވިދާޅުވި އެވެ.
އެކަމަށް ޖަވާބު ދެއްވަމުން ރައީސް ސޯލިހު މިއަދު ވިދާޅުވި ގޮތުގައި، ރައްޔިތުންގެ މަޖިލީހުގައި އެމްޑީޕީއަށް 65 ގޮނޑި ލިބުނީ ސަރުކާރާއި އެންމެން ވެގެން ވަރަށް ގިނަ ބައެއްގެ މަސައްކަތުން ކަމަށެވެ. އެހެން ނޫންނަމަ އެވަރުގެ ބޮޑު އަދަދެއް ކާމިޔާބު ވެގެން ދާނެ ނުދާނެ ކަމަށެވެ.
އޭގެ ހެއްކެއްގެ ގޮތުން ރައީސް ސޯލިހު ދެއްކެވީ 2009 ވަނަ އަހަރާއި 2014 ވަނަ އަހަރު ބޭއްވި މަޖިލިސް އިންތިހާބުގެ ނަތީޖާ އެވެ. ރައީސް ސޯލިހު ވިދާޅުވި ގޮތުގައި އެ ދެ އިންތިހާބާއި އެންމެފަހުން 2019 ވަަނ އަހަރު އޮތް ރައްޔިތުންގެ މަޖިލީހުގެ އިންތިހާބު ނަތީޖާއަށް ބަލާއިރު، މިފަހަރު ލިބުނީ މާބޮޑު ކާމިޔާބީއެއް ކަމަށެވެ.
"އެއީ ވަރަށް ގިނަ ބައެއްގެ މަސައްކަތް، އޭގެ ތެރޭގައި ރައީސް ނަޝީދު ވެސް ހިމެނިވަޑައިގަންނަވާ، އެންމެ ބޮޑަށް މަސައްކަތް ކުރެއްވި ބޭފުޅަކީ އެއީ ކަމަށް އަޅުގަނޑު ވެސް ދެކެނީ،" ރައީސް ސޯލިހު ވިދާޅުވި އެވެ. "އަދިވެސް އޭގެއިތުރުން ވަރަށް ގިނަ ބައެއްގެ މަސައްކަތުން އަޅުގަނޑުމެންނަށް އާދެވިފައި އޮތް ހިސާބެއް މިއީ،"
