ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ހަމަލާއާ ގުޅޭ ގޮތުން މަޖިލީހުން ހިންގާ އިންކުއަރީއަށް ހުރަސް އަޅަން ސަރުކާރުން މަސައްކަތް ކުރާ ކަމަށް އެމަނިކުފާނު ތުހުމަތު ކުރައްވާފައިވުމުން ރައީސް އިބްރާހިމް މުހައްމަދު ސޯލިހު މިއަދު ރައްދު ދެއްވައިފި އެވެ.
މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީއަށް ހާޒިރުވާން ވަކިވަކި ސިފައިންނަށް އަންގާފައިވީ ނަމަވެސް، ޑިފެންސް މިނިސްޓްރީން ވަނީ އެކަމަށް ދެކޮޅު ހެދި އެވެ. އެކަން އެގޮތަށް މަޖިލީހަށް އެންގި ސިޓީގައި ސޮއި ކުރެއްވި ޑިފެންސް މިނިސްޓްރީގެ ނައިބު ހަސަން ޒަމީލްގެ މައްސަލަ މަޖިލީހުގެ އިމްތިޔާޒާއި ސްލޫކާ ބެހޭ ކޮމެޓީއަށް ހުށަހެޅި އެވެ. ނަމަވެސް, އެ ކޮމެޓީން އެމްޑީޕީގެ ހަތަރު މެންބަރެއްގެ ވޯޓާއެކު ބޭރުކޮށްލި އެވެ.
އެއާއެކު، އެމްޑީޕީގެ ތެރޭގައި ނުތަނަވަސްކަން ބޮޑުވި އެވެ. އެމްޑީޕީ ގައުމީ މަޖިލީހުގެ ވަޓްސްއަޕް ގުރޫޕް ހޫނުވެފައިވަނިކޮށް ރައީސް ނަޝީދު މެސެޖެއް ކަމަށް ވިދާޅުވެ، އެމްޑީޕީގެ ޗެއާޕާސަން ހަސަން ލަތީފު މެސެޖެއް ވެސް ފޮނުއްވި އެވެ.
"މިއީ ރައީސް ނަޝީދު، ރައީސުލްޖުމްހޫރިއްޔާ ލޮބީ ކުރައްވައިގެން އެމްއެންޑީއެފްގެ ވަކިވަކި ސިފައިން 241 އަށް ހާޒިރު ވިޔަ ނުދޭން މަސައްކަތް ކުރައްވާ ސަބަބެއް އެއްގޮތަކަށް ވެސް ނުވިސްނޭ،" ނަޝީދުގެ އެ މެސެޖުގައިވެ އެވެ.
އޭގެ އިތުރުން ކޮން ކަމެއް ސިއްރު ކުރައްވަންތޯ އުޅުއްވަނީ ކަމަށް ވިދާޅުވެ، ރައީސް ސޯލިހަށް ނަޝީދު ސުވާލެއް ވެސް އަމާޒުކުރެއްވި އެވެ.
ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ސުވާލު ކުރުމުން ރައީސް ސޯލިހު މިއަދު ވިދާޅުވި ގޮތުގައި، އިންކުއަރީ އެންމެ ފުރިހަމައަށް ގެންދިއުމަށް ސަރުކާރުން ވެސް އެދޭ ކަމަށާއި އެކަމަށް ސަރުކާރުން އެއްވެސް ހުރަހެއް ނާޅާނެ ކަމަށެވެ. އެކަން މައްސަލަ ކުރިއަށް ގެންދާ 241 ކޮމިޓީގެ މުގައްރިރު މުހައްމަދު އަސްލަމް ވެސް ވިދާޅުވެފައިވާކަން ރައީސް ފާހަގަ ކުރެއްވި އެވެ.
"ރައީސް ނަޝީދަށް އެނގިވަޑައިގަންނަވާނެ އަޅުގަނޑު ހުރަސް ނާޅާނެކަން، އެހެން އަދި ވިދާޅުވެފައި އޮތް ނަމަވެސް،" ރައީސް ސޯލިހު ވިދާޅުވި އެވެ.
ރައީސް ސޯލިހު ވިދާޅުވި ގޮތުގައި ވަކިވަކި ސިފައިންނަށް ފަރުދީ ގޮތުން ޖަވާބުދާރީ ނުވެވޭނެ ކަމަށް ބުނެ ޑިފެންސް މިނިސްޓްރީން ނެރުނު ބަޔާނަކީ ސިފައިންގެ ގާނޫނަށް ރިއާޔަތް ކުރުމަށްފަހު ނެރުނު ބަޔާނެއް ކަމަށެވެ. އެ ބަޔާނަށްފަހު ވެސް ސިފައިން އަންނަނީ އިންކުއަރީއަށް ފުރިހަމައަށް އެއްބާރުލުން ދެމުންކަން ރައީސް ފާހަގަ ކުރެއްވި އެވެ.
އިންކުއަރީ ހިންގާ ކޮމިޓީގެ މުގައްރިރު އަސްލަމް އިއްޔެ ވިދާޅުވި ގޮތުގައި ސަރުކާރުން ވެސް އަދި ދައުލަތުގެ އެއްވެސް މުއައްސަސާއަކުން ވެސް އިންކުއަރީއަށް ހުރަސް އެޅުމަށް އެއްވެސް މަސައްކަތެއް ކުރާ ކަމުގެ މައުލޫމާތު ލިބިފައިނުވާ ކަމަށެވެ.
އޭގެ ބަދަލުގައި ހުރިހާ މުއައްސަސާއަކުން ވެސް ކޮމިޓީގެ އިންކުއަރީއަށް ފުރިހަމައަށް އެއްބާރުލުންދެމުންދާ ކަމަށް ވިދާޅުވި އެވެ. އެގޮތުން، ކޮމިޝަނާ އޮފް ޕޮލިސް މުހައްމަދު ހަމީދާއި ޗީފް އޮފް ޑިފެންސް ފޯސް އަބްދުﷲ ޝަމާލު ވެސް ކޮމިޓީއަށް ހާޒިރުވެވަޑައިގެން، ހުރިހާ ސުވާލުތަކަށް ޖަވާބު ދެއްވައި، އެ ދެ މުއައްސަސާގެ ފުރިހަމަ އެއްބާރުލުން ކޮމިޓީއަށް ދޭނެ ކަމުގެ ޔަގީންކަން ދެއްވާފައިވާ ކަމަށް އަސްލަމް ވިދާޅުވި އެވެ.
"ސަރުކާރުން މި އިންކުއަރީއަށް ހުރަސް އެޅުމަށް އެއްވެސް މަސައްކަތެއް އެއްވެސް މިންވަރަކަށް ކުރާ ކަމެއްގެ މައުލޫމާތު އަޅުގަނޑަށް ލިބިފައެއް ނެތް، ސަރުކާރުގެ ހުރިހާ މުއައްސަސާތަކަށާއި އަޅުގަނޑުމެން މުއާމަލާތް ކުރަމުންދާ އިދާރާތަކަށް ޝުކުރު ދަންނަވަން ބޭނުން،" އަސްލަމް ވިދާޅުވި އެވެ.
އަސްލަމް ވިދާޅުވި ގޮތުގައި، ރައީސް ސޯލިހު ވެސް ގުޅުއްވައި، ފުރިހަމައަށް އިންކުއަރީ ކުރިއަށް ގެންދިޔުމަށް އެދިވަޑައިގެންފައިވާ ކަމަށެވެ. އޭނާ ވިދާޅުވި ގޮތުގައި ރައީސް ނަޝީދަށް ވެސް އަދި އެހެން ހުރިހާ ބޭފުޅުންނަށް ވެސް އެންމެ ރަނގަޅު ވާނެ ގޮތަކީ މި އިންކުއަރީ ފުރިހަމަ ގޮތުގައި ކުރިއަށް ގެންދެވުން ކަމަށެވެ.
"އެހެންވީމަ އެ މަގުގައި ހުރިހާ ބޭފުޅުން ވެސް މަސައްކަތް ކުރީމަ ހުންނާނީ ރަނގަޅަށް،" އަސްލަމް ވިދާޅުވި އެވެ.
