ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓު ހަމަލާގެ ތަހުގީގުގެ ކަންކަން ހިނގައިދާ ގޮތް ގާތުން ބަލައި ފާރަވެރިވުމަށް "މޭ ހައެއް" ނަމުގައި ކޮމިޓީއެއް އުފެއްދުމަށް އެމްޑީޕީގެ ގައުމީ މަޖިލީހަށް ގަރާރެއް ހުށަހަޅަން ނިންމައިފި އެވެ.
މި ގަރާރު ފާސްކުރަން ގައުމީ މަޖިލީހުގެ ޖަލްސާއެއް ބާއްވަން ނިންމާފައި ވަނީ އަންނަ ބުރާސްފަތި ދުވަހުގެ ރެ އެވެ. އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ހުށަހަޅުއްވާ ގަރާރަށް ތާއީދު ކުރައްވަނީ މާލޭ ސިޓީ ކައުންސިލްގެ މެމްބަރު މުހައްމަދު ސައިފް ފާތިހެވެ.
ހަމަލާގެ ތަހުގީގާ ގުޅޭ ކަންކަން ބަލަން އުފައްދާ ކޮމިޓީގައި، ރައީސުލްޖުމްހޫރިއްޔާ ކަނޑައަޅުއްވާ މެމްބަރަކާއި ރައީސް ނަޝީދުގެ ފަރާތްޕުޅުން މެމްބަރަކު ހިމަނަން ވަނީ ނިންމައިފަ އެވެ. މީގެ އިތުރުން ކޮމިޓީއަށް ހުށަހަަޅަން ނިންމާފައި ވަނީ އެމްޑީޕީގެ ޗެއާޕާސަން ހަސަން ލަތީފާއި ރައީސުލްޖުމްހޫރިއްޔާގެ އެޑްވައިޒަރު މުހައްމަދު ޝިހާބާއި އަހްމަދު މައުސޫމްގެ ނަމެވެ.
ކޮމިޓީއެއް އުފައްދަން ގައުމީ މަޖިލީހަށް ހުށަހަޅަން ނިންމީ، އެނގިފައިވާ ގޮތުގައި، މަޖީދީ މަގުގައި ބޮން ގޮއްވާލައިގެން ދިން ހަމަލާ ހިނގި ގޮތާއި ހިންގުވި މީހުންނާއި ފައިސާ ހަރަދުކުރި ބަޔަކާއި އެކި ގޮތްގޮތުން ހަމަލާއަށް ހިތްވަރުދީ ވާގިވެރިވި މީހުން ގާނޫނީ އިމުގެ ކުރިމައްޗަށް ގެނައުން ދިގުލައިގެންދާތީ އެވެ.
އެމްޑީޕީގެ މެމްބަރަކު ވިދާޅުވީ ނަޝީދަށް ހަމަލާ އަމާޒުކުރީ އެމްޑީޕީން ވަކާލަތު ކުރަމުން އަންނަ އަނިޔާވެރިކަމާ ދެކޮޅުވުމާއި ހައްދުފަހަނާއެޅި ހަރުކަށި ފިކުރުގެ ވަކި އަނދިރި ދައުލަތުގެ ނިވަލުގައި ހިންގާ ކޮރަޕްޝަނާއި ފަސާދަ ނައްތާލުމާއި ސުލްހަވެރި ސިޔާސީ ހަރަކާތާއި ހެޔޮވެރިކަމުގެ ސިޔާސަތު ނައްތާލާށެވެ. އަދި މި ހަމަލާ އެމަނިކުފާނަށް އަމާޒުވީ ސެކިއުރިޓީ ތްރެޓް އޮތް ކަން އިންތިހާއަށް އެނގިތިބެމެ އެ ހާލަތަށް އެކަށީގެންވާ ފިޔަވަޅު އަަޅާފައި ނުވާތީ ކަމަށް ގަރާރުގައި ހިމަނަން ވަނީ ނިންމައިފަ އެވެ.
މީގެ އިތުރުން ހަަމަލާއަށް ފަންޑުކުރި ބަޔަކު ހޯދިފައި ނުވާއިރު، މިކަމުގެ ހަގީގަތް ގެއްލި ޝައްކާއި ވަހުމް އުފެދޭ ގޮތަށް ގާނޫނީ ޒިންމާއަދާކުރާ ފަރާތްތަކުން އަމަލުކުރުން ކަންބޮޑުވުމެއްގެ ގޮތުގައި ހިމަނަން ވަނީ ނިންމައިފަ އެވެ.
ގައުމީ މަޖިލީހުން އިގުރާރުވާން ހުށަހަޅަނީ، އެނގިފައިވާ ގޮތުގައި، ސަރުކާރާއި ދައުލަތުގެ ކަމާބެހޭ ފަރާތްތަކުން ހިންގާ ތަހުގީގުތަކާ އެކަމާ ގުޅިގެން އަޅަން ޖެހޭ ފިޔަވަޅުތަކާއި ކުރަން ޖެހޭ ކަންކަން ގާތުން ބަލައި ފާރަވެރިވުމަށެވެ.
ނަޝީދަށް ދިން ހަމަލައާ ގުޅިގެން މިހާތަނަށް ހަތަރު މީހަކު ވަނީ ހައްޔަރުކޮށްފަ އެވެ. އެ އެންމެންނަކީ ވެސް ހަރުކަށި ފިކުރަށް ތަބާވާ ބައެއްކަން މިހާތަނަށް ރަސްމީ އިދާރާތަކުން އާއްމުކުރި މައުލޫމާތުތަކުން އެނގެ އެވެ.
މިދިޔަ މަހުގެ ހަ ވަނަ ދުވަހުގެ ރޭ ނަޝީދަށް އަމާޒުކޮށް ބޮމެއް ގޮއްވާލީ ދިރިއުޅުއްވާ ކެނެރީގެއިން ހިންގަވާފައި ކާރުކޮޅާ އަރާ ހަމަވިތަނުންނެވެ.
އެމްއެންޑީއެފުން ބުނެފައިވާ ގޮތުގައި ނަޝީދުގެ ފުރާނައަށް ނުރައްކާ ކުރަން ގޮއްވާލި އައިއީޑީގައި ރޭޒާ ފުއްތައް ބޭނުންކޮށްފައިވެ އެވެ. އެއީ ގެއްލުން ބޮޑުކުރާށެވެ. ރާއްޖެ އިން ލިބެން ހުރި ބައެއް ތަކެތި ބޭނުންކޮށްގެން އެ އައިއީޑީ ހަދާފައި އޮތް އިރު 2007ގައި ސަލްޓަންޕާކުގައި ޓޫރިސްޓުންތަކަކަށް އަމާޒުކުރި ހަމަލާގައި ގޮއްވާލި އައިއީޑީއަށް ވުރެން އެތައް ގުނައެއް ނަޝީދަށް އަމާޒުކުރި އައިޑީގެ ބާރުގަދަ، ކަމަށް އެމްއެންޑީއެފުން ބުނެފައިވެ އެވެ.
