ޑޫސުލްޑޯފް، ޖާމަނީ (ޖޫން 7) - ޔޫރޯ ފުޓްބޯޅަ މުބާރާތަށް ތައްޔާރުވުމުގެ ގޮތުން ޖަރުމަނުން ކުޅުނު އެކުވެރިކަމުގެ ފަހު މެޗުން މިރޭ ލަޓްވިއާ އަތުން 7-1 އިން މޮޅުވެއްޖެ އެވެ.
މިދިޔަ ހަފްތާގެ ބުދަ ދުވަހު ޖަރުމަނުން ކުޅުނު އެކުވެރިކަމުގެ މެޗު ނިމުނީ ޑެންމާކާ ދެކޮޅަށް ކުޅެ 1-1 އިން އެއްވަރު ވެގެންނެވެ. އެ މެޗަށް ޖަރުމަނުން ނެރުނު ފުރަތަމަ އެގާރަ އަށް ވަނީ މިރޭގެ މެޗުގައި ބަދަލުތަކެއް ގެނެސްފަ އެވެ. އެންމެ ބޮޑު ބަދަލަކީ ޗެމްޕިއަންސް ލީގުގެ ފައިނަލުގައި ކުޅުނު ކުޅުންތެރިން ފުރަތަމަ އެގާރައިގައި ހިމެނުމެވެ.
ޖަރުމަނުން މިރޭ ލަޓްވިއާ ކޮޅަށް ފުރަތަމަ ހާފުގައި ފަސް ގޯލު ޖެހި އެވެ. މެޗުގެ 19 ވަނަ މިނިޓްގައި ކައި ހަވާޓްޒް ދިން ބޯޅައަކުން ޖަރުމަނަށް ލީޑުނަަގައިދިނީ އެޓަލަންޓާ އަށް ކުޅޭ ރޮބިން ގޮސެން އެވެ. އޭގެ ދެ މިނިޓް ފަހުން އިލްކާއި ގުންޑޮގާން ޖަރުމަނަށް ލީޑުފުޅާކޮށްދިނެވެ. އެ ޓީމުގެ ތިން ވަަނަ ގޯލު 27 ވަނަ މިނިޓްގައި ގޮސެން ދިން ބޯޅައަކުން ޖެހީ ތޯމަސް މުލާ އެވެ.
ލަނޑު ޖެހުމަށް ފަހު މުލާ (ކ) އާއި ގުންޑޮގާން (މ) އަދި ގޮސެން އުފާފާޅުކުރަނީ.
އަދި ފުރަތަމަ ހާފު ނިމުމުގެ ކުރިން ލަޓްވިއާގެ ރޮބާޓް އޮޒޮލް އަތުން ބައިކޮޅަށް ވަން ގޯޯލާއި ސާޖް ގްނަބްރީ ޖެހި ގޯލާ އެކު ޖަރުމަނުން މި ހާފުގައި ފަސް ގޯލުގެ ލީޑެއް ނެގި އެވެ. މި ހާފްގައި ލިބުނު ފުރުސަތުތަކަށް ބަލާއިރު، ޖަރުމަނަށް އެ އަށް ވުރެ ގިނަ ގޯލު ޖެހެންދިޔަ އެވެ.
ބޯޅަ ހިފަަހައްޓައިގެން ކުޅެން މަސައްކަތްކޮށް ދެ ވަނަ ހާފްގައި ޖަރުމަނަށް ޖެހުނީ ދެ ގޯލެވެ. އެއީ މެޗުގެ 50 ވަނަ މިނިޓްގައި ޔޯސުއާ ކިމިކް ދިން ބޯޅައަކުން ޓިމޯ ވާނާ ޖެހި ގޯލާއި މުލާ ތަނަވަސްކޮށްދިން ފުރުސަތަކުން ލެރޯއި ސާނޭ ޖެހި ގޯލެވެ. ލަޓްވިއާގެ ހަމައެކަނި ގޯލު ޖެހީ އަލެކްސެއީސް ސަވެލްޔެވްސް އެވެ.
ޔޫރޯގައި ޖަރުމަނު ކުޅޭ ފުރަތަަމަ މެޗުގައި އަންނަ ހަފްތާގެ ހޯމަ ދުވަހުގެރޭ ކުޅޭނީ ފްރާންސާ ދެކޮޅަށެވެ. މި ގްރޫޕްގައި ދެން އޮތީ ޕޯޗުގަލް އާއި ހަންގޭރީ އެވެ.
މިރޭ ކުޅުނު އެހެން އެކުވެރިކަމުގެ މެޗުތަކަށް ބަލާއިރު ޔޫކްރޭނުން ވަނީ 4-0 އިން ސައިޕްރަސް ބަލިކޮށްފަ އެވެ. އަދި ސާބިއާ އާއި ޖެމެއިކާ ބައްދަލުކުރި މެޗު ނިމުނީ 1-1 އިން އެއްވަރުވެގެންނެވެ.
