ދުނިޔޭގެ އެންމެ މަތީ ފަންތީގެ އެއާލައިންތަކުގެ ތެރޭގައި ހިމެނޭ ސިންގަޕޫރު އެއާލައިންސްގެ ރާއްޖޭގެ ޕެސެންޖާ ސޭލްސް އެޖެންޓުކަން އޭސް ޓްރެވަލްސްއަށް ލިބިއްޖެ އެވެ.
ސިންގަޕޫރު އެއާލައިންސްގެ ޕެސެންޖާ ސޭލްސް އެޖެންޓަކަށް އޭސް ޓްރެވަލްސް ހަމެޖެހުމުން މިހާރު އެ އެއާލައިންގެ ޓިކެޓުތައް އޭސް ޓްރެވަލްސްއިން ގަނެވޭނެ އެވެ.
އޭސް ޓްރެވަލްސްއިން މައުލޫމާތުދޭ ގޮތުގައި މިހާރު ކަސްޓަމަރުންނަށް ސިންގަޕޯ އެއާލައިންސްގެ ޓިކެޓު ގަތުމުގެ އިތުރުން އެ އެއާލައިންގެ ޕްރޮމޯޝަންތަކާއި ހާއްސަ އޮފާތައް ލިބޭނެ އެވެ. އަދި ކަސްޓަމާ ސޭލްސް އެޖެންޓަކާ ގުޅައިގެން ބޭނުންވާ ހުރިހާ މައުލޫމާތަކާއި ހިދުމަތްތަކެއް 24 ގަޑިއިރު ލިބޭނެ ކަމަށް ބުންޏެވެ.
ސޭލްސް އެޖެންޓުކަން ލިބުމާއި ގުޅިގެން އޭސް ޓްރެވަލްސްގެ މެނޭޖިން ޑިރެކްޓަރު މުހައްމަދު ފިރާގު "އަދަދު"އަށް ވިދާޅުވީ، މިއީ ކަސްޓަމަރުންނަށް ފޯރުކޮށްދޭ ހިދުމަތްތައް އިތުރުކުރުމަށް ފެށި ހިދުމަތެއް ކަމަށެވެ. މިހާރު މާ ބޮޑު ޑިމާންޑެއް ނެތް ނަމަވެސް، ނޮވެމްބަރު ހިސާބުގައި ހިދުމަތަށް ޑިމާންޑު އޮންނާނެ ކަމަށް ވިދާޅުވި އެވެ.
މިހާރު ވެސް ރާއްޖޭގައި ބައިނަލްއަގްވާމީ ހަތަރު އެއާލައިނަކާއި ގައުމީ އެއާލައިން މޯލްޑިވިއަންގެ ޕެސެންޖާ ސޭލްސް އެޖެންޓުކަން ކުރަމުން އަންނަ އޭސް ޓްރެވަލްސްއިން މިހާރު ހަ އެއާލައިނެއްގެ ޓިކެޓް ގަނެވޭނެ އެވެ. އޭގެ ތެރޭގައި ގަތަރު އެއާވޭސް، ކެތޭ ޕެސިފިކް، ސްރީލަންކަން އަދި އިންޑިގޯ ހިމެނެ އެވެ.
