ސީލައިފް ފްލެޓްތަކުގެ މައްސަލާގައި ހިޔާނާތްތެރިވިކަމުގެ ދައުވާ އުފުލާފައިވާ އެ ކުންފުނީގެ އެމްޑީ ވ. ތިނަދޫ، ރެޑްހައުސް، އަހުމަދު މޫސާ މުހައްމަދު (އަންމަޓީ)ގެ ބަންދަށް އިތުރު އަށް ދުވަސް ކުރިމިނަލް ކޯޓުން ދީފި އެވެ.
ޕްރޮސިކިއުޓާ ޖެނަރަލްގެ އޮފީހުން ވަނީ އަންމަޓީގެ މައްޗަށް ހިޔާނާތުގެ 42 ދައުވާއެއް އުފުލާފަ އެވެ. އެއީ، އޭނާ ހިޔާނާތްތެރިވި ކޮންމެ މީހެއްގެ މައްސަލަ ވަކިންނެވެ.
އެ މައްސަލައާ ގުޅިގެން ފުލުހުންގެ ހައްޔަރުކޮށްފައިހުރި އަންމަޓީގެ ބަންދު މުރާޖައާ ކުރުމުގެ މަޖިލިސް އިއްޔެ ވަނީ ކުރިމިނަލް ކޯޓުގައި ކުރިއަށް ގެންގޮސްފަ އެވެ. އެ މަޖިލީހުގައި އަންމަޓީގެ ފަރާތުން ވަނީ ސިއްހީ ފަރުވާ ނުލިބޭ ކަމަށް ބުނެފަ އެވެ.
އެހެންވެ، ސިއްހީ ފަރުވާގެ އިންތިޒާމް ހަމަޖެއްސުމަށް ގާޒީ އާދަމް މުހައްމަދު ދައުލަތަށް އެންގެވި އެވެ.
މައްސަލާގައި ދައުލަތުން އެދުނީ އަންމަޓީ ޝަރީއަތް ނިމެންދެން ބަންދުކޮށްދިނުމަށެވެ. ނަމަވެސް، އެ ބަންދުގެ ބަދަލުގައި އަށް ދުވަހުގެ ބަންދެއް ގާޒީ އާދަމް ކަނޑައެޅުއްވީ، އަންމަޓީގެ މައްޗަށް ދައުވާ އުފުލައި މިހާރު މައްސަލަ ޝަރީއަތުގައި އޮތުމުންނެވެ.
"މި މަރުހަލާގައި ހުށަހަޅާފައިވާ ދައުވާ އާއި ހެއްކާއި ގަރީނާ ރަނގަޅަށް ވަޒަންކުރުމަށްފަހު، ޝަރީއަތް ނިމެންދެން ބަންދުކުރުމާމެދު ގޮތެއް ނިންމުމަށް އެންމެ އެކަށީގެންވާނީ މައްސަލަ ބައްލަވާ ފަނޑިޔާރު ކަމަށް ގަބޫލު ކުރެވޭ،" އިއްޔެގެ ބަންދު މަޖިލިސްގައި އިންނެވި ގާޒީ އާދަމް މުހައްމަދުގެ ނިންމުމުގައިވެ އެވެ.
އެޗްޑީސީ އާއި ސީލައިފް ގްލޯބަލް އިންކް ޕްރައިވެޓް ލިމިޓެޑާ ދެމެދު ވެފައިވާ އެއްބަސްވުމެއްގެ ދަށުން ހުޅުމާލޭގައި 3000 ހައުސިން ޔުނިޓް އެޅުމަށް، ހަވާލުކުރި އެވެ.
ނަމަވެސް، އެއްބަސްވުމުގައިވާ މުއްދަތުގައި ހައުސިން ޔުނިޓްތައް އެޅުމުގެ އަމަލީ މަސައްކަތް ފުރިހަމަނުކޮށް، މަކަރާއި ހީލަތުން އެކި މީހުން އަތުން ބޮޑެތި އަދަދުތަކުން ފައިސާ ނަގައި، އެ ފައިސާއަށް ހިޔާނާތްތެރިވެފައިވާ ކަަމުގެ ތުހުމަތު އަންމަޓީގެ މައްޗަށް ވަނީ ކޮށްފަ އެވެ.
އެ ތުހުމަތުގައި އޭނާ ހޯދުމަށް ރެޑް ނޯޓިސް ވެސް ނެރެފައިވަނިކޮށް އޭނާ ހައްޔަރުކުރީ ލަންކާގައި ފިލައިގެން އުޅެނިކޮށެވެ. ލަންކާއިން އޭނާ ހައްޔަރުކޮށްގެން ގެނެސް ހިންގި ތަހުގީގު ނިންމައި، ފުލުހުން ޕްރޮސިކިއުޓާ ޖެނަރަލްގެ އޮފީހަށް ފޮނުވީ، އެނގިފައިވާ ގޮތުގައި މި މަހުގެ ތެރޭގަ އެވެ. އޭނާގެ މައްޗަށް 42 ހިޔާނާތުގެ ދައުވާ އުފުލީ، މިދިޔަ އާދިއްތަ ދުވަހު އެވެ.
މައްސަލާގެ ޝަރީއަތް ފަށަން ތާވަލުކޮށްފައިވާ ދުވަހެއް އަދި ނޭނގެ އެވެ.
