ބޭންކް އޮފް މޯލްޑިވްސް (ބީއެމްއެލް)ގެ ކާޑު ސިސްޓަމް އަޕްގްރޭޑް ކުރުމުގެ މަސައްކަތް ކުރިއަށް ގެންދިޔުމަށްޓަކައި މާދަމާ ރޭ 10:00 އިން ފެށިގެން ހުކުރު ދުވަހުގެ ހެދުނު 9:00 އަށް، ކާޑު ބޭނުންކޮށްގެން ހިންގޭ ހުރިހާ ހިދުމަތެއް ވަގުތީ ގޮތުން މެދުކަނޑާލެވޭނެ ކަމަށް ބީއެމްއެލްއިން ވަނީ ހާމަކޮށްފަ އެވެ.
މިކަމާ ގުޅޭ ގޮތުން އިތުރު ތަފްސީލް ހޯދާލުމަށް "އަދަދު"ން ވަނީ ބީއެމްއެލްގެ މެނޭޖާ ޕަބްލިކް ރިލޭޝަންސް މުޙައްމަދު ސަޢީދުއާ ވާހަކަ ދައްކާފަ އެވެ.
ކާޑު ސިސްޓަމް އަޕްގްރޭޑްކުރަނީ ކޮން ބޭނުމަކު؟
މިއީ ކަސްޓަމަރުންނަށް ދެމުންދާ ބޭންކިން ހިދުމަތުގެ ފެންވަރު ރަނގަޅު ކުރުމަށް ބޭންކުން ކުރަމުންދާ މަސައްކަތުގެ ދަށުން ކުރިއަށް އޮތް ތަނުގައި ހިދުމަތަށް ގެންނަން ބޭނުންވާ މުހިންމު ބަދަލުތައް ގެނައުމަށާއި މި ސިނާއަތުގައި ކަނޑައެޅިފައިވާ މިންގަޑުތަކާ އެއްގޮތަށް ހަރުދަނާ ކަމާއެކު ހިދުމަތް ދިނުމުގެ ގޮތުން ކުރެވޭ މުހިންމު މަސައްކަތެއް. މި މަސައްކަތް ކުރުމަށް ވަގުތު ކަނޑައެޅިފައި މިވަނީ ކަސްޓަމަރުންނަށް ވީހާވެސް ދަތިތަކާ ދިމާނުވާނެހެން ބަލާފައ
މެދުކެނޑޭނީ ކޮން ހިދުމަތްތަކެއް؟
މި މަސައްކަތްތައް ކުރެވެމުންދާ ވަގުތުގައި ރާއްޖެ އާއި ރާއްޖޭން ބޭރުގައި އަޅުގަނޑުމެން ދެމުންދާ އެންމެހާ ކާޑުގެ ހިދުމަތްތައް ވަގުތީ ގޮތުން މެދުކެނޑޭނެ. އެހެން ކަމުން އޭޓީއެމް، ޕީއޯއެސް، އެމްޕޮސް، މާޗަންޓް ޕޯޓަލް، ޕޭމަންޓް ގޭޓްވޭގެ އިތުރުން މޮބައިލް ޕޭގެ ހިދުމަތާއި ބީއެމްއެލް އިން ދޫކޮށްފައިވާ ކްރެޑިޓް ކާޑަށް ފައިސާ ދެއްކުމާއި ފައިސާ ފޮނުވުމުގެ އިތުރުން ޑިޖިޓަލް ޕިންގެ ހިދުމަތްވެސް މެދު ކެނޑޭނެ.
އެ ގަޑީގައި އިންޓަނެޓް ބޭންކިން ބޭނުން ކުރެވޭނެތަ؟
ކާޑުގެ ހިދުމަތްތައް މެދުކެނޑިގެން ދާ ވަގުތުގައި ވެސް އިންޓަރނެޓް ބޭންކިން އާއި މޮބައިލް ބޭންކިންގެ ހިދުމަތް ލިބޭނެ. އެހެން ކަމުން ކަސްޓަމަރުންނަށް އެކައުންޓް ބެލެންސް ޗެކް ކުރުމާއި، އެކައުންޓުން ފައިސާ ޓްރާންސްފާ ކުރުމާއި އެކައުންޓް ހިސްޓްރީ ވެސް ޗެކް ކުރެވޭނެ. އަދި މީގެ އިތުރުން އިންޓަނެޓް ބޭންކިން މެދުވެރިކޮށް ހިދުމަތްތަކަށް އެދި ހުށަހެޅުމާއި ބޭންކަށް މެސެޖް ނުވަތަ މެއިލް ވެސް ފޮނުވޭނެ.
ރާއްޖޭން ބޭރުގައި ކާޑުން ހިދުމަތް ހޯދާ ނަމަ ހަދަންވީ ކިހިނެއް؟
ކުރިން ވެސް ދެންނެވިހެން މި މަސައްކަތް ކުރުމަށް ވަގުތު ކަނޑައެޅިފައި ވަނީ ކަސްޓަމަރުންނަށް ވީހާ ވެސް ދަތިތަކާ ދިމާނުވާނެހެން ބަލާފައި. އެހެން ނަމަވެސް މި ވަގުތާ ދިމާކޮށް ކާޑު ބޭނުންކޮށްގެން މުއާމަލާތެއް ކުރަންޖެހޭ ނަމަ އެ މުއާމަލާތެއް ކުރިން ނިންމުމަށް އަޅުގަނޑުމެން އިލްތިމާސް ކުރަން. މި ގޮތުން ހޮޓަލަކުން ޗެކް-އައުޓް ވާންޖެހޭ ވަގުތު ފައިސާ ދައްކަން ޖެހޭ ހާލަތެއް މެދުވެރިވާ ނަމަ، ނުވަތަ އޭޓީއެމްއިން ފައިސާ ނެގުން ފަދަ ކަންކަން ކުރީބައިގައި ނިންމުމަށް ދަންނަވަން. އަދި މީގެ އިތުރުން އޮންލައިންކޮށް ފައިސާ ދައްކަން ޖެހޭ ފްލައިޓް ޓިކެޓް، ބިލް ނުވަތަ ސަބްސްކްރިޕްޝަނެއްގެ ސުންގަޑި ހަމަވާނަމަ އެކަން ވެސް ކުރިން ނިންމެވުމަށް ދަންނަވަން.
ހުކުރު ދުވަހު ހެނދުނު އަޕްގްރޭޑްގެ މަސައްކަތް ނިމުމުން ކުރިއެކޭ އެއްގޮތަށް ހިދުމަތްތައް ދެމުންދާނެ ކަމަށް ބޭންކުން މައުލޫމަތު ދެ އެވެ.
