މާލޭގައި މިދިޔަ ހަފުތާގައި ހިނގި ނުރައްކާތެރި އެކްސިޑެންޓާ ގުޅިގެން ހައްޔަރުކުރި މީހާ، އޭނާގެ މައްޗަށް ކުރާ ތުހުމަތުތަކަށް އިންކާރުކޮށްފި އެވެ.
ބުދަ ދުވަހުގެ ރޭ އެކްސިޑެންޓް ހިނގީ ބާރުސްޕީޑްގައި ދުއްވާފައި ދިޔަ ސައިކަލެއް މަގުމަތީ ބާއްވާފައި އޮތް ގާޑިޔަލެއްގައި ޖެހިގެންނެވެ.
އެކްސިޑެންޓްގައި މަރުވީ ސައިކަލް ފަހަތުގައި އިން އުމުރުން 21 އަހަރުގެ އިސްމާއިލް ޔަޒްދާން އަލީ އެވެ. އޭޑީކޭ ހޮސްޕިޓަލަށް އޭނާ ގެންދިޔައިރު ވެސް އޮތީ މަރުވެފަ އެވެ.
މަރުގެ އެކްސިޑެންޓަށްފަހު ވެސް ޔަޒްދާން ކޮޅަށް ތެދުވެ، ހިނގައިގަންނަ މަންޒަރު ފެންނަ ވީޑިއޯއެއް އާންމުވެފައިވެ އެވެ. އެ ވީޑިއޯގައި ފެންނަ ގޮތުން ޔަޒްދާން ހިނގައިގަތްތަނާ އެކު ވެއްޓުނެވެ. އޭރު އޭނާގެ ކަރުން ވަރަށް ގިނަ ލޭ ފައިބަމުން ދިޔަ އެވެ.
އެ މައްސަލާގައި ފުލުހުން ހައްޔަރުކުރީ ސައިކަލް ދުއްވަން އިން އަހުމަދު އާތިފް އަބްދުﷲ އެވެ. އޭނާގެ ބަންދާ މެދު ގޮތެއް ނިންމަން އިއްޔެ ކުރިމިނަލް ކޯޓުގައި މަޖިލީހެއް ބޭއްވި އެވެ.
އެ މަޖިލީހުގައި އޭނާ ވަނީ ތުހުމަތުތަކަށް އިންކާރުކޮށްފަ އެވެ.
އެ ހާދިސާގައި މަރުވީ ރަހުމަތްތެރިއެއް ކަމަށް އެއްބަސްވުމުން ބުނީ އެކަން ހިންގުމުން ފިލީ ނޫން ކަމަށެވެ. އެތަނުން ދާން ޖެހުނު ސަބަބެއްގެ ގޮތުގައި ދެއްކީ ތިން މަހުގެ ދަރިފުޅެވެ.
ބަންދުގެ މަޖިލީހުގައި އޭނާ ބުނިގޮތުގައި، އެ އެކްސިޑެންޓާ ގުޅިގެން ހައްޔަރުކޮށް ބަންދުގައި ހުންނަން ޖެހިއްޖެ ނަމަ ތިން މަހުގެ ދަރިއަށް އަޅާލާނެ މީހަކު ނުހުންނާނެ އެވެ.
ނަމަވެސް، މައްސަލާގައި އޭނާގެ މައްޗަށް ކުރެވެނީ މަރުގެ ބޮޑު ތުހުމަތަކަށްވާތީ، އޭނާ ބަންދު އިތުރު ކުރަން ޖެހޭ ކަމަށް ގާޒީ ސަފްއަތު ހަބީބު ނިންމެވި އެވެ.
އޭނާގެ މައްޗަށް 10 ދުވަހުގެ ބަންދެއް ގާޒީ ޖެހީ، އޭނާއަކީ މުޖުތަމައުގެ ސަލާމަތަށް ނުރައްކާވާ ފަދަ މީހެއް ކަމާއި އޭނާ ފިލާފާނެ ކަމަށް ބެލެވޭތީ ކަމަށް ވެސް ގާޒީ ނިންމަވާފައިވެ އެވެ.
