ކުޅުންތެރިންގެ މުސާރަ ނުދޭތީ އެފްއޭއެމުން ރާއްޖޭގެ އެންމެ ބޮޑު ދެ ކްލަބް ކަމަށްވާ ނިއު ރޭޑިއަންޓާއި ވިކްޓްރީ ސްޕޯޓްސް ކްލަބަށް ދީފައިވާ ސަސްޕެންޝަން މިއަދު އެފްއޭއެމްގެ ކޮންގްރެސް އިން އަނެއްކާ ވެސް ދަމަހައްޓައިފި އެވެ.
އެފްއޭއެމުން އެންމެ ފުރަތަމަ ނިއު ސަސްޕެންޑްކުރީ 2019 ވަަނަ އަހަރުގެ ޖެނުއަރީ މަހުގެ 26 ވަނަ ދުވަހު އެވެ. ނިއު އޭރު ސަސްޕެންޑްކުރީ މުސާރައިގެ ގޮތުގައި ދޭން ޖެހޭ 3.8 މިލިއަން ރުފިޔާ ނުދީ އޮތުމުންނެވެ. މިހާރު އެ ފައިސާ ނުދައްކައި ދިގުލައިދާ ކޮންމެ ދުވަހަކަށް ކަހަލަ ގޮތަކަށް ޖޫރިމަނާއާ އެކު ދައްކަން ޖެހޭ އަދަދު އަންނަނީ އިތުރުވަމުންނެވެ. ނިއުގެ ސަސްޕެންޝަން ދަމަހައްޓަން 2019 އަހަރުގެ މާޗް މަހުގެ 25 ވަނަ ދުވަހު އެފްއޭއެމް ކޮންގްރެސް އިން ފުރަތަމަ ނިންމި އެވެ. އެ ފަހަރު ނިއުގެ ސަސްޕެންޝަނާ ދެކޮޅަށް ވޯޓު ދިނީ މަހިބަދޫ ސްޕޯޓްސް ކްލަބާއި ވިކްޓްރީންނެވެ.
ނިއު އިން ލޯކަލް އަދި ބިދޭސީ ކުޅުންތެރިންނަށް ނުދީ ހުރި މުސާރައިގެ މައްސަލަތަކެއް ފީފާ އިން ވެސް ބަލައި އޮތީ ފިޔަވަޅު އަޅައިފަ އެވެ.
ވިކްޓްރީ އިން ކުޅުންތެރިންނާއި ކޯޗުންނަށް ނުދީ ހުރި މުސާރަ ދޭށާއި ކްލަބް ލައިސަންސްގެ ކަންކަން ފުރިހަމަކުރަން އެފްއޭއެމުން ދިން މުއްދަތުގައި އެކަންކަން ކޮށްފައިނުވާތީ އެ އެސޯސިއޭޝަނުން އެ ކްލަބް ސަސްޕެންޑްކުރީ 2019 ވަނަ އަހަރުގެ ޑިސެމްބަރު މަހުގަ އެވެ.
އެ އަހަރު ވިކްޓްރީން ލީގު މެޗުތަކަށް ހާޒިރުނުވާ މައްސަލަ އާއި ކުޅުންތެރިންނާއި ކޯޗުންނަށް ދޭން ޖެހޭ މުސާރަ ނުލިބިގެން އެ ފަރާތްތަކުން ހުށަހަޅާފައިވާ މައްސަލަ އާއި ކްލަބް ލައިސަންސްއާ ގުޅޭ ގޮތުން ހަމަކުރަން ޖެހޭ ލިޔެކިޔުންތައް ހަމަކޮށްފައިނުވާތީ އެކަންކަމާ ގުޅޭ ގޮތުން އެފްއޭއެމުން އިންޒާރެއް ދިން ނަމަވެސް ވިކްޓްރީން އެކަންކަން ރަނގަޅު ނުކުރާތީ އެންމެ ފަހުން ނިންމީ ސަސްޕެންޑް ކުރާށެވެ. ވިކްޓްރީން މުސާރަ ނުދޭތީ އެ ޓީމަށް އެންމެ ފަހުން ކޯޗުކޮށްދިން ލާޒްލޯ ކިސް ވަނީ ވަރަށް ބޮޑަށް ނުރުހުން ފާޅުކޮށްފަ އެވެ.
މިދިޔަ އަހަރުގެ ކޮންގްރެސް އަށް އައިއިރު ވެސް ނިއު އާއި ވިކްޓްރީން މައްސަލަތައް ހައްލުކޮށްފައިނުވާތީ އެއިރު ވެސް ސަސްޕެންޝަން ދެމެހެއްޓީ އެވެ. މިއަދު ހަވީރު ޒޫމް މެދުވެރިކޮށް ބޭއްވި ކޮންގްރެސްގައި ވެސް ނިއު އާއި ވިކްޓްރީގެ ސަސްޕެންޝަން އުވާލަން ކޮންގްރެސްގައި ބައިވެރިވި 22 ކްލަބްގެ ތެރެއިން އެއްވެސް ކްލަބެއްގެ ތާއީދެއް ނެތެވެ. އެހެންވެ ސަސްޕެންޝަން އަނެއްކާ ވެސް ދެމެހެއްޓީ އެވެ.
ކޮންގްރެސްގައި ވާހަކަ ދައްކަވަމުން އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ ނިއު އާއި ވިކްޓްރީގެ އެ މައްސަލަތަކަށް ހައްލެއް ނުލިބޭތީ ކަންބޮޑުވާ ކަމަަށެވެ.
މިއަދުގެ ކޮންގްރެސްގައި އެފްއޭއެމުން ވަނީ ދިވެހި ސިފައިންގެ ކްލަބް (ޑީއެސްސީ) އަށް ފުރިހަމަ މެމްބާޝިޕް ދޭން ކްލަބްތަކުގެ ވޯޓަކަށް އަހައިފަ އެވެ. ސިފައިންގެ ކްލަބަށް އެފްއޭއެމްގެ މެމްބަރުކަން ދޭން ތާއީދުކުރީ ކޮންގްރެސްގައި ބައިވެރިވި 19 ކްލަބަކުންނެވެ. އެކަމާ ދެކޮޅަށް ދެ ކްލަބަކުން ވޯޓު ދިނެވެ. ސިފައިންގެ ކްލަބަށް މެމްބަރުކަން ދިންއިރު، އެ ޓީމުން ފާއިތުވި އަހަރުތަކުގައި އެފްއޭއެމުން ބޭއްވި މުބާރާތްތަކުގައި ގަވާއިދުން ބައިވެރިވެފައިވާކަން ވަނީ ފާހަގަކޮށްފަ އެވެ.
