ކުރީގެ ރައީސް އަބްދުﷲ ޔާމީންގެ މައްޗަށް އުފުލާފައިވާ މަނީ ލޯންޑަރިން ކުށުގެ ދައުވާ އާއި ރިޝްވަތު ގަބޫލު ކުރުމުގެ ކުށުގެ ދައުވާގެ ޝަރީއަތް، ކޮވިޑްގެ ހާލަތަށް ބަލައި، ކެންސަލްކޮށްފި އެވެ.
އެ ދެ މައްސަލައިގެ ޝަރީއަތުގެ އަޑުއެހުން މިއަދު 9:30 ގައި ކްރިމިިނަލް ކޯޓުގައި ބޭއްވުމަށް ތާވަލުކުރި އެވެ. އެ އަޑުއެހުން ބޭއްވުމަށް ނިންމީ ގޭ ބަންދުގައި މިހާރު ހުންނެވި ޔާމީން ކޯޓަށް ހާޒިރު ކޮށްގެންނެވެ.
ނަމަވެސް، ކޮވިޑްގެ ހާލަތު އޮތް ގޮތުންނާއި ޔާމީންއަކީ ހައިރިސްކު ބޭފުޅެއް ކަމަށްވާތީ އަޑުއެހުން މި ވަގުތަށް ފަސްކޮށްދިނުމަށް އެމަނިކުފާނުގެ ގާނޫނީ ވަކީލުންގެ ރޭ ކޯޓުގައި އެދިވަޑައިގެންނެވި އެވެ.
ކުރިމިނަލް ކޯޓުން މިއަދު ބުނި ގޮތުގައި، ޔާމީންގެ ފަރާތުން އަޑުއެހުން ކެންސަލްކުރުމަށް އެދިފައިވާތީ އަދި، ކޮވިޑްގެ ހާލަތުގައި އަމަލުކުރާނެ ގޮތާ ގުޅޭ ގޮތުން ސުޕްރީމް ކޯޓުން އެކުލަވާލާފައިވާ އިރުޝާދަށް ވެސް ރިއާޔަތްކޮށް، މިއަދުގެ އަޑުއެހުން ކެންސަލްކޮށްފައިވާ ކަމަށެވެ.
އެ އިރުޝާދުގައިވާ ގޮތުން ހައިރިސްކު މީހުން ކޯޓަށް ހާޒިރުކޮށް ޝަރީއަތް ނުހިންގުމަށް އިރުޝާދު ދީފައިވެ އެވެ.
ރައީސް ޔާމީންގެ ގާނޫނީ ޓީމުން ރޭ ބުނި ގޮތުގައި، މި ނުރައްކާތެރި ހާލަތުގައި އެމަނިކުފާނު ކޯޓަށް ހާޒިރު ކުރާނަމަ އެއީ ސިއްހަތު ނުރައްކަލަކަށް ހުށަހެޅޭނެ ކަމެކެވެ.
ޔާމީންގެ މައްޗަށް އާ ދެ ދައުވާ އުފުލާފައިވަނީ ރިސޯޓެއްގެ ގޮތުގައި ތަރައްގީ ކުރުމަށްޓަކައި ރ. ފުއްގިރި ކުއްޔަށް ދޫކުރުމުގެ މައްސަލައަކާ ގުޅިގެންނެވެ. ޕްރޮސިކިއުޓާ ޖެނެރަލްގެ އޮފީހުން ބުނީ، ޔާމީން ވަނީ ނުފޫޒު ބޭނުންކޮށްގެން މއ.ކުރިކީލަހިޔާ އަހުމަދު ކްރިކް ރިޒާ މެދުވެރިކޮށް ރިޝްވަގުތެގޮތުގައި 1،117،000 ޑޮލަރު ހޯދައި ސަން ކޮންސްޓްރަކްޝަން އެންޑް އިންޖިނިއަރިން އާއި ސަން އިންވެސްޓްމެންޓް ބޭނުންކޮށްގެން އެ ފައިސާ ލޯންޑާކުރުމަށްޓަކައި ބޭނުން ކޮށްފައި ކަމަށެވެ.
ޔާމީންގެ އިތުރުން އެ މައްސަލާގައި ރިޒާއަށާއި ސަން ކޮންސްޓްރަކްޝަން އެންޑް އިންޖިނިއަރިން ކުންފުންޏާއި ސަން އިންވެސްޓްމަންޓް ކުންފުންޏަށް ވެސް ވަނީ ދައުވާ ކޮށްފަ އެވެ. ރިޒާގެ މައްޗަށް ކޮށްފައިވަނީ ރިޝްވަތު ދިނުމުގައި މެދުވެރިއަކަށްވުމުގެ ކުށުގެ ދައުވާ އާއި މަނީ ލޯންޑްރިން ކުށުގެ ދައުވާ އެވެ. ސަންގެ ދެ ކުންފުނީގެ މައްޗަށް އުފުލާފައިވަނީ މަނީ ލޯންޑްރިންގެ ކުށުގެ ދައުވާ އެވެ.
ރިސޯޓެއް ގޮތަށް ތަރައްގީ ކުރުމަށްޓަކައި ވ. އާރަށް ބޭރު ބަޔަކަށް ވިއްކައިގެން ލިބުނު އެއް މިލިއަން ޑޮލަރު (15.3 މިލިއަން ރުފިޔާ) ޔާމީންގެ ބޭންކު އެކައުންޓަކަށް ޖަމާކޮށްފައިވާ ކަމަށް ބުނާ މައްސަލައެއްގައި އޭމާގެ މައްޗަށް ޖިނާއީ ދައުވާ ކުރުމަށް ޕްރޮސެކިއުޓާ ޖެނެރަލްގެ އޮފީހަށް މިދިޔަ މަހު ފުލުހުން ވަނީ ފޮނުވައިފަ އެވެ.
އެމްއެމްޕީއާރްސީ އިން ވަގަށް ނެގި އެއް މިލިއަން ޑޮލަރު އެމަނިކުފާނުގެ އެކައުންޓަކަށް ޖަމާވި މައްސަލައެއްގައި ފަސް އަހަރުގެ ހުކުމެއް މިހާރު ވެސް ތަންފީޒު ކުރައްވަމުން ގެންދަވާ ރައީސް ޔާމީންގެ މައްޗަށް މިފަހަރު ކުރާ ތުހުމަތަކީ ރިޝްވަތު ނެންގެވުމާއި ކަޅު ފައިސާ ދޮވުމުގެ ކުށެވެ.
އާރަށް މައްސަލައިގައި ރައީސް ޔާމީންގެ މައްޗަށް ޕީޖީ ދައުވާ އުފުލައިފި ނަމަ އެ މައްސަލަ ވާނީ އޭނާގެ މައްޗަށް އުފުލާ ހަ ވަނަ ޖިނާއީ ދައުވާއަށެވެ.
ޔާމީން ގޭ ބަންދަށް މިދިޔަ މަހު ފަހުކޮޅު ބަދަލު ކުރީ ޖަލުގައި ކޮވިޑް ފެތުރޭތީ ކަމަށް ބުނެ އެވެ.
