ކުރީގެ ރައީސް މައުމޫން އަބްދުލް ގައްޔޫމްގެ ގެކޮޅު ކަމަށްވާ މައްޗަންގޮޅީ ކިނބިގަސްދޮށުގެޔަށް، ރައްޔިތުންގެ މަޖިލިހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ގެއްލުންދިން މައްސަލަ ފުލުހުން ބަލަން ފަށައިފި އެވެ.
އެކަން ކަށަވަރުކޮށްދިނުން ފިޔަވައި ފުލުހުން އިތުރު ތަފްސީލެއް ނުދެ އެވެ.
ޖާބިރު މިއަދުގެ މެންދުރުގެ ވަގުތެއްގައި ކިނބިގަސްދޮށުގޭގައި ހުރި ބައެއް ގަސްތަކަށާއި ތަކެއްޗަށް ގެއްލުންދޭ ވީޑިއޯއެއް ސޯޝަލް މީޑިއާގައި ވަނީ އާއްމުވެފަ އެވެ. އެ ވީޑިއޯގައި އޭނާ ވިދާޅުވަނީ އެތަނަށް ދިޔައީ އެގެޔާ ހަވާލުވާން ކަމަށެވެ.
ޖާބިރު ތުހުމަތުކުރައްވާ ގޮތުގައި މައުމޫންގެ އެ ގެކޮޅަކީ، އެ ދެ ބޭފުޅުންގެ ދެމެދުގައި ހިނގި ލޯނު މުއާމަލާތެއްގައި ރަހުނުކޮށްފައި ހުރި ތަނެކެވެ. މި ލޯނު މުއާމަލާތުގެ ތެރެއިން 29 މިލިއަން ރުފިޔާ މައުމޫނަށް ދިން ކަމަށް ޖާބިރު ވަނީ ތަކުރާރުކޮށް ވިދާޅުވެފަ އެވެ.
ނަމަވެސް، މި އަހަރުގެ އޭޕްރިލް މަހުގެ ތެރޭގައި ސިވިލް ކޯޓުން ވަނީ އެ މައްސަލަ ސާބިތު ނުވާ ކަމަށް ކަނޑައަޅާފަ އެވެ. އޭރު ކޯޓުން ބުނީ މައްސަލަ ސާބިތު ނުވީ އެ ބުނާ އަދަދަށް ފައިސާ ދެއްވި ކަމަށް ޖާބިރު ހުށައެޅުއްވި ލިޔުންތަކުން، އެ މުއާމަލާތް ހިންގި ކަމުގެ ހެކި ނެތުމުން ކަމަށެވެ.
ޖާބިރު ވަނީ އިއްޔެ މަޖިލިސް ދޮރުމަތީގައި އޮންނަވައިގެން ސަރުކާރާ ދެކޮޅަށް އަޑުއުފުލުއްވައިފަ އެވެ.
