މާލޭގައި ބުދަ ދުވަހުގެ ރޭ މީހަކު މަރުވި އެކްސިޑެންޓުގައި ސައިކަލް ދުއްވި މީހާ ދެނެގަނެވިފައިވާ ކަމަށް ފުލުހުން މިއަދު ބުނެފި އެވެ.
އެކްސިޑެންޓްގައި މަރުވީ ސައިކަލް ފަހަތުގައި އިން އުމުރުން 21 އަހަރުގެ އިސްމާއިލް ޔަޒްދާން އަލީ އެވެ. އޭޑީކޭ ހޮސްޕިޓަލަށް އޭނާ ގެންދިޔައިރު ވެސް އޭނާ އޮތީ މަރުވެފަ އެވެ.
މި އެކްސިޑެންޓް ހިނގުމާ އެކު ސައިކަލް ދުއްވަން އިން މީހާ ފިލީ އެވެ. އެކްސިޑެންޓް ހިނގީ ހުވަފެނީ ގޯޅީގައި ބާއްވާފައި އޮތް ގާޑިޔަލެއްގައި ބާރު ސްޕީޑުގައި ދުއްވާފައި ދިޔަ އެ ސައިކަލު ޖެހިގެންނެވެ.
ފުލުހުންގެ މީޑިއާ އޮފިޝަލް "އަދަދު"އަށް ވިދާޅުވީ އެކްސިޑެންޓަށް ފަހު މަޑުނުކޮށް ދިޔަ މީހާއާ ގުޅޭ މައުލޫމާތު ލިބިފައިވާ ކަމަށެވެ. އެ މައްސަލައާ ގުޅިގެން އަޅަންޖެހޭ ފިޔަވަޅުތައް އެޅުމުގެ މަސައްކަތް ކުރަމުން އަންނަ ކަމަށް ވިދާޅުވި އެވެ.
"އަދަދު" އަށް އެނގިފައިވާ ގޮތުގައި އެ މީހާ ދެނެގަނެވުނު ނަމަވެސް މިހާތަނަށް ހައްޔަރެއް ނުކުރެ އެވެ.
އެ މައްސަލައާ ގުޅިގެން އިތުރު ތަފްސީލެއް ފުލުހުން އަދި ނުދެ އެވެ.
މަންޒަރުދުށް މީހަކު ކިޔައިދީފައިވާ ގޮތުގައި، އެކްސިޑެންޓްގައި މަރުވި މީހާގެ ކަރަށް ބޮޑެތި އަނިޔާތަކެއް ލިބިފައިހުރި ކަމަށް މަންޒަރު ދުށް މީހަކު ބުންޏެވެ.
"ގާޑިޔާގެ ދަށުގައި އޭނަގެ ކަރު ވަދެފައި ވަރަށް ބޮޑަށް ފަޅައިގެން ދިޔަ ކަމަށް ވަނީ،" އެ ސަރަހައްދުގައި ހުރި މީހަކު ބުންޏެވެ.
މާލޭގައި ކާފިއު ހިންގާފައި ވަނިކޮށް އެކްސިޑެންޓް ހިނގާފައިވާއިރު، އެ ސައިކަލް ދުއްވީ ހުއްދަ އޮތް ބައެއް ކަމެއް ނުވަތަ ނޫން ކަމެއް އަދި ނޭނގެ އެވެ.
