މިހާތަނަށް ގޭބިސީތަކަށް ދޫކުރާ ޕާމިޓް 26،300 މީހުންނަށް، އަދި ވިޔަފާރިތަކަށް 5،600 ޕާމިޓް ދޫކޮށްފި އެވެ.
މިއަދުން ފެށިގެން ކޮންމެ ދުވަހެއްގެ ހަވީރު 4:00 އިން ހެނދުނު 8:00 އަށް ކާފިއު ހިންގަން ވަނީ ނިންމައިފަ އެވެ. ކާފިއު ނޫން ގަޑިތަކުގައި ވެސް ގެއިން ބޭރަށް ނުކުމެވޭނީ ކޮންމެ ގެއަކަށް ދޫކޮށްފައިވާ ދެ ފާހުގެ ތެރެއިން ފާހެއް ހިފައިގެންނެވެ.
އެޗްއީއޯސީން މިރޭ ބޭއްވި ނޫސްވެރިންގެ ބައްދަލުވުމުގައި ޗީފް ސްޕްރިންޓެންޓް އޮފް ޕޮލިސް އަބްދުﷲ ޝަރީފް ވިދާޅުވީ މިހާތަނަށް ގޭބިސީތަކުން އެދުނު މީހުންގެ ތެރެއިން ހުއްދަ ނުދެވި ވަނީ 6،939 މީހުން ކަމަށެވެ.
ޝަރީފް ވިދާޅުވީ ޕާމިޓަށް އެދުމުގެ ފުރުސަތު ހުޅުވާލުމުން ގިނަ އަދަދެއްގެ ބަޔަކު އެދެމުން ދިޔަ ކަމަށާއި އޭގެ ސަބަބުން ސިސްޓަމްވެސް ޑައުންވި ކަމަށެވެ. ނަމަވެސް މިހާރު އެކަންކަން ހައްލު ކޮށްފައިވާ ކަމަށް އޭނާ ވިދާޅުވި އެވެ.
އެޗްއީއޯސީން މިރޭ ބޭއްވި ނޫސްވެރިންގެ ބައްދަލުވުމުގައި ޗީފް ސްޕްރިންޓެންޓް އޮފް ޕޮލިސް އަބްދުﷲ ޝަރީފާއި އިކޮނޮމިކް މިނިސްޓްރީގެ އެސިސްޓެންޓް ޑިރެކްޓާ، ޝަނާޒް މުހައްމަދު-- ފޮޓޯ: އެޗްއީއޯސީ
ޕާމިޓް ހޯދަން އެދޭއިރު ކަރަންޓް މީޓަރުގެ ނަމްބަރު ޖަހަން ޖެހޭއިރު ފެން މީޓަރުގެ ނަމްބަރު ޖަހައިގެން ވެސް ފޮނުވާފައި އެބަހުރި ކަމަށް ޝަރީފް ވިދާޅުވި އެވެ. އަދި ބައެއް ގޭގެއިން ދެ މީހުންނަށް ވުރެން އިތުރަށް މީހުން ޕާމިޓަށް އެދޭ ކަމަށް ވެސް އޭނާ ވިދާޅުވި އެވެ.
ހައުސް ހޯލްޑް ފާސް ހިފައިގެން ހުޅުމާލެއިން މާލެއަށް ނާދެވޭނެކަން އަންގާފައި ވީނަމަވެސް އެ ފާހުގައި ބައެއް މީހުން މާލެ އަންނަން މަސައްކަތް ކުރާ ކަމަށް ވެސް ޝަރީފް ވިދާޅުވި އެވެ. އަދި އެކަން ނުކުރުމަށް އޭނާ އިލްތިމާސް ކުރެއްވި އެވެ.
ވިޔަފާރިތަކަށް ވަކި ނިސްބަތަކުން ފުލުހުން ވެސް ފާސް ދޫކުރެ އެވެ. ވިޔަފާރިތަކަށް ފުލުހުން ދޫކުރާ ހުއްދައިގެ އިތުރުން އެހެން ހުއްދައަށް އެދެން ޖެހެނީ އިކޮނޮމިކް މިނިސްޓްރީ މެދުވެރިކޮށެވެ. އިކޮނޮމިކް މިނިސްޓްރީން ހުއްދަ ދިނުމުން ފުލުހުން ޕާމިޓް ދޫކުރެ އެވެ.
މިއަދު ހެނދުނު ގިނަ ވިޔަފާރިތަކާއި އޮފީސްތައް ނުހުޅުވިފައި ތިބީ ޕޯޓަލް ތެރެއިން ދޭން ޖެހޭ ހުއްދަތައް ނުލިބިގެންނެވެ. އިކޮނޮމިކް މިނިސްޓްރީގެ އެޕްރޫވަލް ލިބުމަށް ފަހު ވެސް ޕޮލިސް ޕޯޓަލްގެ ތެރެއިން މުވައްޒަފުންނަށް ބޭނުންވާ ޕާމިޓް ނުލިބެ އެވެ. މި މައްސަލަ ބޮޑަށް ދިމާވީ ގިނަ މުވައްޒަފުން ގެންގުޅޭ ވިޔަފާރިތަކަށެވެ.
ނޫސްވެރިންގެ ބައްދަލުވުމުގައި އިކޮނޮމިކް މިނިސްޓްރީގެ އެސިސްޓެންޓް ޑިރެކްޓާ، ޝަނާޒް މުހައްމަދު ވިދާޅުވީ މިރޭގެ 6:00 އާ ހަމައަށް 6،000 މީހުންނަށް ޕާސް ހައްދަން އެދިފައިވާ ކަމަށެވެ. އޭގެ ތެރެއިން 5،600 މީހުންނަށް ހުއްދަ ދޫކޮށްފައިވާ ކަމަށް އޭނާ ވިދާޅުވި އެވެ. އޭގެ ތެރޭގައި ކުދި ވިޔަފާރިތަކުގެ އިތުރުން ބޮޑެތި ވިޔަފާރިތައް ހިމެނޭ ކަމަށް އޭނާ ވިދާޅުވި އެވެ.
"އަޅުގަނޑުމެން މިބަލަނީ އަޅުގަނޑުމެންގެ ވޯކް ފޯސްއަށް ބަލާއިރު މާދަމާ ހެނދުނުގެ ވަގުތެއްގައި މި ހުރިހާ ޕާމިޓްތައް ޕްރޮސެސް ކުރެވިގެން އިޝޫ ކުރެވިދާނެ ކަމަށް،" ޝަނާޒް ވިދާޅުވި އެވެ.
ވިޔަފާރިތަކަށް ހުއްދަ ދޫކުރަމުން ދަނީ އެދޭ މީހުންނަށް ވަކިވަކިން ބެލުމަށް ފަހުގައި ކަމަށް ޝަނާޒް ވިދާޅުވި އެވެ. މިހާރު ވިޔަފާރި ހުއްދަ ދޫކުރާއިރު ވެހިކަލަށް ވަކިން ހުއްދަ ދިނުމުގެ ބަދަލުގައި ހުއްދަ ދެނީ މީހާއަށް ކަމަށާއި އޭރުން އެ މީހަކު ދުއްވާ ވެހިކަލްއަށް ވެސް ހުއްދަ އޮންނާނެ ކަމަށް އޭނާ ވިދާޅުވި އެވެ.
ތައްޔާރީތަކާ މެދު ކުރާ ޝަކުވާތަކާ ގުޅިގެން ފުލުހުންގެ ފަރާތުން ނޫސްވެރިންގެ ބައްދަލުވުމުގައި ބައިވެރިވި ޝަރީފް ވިދާޅުވީ ހުރިހާ ފިޔަވަޅުތަކެއް ވެސް އަޅާފައިވަނީ ކުރިއާލާ ތައްޔާރު ވެގެން ކަމަށެވެ. ޕާމިޓް ދޫކުރުން ފަދަ ކަންކަމަށް އިތުރު ސުޓާފުން ނަގައިގެން މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ.
