ރައްޔިތުންގެ މަޖިލީހުގެ އިޖުތިމާއީ ކޮމިޓީގެ މުގައްރިރު ކަމަށް އިހަވަންދޫ ދާއިރާގެ އެމްޑީޕީގެ މެމްބަރު މުހައްމަދު ޝިފާއު މިއަދު އިންތިހާބު ކޮށްފި އެވެ.
އޭނާ އެ މަގާމަށް ހޮވީ، އިޖުތިމާއީ ކޮމެޓީގެ މުގައްރިރަކަށް ހުންނެވި ކެނދިކުޅުދޫ ދާއިރާގެ މެމްބަރު އަހުމަދު އީސާއަށް ގެވެށި އަނިޔާގެ ތުހުމަތު ކުރެވި އޭނާ އިސްތިއުފާ ދެއްވުމުންނެވެ.
އީސަ އިސްތިއުފާ ދެއްވީ، އޭނާ މަގާމުން ވަކި ކުރަން އެޖެންޑާ ކޮށްފައި ވަނިކޮށެވެ. ނަމަވެސް ކޯރަމް ހަމަނުވެގެން އެކަން ނުވިއިރު އެ ބައްދަލުވުމުގައި ހާޒިރުވެވަޑައިގެން ނެތް މެމްބަރުންގެ ތެރޭގައި ޝިފާއު ހިމެނިވަޑައިގަންނަވަ އެވެ.
މިއަދު ބޭއްވި އިޖުތިމާއީ ކޮމެޓީގެ ބައްދަލުވުމުގައި ޝިފާއު މުގައްރިރަކަށް އިންތިހާބުކުރި ކޮމެޓީގައި އީސަ ބައިވެރިވެވަޑައިގަތެވެ.
އިސްތިއުފާއާ އެކު އީސަ އާއްމުކުރެއްވި ބަޔާނެއްގައި ވިދާޅުވީ މަގާމުން އެކަހެރިވެވަޑައިގަތީ އޭނާ އަށް ތުހުމަތުކުރާ ގެވެށި އަނިޔާގެ މައްސަލައެއް ބަލާތީ މުއައްސަސަތަކަށް އެއްބާރުލުން ދެއްވުމުގެ ގޮތުން ކަަމަށެވެ.
އެހެން ކޮމެޓީތަކެކޭ އެއްގޮތަށް އިޖުތިމާއީ ކޮމެޓީގެ މެޖޯރިޓީވެސް އޮންނަނީ މަޖިލީހުގެ ސުޕަ މެޖޯރިޓީ އޮތް އެމްޑީޕީއަށެވެ.
އީސައާ ދެކޮޅަށް މައްސަލަ ހުށަހެޅުއްވީ ކުރީގެ އަނބިކަބަލުން އަސްރާ ނަސީމެވެ. އެ މައްސަލައިގެ ތަހުގީގަށް ފުލުހުންނަށް ބަޔާން ދެއްވުމަށް ފަހު އަސްރާ ފޭސްބުކްގައި ލިއުއްވި ގޮތުގައި އަނިޔާގެ އެ ތަޖުރިބާއަކީ ދުވަހަކު ވެސް ކުރިމަތިވެދާނެ ކަމަށް ހީކުރެއްވި ކަމެއް ނޫން ކަަމަށެވެ.
އެ މައްސަލައާ ގުޅިގެން އީސަ ހައްޔަރު ކުރުމުގެ އަމުރަކަށް ވެސް ޕްރޮސިކިއުޓާ ޖެނެރަލް ކްރިމިނަލް ކޯޓުގައި އެދުނެވެ. ނަމަވެސް ކޯޓުން ނިންމީ ހައްޔަރު ކުރަން ޖެހޭ ސަބަބެއް ނެތް ކަމަށެވެ.
