އެމެރިކާގެ ވޮޝިންޓަން ޕޯސްޓުން ކުރި ތަހުގީގަކަށް ފަހު, އިންޑިއާއާ ގުޅިގެން އިދިކޮޅު އެމްޑީޕީން ސަަރުކާރު ވައްޓާލަން އުޅުނު ކަމަށާއި ރައްދުގައި ސަރުކާރުން ރިޝްވަތު ދީގެން މަޖިލިސް މެންބަރުންތަކެއް ގަތް ކަމަަށް ތުހުމަތުކޮށްފި އެވެ.
ތަހުގީގީ ނޫސްވެރިކަމުގައި އެންމެ ފުންނާބު އުސް ނޫސްތަކުގެ ތެރޭގައި ހިމެނޭ ވޮޝިންޓަން ޕޯސްޓުން މި ތުހުމަތުތައް ކުރީ އެތައް ދުވަހެއް ވަންދެން ހިންގި ތަހުގީގަކަށް ފަހު, އެމްޑީޕީ އާއި ސަރުކާރާ ގުޅުންހުރި މީހުންނާ ވާހަކަ ދައްކައިގެންނާއި އެ ނޫހުން އެއްކުރި ލިޔެކިޔުންތަކުގެ މައްޗަށް ބިނާކޮށެވެ.
ވޮޝިންޓަން ޕޯސްޓުގެ ރިޕޯޓުގައިވާ ގޮތުގައި މި ހުރިހާ ކަމެއް ފެށިގެން އައީ ނިމުނު ރިޔާސީ އިންތިހާބުގެ ދުވަސްވަރުގަ އެވެ. ރިޔާސީ އިންތިހާބުގައި މުއިއްޒުއާ ދެކޮޅަށް އިންޑިއާ ސަރުކާރާ ގުޅުން އޮތް ބަޔަކު މަސައްކަތް ކުރީ އޭރު އިދިކޮޅުގައި ތިބެގެން ސަރުކާރުން ހިންގި "އިންޑިއާ އައުޓް" ކެމްޕެއިނާ ގުޅިގެން އެ ގައުމުގައި އުފެދުނު ނުތަނަވަސްކަމާ ގުޅިގެންނެވެ. ސިފައިންގެ މަސްދަރުތަކާ ހަވާލާދީ އެ ރިޕޯޓުގައި ބުނީ އެމްޑީޕީއާ އެކީ މޫކައި ސޫޓްސްގައި އިންޑިއާގެ ޕޯލިން އެޖެންޓުންނާއި ކެމްޕެއިނަރުން މަސައްކަތް ކުރި ކަަމަށެވެ.
ރިޔާސީ އިންތިހާބުން ބަލިވުމާ ގުޅިގެން ރައީސް މުއިއްޒުގެ ސަރުކާރު ވައްޓާލަން އިންޑިއާގެ ޖާސޫސީ އިދާރާ, ރޯއަށް "ޑިމޮކްރެެޓިކް ރިނުވަލް އިނީޝިއޭޓިވް" ގެ ނަމުގައި ކަރުދާހެއް ހުށަހެޅީ އެމްޑީޕީންނެވެ. މި ކަރުދާހުގައި އޮތީ މަޖިލިސް މެންބަރުންނާއި ސިފައިންނާއި ފުލުހުންނާއި ގޭންގުތަކުގެ ބައިވެރިވުމާ އެކީ ސަރުކާރު ވައްޓާލަން ހުށަހަޅާފަ އެވެ. އެކަމަށް ބޭނުންވާ ހަ މިލިއަން ޑޮލަރު ކަމަަށް ވެސް ރޯއާ މުއާމަލާތްކުރި މީހުން ބުނެފައިވެ އެވެ. މި ފައިސާ ހަރަދުކުރަން ބޭނުންވީ ރިޝްވަތު ދިނުމަށާއި ގޭންގުތަކަށް ފައިސާ ދިނުމަށެވެ.
މިކަމުގައި އިންޑިއާގެ ބަޔަކާއެކީ މެދުވެރިޔެއްގެ ރޯލު އަދާކުރި ކަމުގެ ބޮޑު ތުހުމަތެއް ކުރަނީ ރައްޔިތުންގެ މަޖިލީހުގެ އޭރުގެ ދެ މެންބަރުން ކަމުގައިވާ ހެންވޭރު ދެކުނު ދާއިރާގެ ކުރީގެ މެންބަރު ހުސެއިން ޝަހީމް (އަނދުން ހުސެއިން) އާއި ކެނދިކުޅުދޫ ދާއިރާގެ ކުރީގެ މެންބަރު އަހުމަދު އީސައަށެވެ. ޝަހީމްއަކީ ރޯއާ ގާތް މީހެއް ކަމަށް ބުނާއިރު, އީސަ ވަނީ މަޖިލިސް އިންތިހާބަށް ވެސް އިންޑިއާއިން ފައިސާ ހޯދާނެ ކަމުގެ ޔަގީންކަށް ދީފަ އެވެ. އެކަމަކު އީސަ ވަނީ ޕޯސްޓާ ވާހަކަ ދައްކަވަމުން އެކަން ދޮގުކޮށްފަ އެވެ. އަދި މިއިން އެއްވެސް ފަހަރެއްގައި އިންޑިއާއިން ފައިސާ ދީފައިވާ ކަމަކަށް ރިޕޯޓުގައި ނެތެވެ.
މެންބަރުން ގަނެގެން އަޒުލުުކުރަން އުޅޭ ކަމަށް ދެކެވުނު ވާހަކަތައް ރައީސްއާ ހަމައަށް ދިޔުމުން އެކަން ހިނގާތައް ބައްލަވަން ނުހުރެ, އޭރު މަޖިލީހުގައި ތިބި 11 މެންބަރުން ގަންނަން ކޮންމެ މެންބަރަކަށް ދެ ލައްކައަށް ވުރެ ގިނަ ޑޮލަރު ހަރަދުކުރި ކަމަށް ރައީސްގެ ޕާޓީގެ ބަޔަކާ ހަވާލާދީ ރިޕޯޓުގައި ބުންޏެވެ. އަދި ޖެހިގެން އައި މަޖިލިސް އިންތިހާބު ވެރިކަން ކުރާ ޕީއެންސީން ކާމިޔާބުކުރުމާ އެކީ އެމްޑީޕީއާ ދުރުވެ, އިންޑިއާއިން އަވަސް ވެގަތީ ގުޅުން ބަދަހިކުރަން ކަމަށް ވެސް އެ ރިޕޯޓުގައިވެ އެވެ.
