ލަންޑަން (މެއި 23) - ޔުވެންޓަސްގެ ފޯވާޑް ކްރިސްޓިއާނޯ ރޮނާލްޑޯ ގެންދަން އޭނާގެ ކުރީގެ ކްލަބް މެންޗެސްޓާ ޔުނައިޓެޑުން މަސައްކަތް ކުރަމުން އަންނަ ކަމަށް އިނގިރޭސި މީޑިއާ ރިޕޯޓްތައް ބުނެފި އެވެ.
ޒުވާން އުމުރުގައި ޔުނައިޓެޑަށް ބަދަލުވެ ރޮނާލްޑޯ ވަނީ އެ ޓީމަށް ހަ އަހަރު ކުޅެފަ އެވެ. ޔުނައިޓެޑާ އެކު ނުވަ ތަށި ހޯދި ރޮނާލްޑޯ ވަނީ އެ ޓީމަށް 292 މެޗުން 118 ގޯލު ޖަހައިދީފަ އެވެ. އަދި އެ ޓީމުގައި ހުރެ 2008 ވަނަ އަހަރު ބެލޮންޑިއޯ ކާމިޔާބުކުރި އެވެ. ޔުނައިޓެޑް ދޫކޮށް 2009 ވަަނަ އަހަރު ރެއާލް މެޑްރިޑަށް ބަދަލުވި ރޮނާލްޑޯ އެނބުރި ޔުނައިޓެޑަށް އަންނަން އުޅޭ ކަމަށް މީޑިއާގައި އެކި ފަހަރު މަތިން ވަނީ ވާހަކަ ދެކެވިފަ އެވެ.
މި ފަހަރު އިޓާލިއަން ލީގުގެ ގަދަ ހަތަރަކުން ޔުވެންޓަސް އަށް ފުރުސަތު ނުލިބިއްޖެނަމަ ރޮނާލްޑޯ އެ ޓީމުގައި މަޑުނުކުރާނެ ކަމަށް ދި އެތުލެޓިކް ނޫހުން ކަށަވަރުކޮށްދެ އެވެ. ޕޯޗުގީސް ބައެއް މީޑިއާ ރިޕޯޓްތައް ބުނާގޮތުން ރޮނާލްޑޯ ދެން ބަދަލުވާނީ އޭނާ ކުރިން ކުޅުނު ޓީމަކަށެވެ. އެއީ ސްޕޯޓިން ލިޒްބަން އާއި ޔުނައިޓެޑް ނޫނީ ރެއާލް އަށެވެ.
އުމުރުން 36 އަހަރުގެ ރޮނާލްޑޯ ހޯދަން ޔުނައިޓެޑުން ޝައުގުވެރިވޭތޯ ނޫސްވެރިއަކު ސުވާލުކުރުމުން އެ ޓީމުގެ ކޯޗު އޮލެ ގުނަ ސޯލްޝެއާ ބުނީ ރޮނާލްޑޯއާ ގާތްގުޅުމެއް އޮންނަ ކަަމަށާއި މީގެ ކުރިން ޔުނައިޓެޑަށް ކުރިން ކުޅެފައި ހުރި ކުޅުންތެރިން އެނބުރި އެ ކްލަބަށް އައިސް ކުޅެފައިވާތީ އަބަދު ވެސް ރޮނާލްޑޯގެ ވާހަކަތައް ދެކެވޭނެ ކަމަށެވެ.
ދާދި ފަހުން އީއެސްޕީއެން އާޖެންޓީނާ އާއި ފޮކްސް ސްޕޯޓްސް އާޖެންޓީނާ އިން ރިޕޯޓްކުރި ގޮތުގައި ރޮނާލްޑޯ ހޯދުމުގެ މަސައްކަތް ޔުނައިޓެޑުން ކޮންމެ އަހަރަކު ވެސް ކުރެ އެވެ. އެކަމަކު މައްސަލަ އަކަށްވަނީ މުސާރަ ކުޑަކުރަން ރޮނާލްޑޯ އެއްބަސްނުވާތީ ކަމަށް އެ ރިޕޯޓްތަކުގައިވެ އެވެ. ރޮނާލްޑޯ މި ވަގުތު ޔުވެންޓަސްގައި ހުރީ އަހަރަކު 30 މިލިއަން ޔޫރޯ ލިބޭ މުސާރައެއްގަ އެވެ.
ފްރާންްސްގެ ނޫސްތަކުން ރިޕޯޓްކުރާ ގޮތުގައި ރޮނާލްޑޯ ހޯދަން ޕީއެސްޖީ އާއި ޔުނައިޓެޑުން މަސައްކަތްކުރާނީ އޭނާ މިހާރު ކުޅެމުން އަންނަ މުސާރަ ކުޑަކުރާނަމަ އެވެ. ޔުނައިޓެޑުން އަންނަނީ އިޝްތިހާރު ޑީލްތަަކެއްގެ ތެރެއިން ރޮނާލްޑޯގެ ފުލް މުސާރަ ހަމަޖައްސައިދޭ ގޮތަށް އޭނާ ގެންނަން މަސައްކަތް ކުރަމުންނެވެ.
މި ސީޒަނުގައި ހުރިހާ މުބާރާތެއްގައި ޔުވެންޓަސްގެ 44 މެޗުން ރޮނާލްޑޯ ވަނީ 36 ގޯލު ޖަހައިފަ އެވެ. ރޮނާލްޑޯ އަށް އަދިވެސް އެންމެ މަތީ ލެވަލްގައި ދެތިން އަހަރު ކުޅެވޭނެ ކަމަށް ފުޓްބޯޅަ ތަޖުރިބާކާރުން ގަބޫލުކުރެ އެވެ.
ރޮނާލްޑޯގެ މުސްތަގުބަލާ ގުޅޭގޮތުން ގިނަ ކަންތައްތަކެއް ސާފުވާނީ މިރޭ އިޓާލިއަން ލީގުގެ މެޗުތައް ނިމޭ ގޮތަކުންނެވެ. ޔުވެންޓަސް މި ވަގުތު ފަސް ވަނައިގައި އޮތްއިރު ގަދަ ހަތަރެއްގައި ނިންމުމުގެ އަމިއްލަ ބާރެއް ނެތެވެ.
